Марсиял трансфер нархи белгиланди
29.09.2021
«Боруссия» трансфер ойнасида Эрлинг Ҳоландни сотган тақдирда унинг ўрнини эгаллаши мумкин бўлган ҳужумчи изламоқда.
Sport1.de нашри хабарига кўра, Дортмунд клуби Антони Марсьяль номзодини кўриб чиққан, аммо инглиз клуби франциялик форвард учун сўраётган трансфер қиймати сабабли немис клуби раҳбарияти бу трансфер ниятидан воз кечмоқчи.
Қайд этилишича, «МЮ» 25 ёшли ҳужумчиси учун 50 миллион евро сўраган. Дортмундликлар эса Марсияль учун бу нархни қиммат деб ҳисобламоқда.
Маълумот учун, Марсьяль АПЛ жорий мавсумида 4 ўйинда майдонга тушиб, ҳали голлари ҳисобини очмаган.
Магуайр уч ҳафтага сафдан чиқди
29.09.2021
Ҳарри Магуайр жароҳати сабабли уч ҳафтага сафдан чиқди, дея хабар бермоқда The Sun.
Манбанинг ёзишича, англиялик ҳимоячи Чемпионлар лигаси 2-тури доирасидаги «Вильярреал»га қарши ўйин билан бирга АПЛ 7-тури доирасидаги «Эвертон»га қарши учрашувни ҳам ўтказиб юборади.
Шунингдек, Магуайр Англия миллий жамоасининг октябрь ойидаги ЖЧ-2022 саралаш босқичи доирасида Андорра ва Венгрияга қарши ўйинларини ҳам ўтказиб юборади.
Эслатиб ўтамиз, «МЮ» ҳимоячиси «Астон Вилла»га қарши шанба кунги учрашувда жароҳат олиб, ўйиннинг (0:1) 66-дақиқасида захирага олинганди.
Маълумот учун, «Манчестер Юнайтед» — «Вильярреал» ўйини 29 сентябрь куни «Олд Траффорд»да соат 23:59да бошланади.
Варан: «Реал»дан кетиш узоқ жараён эди
29.09.2021
Рафаэль Варан «Реал»дан «Манчестер Юнайтед» га кетиш ҳақида гапирди ва иккала клубни солиштирди.
««Реал» дан кетиш узоқ жараён эди. Мен бу ҳақда кўп ўйлашим керак эди, қарор қабул қилиш осон бўлмади. Мен Мадридни тарк этмоқчи эдим, чунки жамоага бор кучимни бердим. Мен янги синовни , янги ҳис -туйғуларни бошдан кечирмоқчи эдим. АПЛ - бу жуда яхши чемпионат, шунинг учун мен бу ерга кўчиб ўтишни хоҳлардим.
«Реал» ва «Манчестер Юнайтед»даги босимни солиштириш қийин. Катта клублар жамоага келган футболчилардан кўп нарсани кутишади. Аммо менимча, босим тахминан бир хил. Иккала клуб ҳам доим ғалаба қозонишни хоҳлайди, мағлубият ёки дуранг эса ёмон»- деди Варан
САФ: Гаскойн фантастик ўйинчи эди
28.09.2021
«Манчестер Юнайтед» клуби собиқ бош мураббийи Алекс Фергюсон қайси футболчини манкунианликлар сафига олиб кела олмаганидан афсусда эканини айтди.
«Саволингизга жавоб берарканман, хаёлимга фақат битта вариант келди. Бу — Пол Гаскойн. У фантастик ўйинчи эди. Агар уни қўлга кирита олганимизда, унинг фаолияти аъло даражада кечган бўларди. Унинг фаолияти яхши чиқмади, дея олмайман. Аммо биз билан янада яхшироқ чиққан бўларди. Шубҳасиз.
Жамоамизда Брайан Робсон, Стив Брюс ва Бобби Чарльтон каби ўйинчилар бор эди. Сэр Бобби унинг учун фантастик мураббий бўлган бўларди. Чунки у ажойиб инсон. Гаскойн «МЮ»га ўтишга ваъда бериб, таътилга йўл олди. Орадан бир қанча вақт ўтиб менга қўнғироқ қилиб, унинг «Тоттенхэм» билан шартнома имзолаганини айтишди. Чунки «шпорлар» унинг онаси учун 94 минг еврога уй сотиб олиб беришган экан. Мен эса бунга ишонолмадим.
Снейдер? Унинг номини кўп бора биз билан боғлашган, аммо биз ҳеч қачон Уэслига қизиқиш билдирмаганмиз», — деди Фергюсон.
Мата «Юнайтед»дан кетишга тайёр
28.09.2021
Яримҳимоячи Хуан Мата кам ўйин амалиётига эга бўлаётгани учун «Манчестер Юнайтед»ни тарк этиши мумкин.
33 ёшли испаннинг манкунианликлар билан амалдаги шартномаси мавсум сўнгигача мўлжалланган. Аммо вазият ўзгармаса, у январдаёқ жамоадан кетишга тайёр, деб ёзади Manchester Evening News.
Мата бу мавсумда атиги 62 дақиқа ҳаракат қилди — Лига Кубогида «Вест Ҳэм» (0:1) билан ўйинда.
Яримҳимоячи «МЮ»га 2014 йили ўтган ва ҳозиргача 274та баҳсда 51та гол урган.
Невилл: Оле ўз имзосини кўрсатиши керак
27.09.2021
Гари Невилл «МЮ»нинг бу мавсум чемпион бўла олишига ишонмаслиги сабабини тушунтирди.
«Манчестер Юнайтед» дастлабки ўйинларни ютганда ҳам, Роналду голлар урганда ҳам бу ҳақда гапиргандим. Чунки «Юнайтед» АПЛ ғолиблиги учун етарли даражадаги ўйин кўрсатмтаяпи, жамоавий ўйин кўринаётгани йўқ. Футболчилар тўпсиз ҳам бирдек ҳаракатