19.12.2021

Поль Погба «Барселона»га ўтмайдиган бўлди.

Diario Sport нашрининг ёзишича, футболчининг агенти Мино Райола мижозининг потенциал трансферини «кўк-анорранглилар» президенти Жоан Лапорта билан муҳокама қилган. Бироқ бир қанча сабаблар туфайли келишув амалга ошмай қолган.

Биринчидан, Погбанинг йиллик маоши ва Райолага тўланадиган комиссия суммаси «Барселона» учун жуда қимматлик қилган. Айни дамда у «МЮ»да 15 миллион фунт маош олишига қарамай, каталонияликлардан камида 20 миллион маош олишни исташини айтган.

Иккинчидан, «блаугранас» бош мураббийи Хави Погбанинг келишига хайрихоҳ эмаслигини айтган. Унинг фикрича, жамоада яримҳимоя чизиғи қолганларига қараганда анча яхши кучайтирилган. Шу сабаб, эътиборни бошқа позицияларга қаратиш кераклигини таъкидлаган.

Маълумот учун, Погбанинг айни дамдаги потенциал нархи 60 миллион еврони ташкил этмоқда. У ёзда эркин агентга айланади.

Муҳокама

19.12.2021

Эдинсон Кавани январь ойида жамоани тарк этиб, «Барселона»га ўтишга яқин турибди.

«Marca» нашрининг хабар беришича, 34 ёшли уругвайлик футболчи каталонияликлар таклифини қабул қилишга қарор қилган. Унинг фикрича, Испанияда у кўпроқ ўйин амалиётига эга бўлади.

Шартнома катта эҳтимол билан мавсум сўнгига қадар мўлжалланади. Қайд этилишича, Каванига «Бока Хуниорс»дан таклифлар бўлган, бироқ уругвайлик футболчи «Барса» вариантини устунроқ кўрган.

Маълумот учун, Эдинсон Кавани бу мавсумда Премьер-лиганинг 5та ўйинида майдонга тушиб, 1та гол уришга муваффақ бўлган.

Муҳокама

19.12.2021

Италиянинг «Милан» клуби етакчиларидан бири Франк Кессье жорий мавсум якунида клубни тарк этиши деярли ойдинлашган.

Кот д'Ивуарлик 24 ёшли футболчининг миланликлар билан амалдаги келишуви ёзда ниҳоясига етади. Football Italia хабарига кўра, Франк клуби билан янги шартнома масаласида келишувга эришмаган. Футболчининг агенти бир ойдан буён бир қатор клублар билан музокара ўтказиб, «Манчестер Юнайтед» билан келишувга эришишга яқин турибди.

Қайд этилишича, Кессьени «Тоттенҳэм» ва «ПСЖ» ҳам ўз сафида кўришни истаган, аммо эркин агентга айладиган ўйинчи учун инглиз клуби яхшироқ таклиф берган. У ёзда «Милан»ни тарк этади.

Маълумот учун, Франк А Серия жорий мавсумида 14 ўйинда 3та голга муаллифлик қилган.

Муҳокама

13.12.2021

Антони Марсьяль январь ойида жамоани тарк этишни истамоқда. Бу ҳақда футболчининг агенти Филиппе Ламболи маълум қилган.

«Антони январдаги трансфер ойнасида жамоасини ўзгартирмоқчи. У захирада қолиши эмас, ўйнаши лозим. Марсьяль «Манчестер Юнайтед»да қолишни истамаяпти. Тез орада бу масалани клуб билан муҳокама қиламиз», - дейди франциялик 26 ёшли ҳужумчининг вакили Sky Sports’га.

Марсьял жорий мавсум АПЛда «МЮ» сафида бор йўғи икки ўйинда асосий таркибда тушган бўлса, яна беш ўйинда захирадан ўйинга қўшилган. ЕЧЛда эса 2 ўйин ўтказди.

Франциялик форвард 2015 йилдан буён «Манчестер Юнайтед»да тўп суриб, ҳозирда 2024 йилга қадар келишувга эга. 

Аввалроқ, Марсьялга «Барселона» қизиқиш билдираётгани ҳақида хабар қилинган эди.

Муҳокама

13.12.2021

«Манчестер Юнайтед» коронавирус тарқалиши билан боғлиқ муаммоларга дуч келди. 

The Athletic'нинг ёзишича, якшанба кунги машғулот кўнгилдагидек ўтмади. Бир неча футболчи ва клуб ходимларида коронавирус аниқланди. Ковидга чалинган футболчилар уйларига жўнатиб юборилган. 

Маълумот учун, Норвичга сафар қилган футболчиларда тест натижалари манфий чиққан. Яъни асосий таркиб ўйинчиларида вирус аниқланмаган.

Қайд этилишича, АПЛ раҳбарияти ҳозирги вазиятдан хабардор. «МЮ»нинг 14 декабрь, сешанба куни бўлиб ўтиши режалаштирилган «Брентфорд»га қарши ўйини ўтказилиши номаълум.

Муҳокама

09.12.2021

Эдинсон Кавани қишки трансфер ойнасида «Манчестер Юнайтед»ни тарк этиши мумкин.

Diario Sport хабарига кўра, «Барселона» клуби уругвайлик 34 ёшли форвардни ўз сафига қўшиб олишни истамоқда. Каталония клуби Каванини ёзда эркин агент сифатида таклиф этмоқчи эди, аммо Хави таркибда ҳужумчига эҳтиёж юқорилигини билдириб, клуб раҳбариятидан Эдинсонни январдаёқ сотиб олишни сўраган. Лапорта ушбу трансфер катта маблағ талаб қилмаса, ўтишни амалга ошириш ниятида.

Уругвайлик ҳужумчи ҳам «МЮ»да Криштиану Роналду асосий таркибда тўп суришини тушуниб, Ла Лигага кўчиб ўтишга қарши эмас.

Маълумот учун, Каванининг «Юнайтед» билан амалдаги келишуви 2022 йилга қадар имзоланган. Ҳужумчи 2020 йилда клубга эркин агент сифатида қўшилганди.

Муҳокама

09.12.2021

Италия миллий жамоаси бош мураббийи Роберто Манчини «Манчестер Юнайтед» билан келишувга эришгани ҳақидаги хабарларни рад этди.

«АПЛнинг бирорта клуби билан келишувга эришганим йўқ. Барчаси ёлғон маълумот. Бор эътиборим Италия миллий жамоаси билан жаҳон чемпионатига чиқиш ва чемпионлик учун курашишга қаратилган», - дея Манчинининг сўзларини келтирган Gazzetta dello Sport.

Аввалроқ, Манчини ёзда «Манчестер Юнайтед» бош мураббийига айланиши борасида хабарлар тарқалганди. Ҳозирда жамоани бошқараётган Ральф Рангник клуб билан мавсум якунига қадар шартнома имзолаган.

Муҳокама

Янгиликлар /

Рангник виза олди!

04.12.2021

Ральф Рангник ниҳоят Англияга ишлаш ҳуқуқини қўлга киритди.

63 ёшли немис мутахассиси ишчи визасини олиб, тез орада клубдаги лавозимига расман киришади. Рангник 2019 йилдан буён бош мураббий сифатида ишламаётгани сабаб Буюк Британияда ишлаш ҳуқуқини автоматик тарзда ололмаган. АФА комиссияси хулосасидан сўнг унга ишлаш ҳуқуқи берилди.

Қайд этилишича, Рангник «Арсенал»га қарши ўйинни трибунада кузатади. 5 декабрь куни эса «Кристал Пэлас» билан баҳсда «МЮ» бош мураббийи сифатида мураббийлар ўриндиғидан жой олади.

Маълумот учун, «МЮ» - «Арсенал» баҳси бугун, 2 декабрь куни соат 01:15да бошланади. Учрашувда Майкл Кэррик манчестерликларни бошқаради.

Муҳокама

04.12.2021

Криштиану Роналду клубдаги фаолияти давомида 800 ва 801-голларини урганидан сўнг бунга изоҳ берди.

«Расмий ўйинларда клублар миқёсида 800дан ортиқ гол урган биринчи футболчи бўлганимдан хурсандман. Қандай ажойиб ва унутилмас йўлни босиб ўтдим...

Шу пайтга қадар ёнимда бўлган барча мухлисларимга раҳмат айтаман. Ажойиб сонлар: 801! Шунча гол урдим, буёғига ҳам тўхтамайман. Серия давом этади», – дея Роналду ўз «Twitter» саҳифасида пост қолдирган.

Маълумот учун, Роналду ушбу юбилей голларини «Арсенал»га қарши ўйинда киритди. Ўйин «қизил иблислар»нинг 3:2 ҳисобидаги ғалабаси билан якунланди.

Муҳокама

03.12.2021

Ральф Рангник дастлабки матбуот анжуманида клубда фаолият бошлаши ва жамоада ишни нимадан бошламоқчи эканини айтди.

«Манчестер Юнайтед»дек клуб сенга бундай лавозимни таклиф этганидан кейин буни рад эта олмайсан. Шу боис бу масалада ортиқча ўйлаб ўтирганим йўқ.

Албатта, бунгача «МЮ»нинг «Уотфорд» ва «Челси», қолаверса «Сити» ҳамда «Ливерпуль» билан ўйинларини ҳам томоша қилгандим. Ўшанда «МЮ»дан таклиф тушиши хаёлимга ҳам келмаган. АПЛда нималар рўй бераётгани ҳақида яхши маълумотга эга эдим. Чунки бу турнирни мунтазам кузатиб бораман. 

Шубҳасиз, «МЮ» футболчилари жуда иқтидорли ва юқори савиядаги ўйинчилар. Энг аввало жамоага барқарорликни сингдиришим керак бўлади. Ҳаттоки, кеча «Арсенал»га қарши баҳсда ҳам ғалаба қозониш учун 3та гол киритишимизга тўғри келди. Ҳар ўйинда ўртача 2та гол ўтказиб юбораяпмиз – бу жуда кўп. Дарвоза дахлсизлигини сақлаш ҳам муҳим жиҳат.

«Арсенал»га қарши баҳс мухлислар учун томошабоп ўйиндир, аммо мураббий бундай ўйинлар ҳар куни бўлишини истамайди. Мен учун ўйинни назорат қилишимиз ва тасодифий омилларни камайтириш жуда муҳим», - дейди германиялик мутахассис.

Маълумот учун, «МЮ» АПЛ 14-туридан кейин 21 очко билан 7-ўринда бормоқда. Рангник бошқарувида жамоа 5 декабрь куни ўз майдонида «Кристал Пэлас»га қарши майдонга тушади.

Муҳокама

Аввалги саҳифа   |   Кейинги саҳифа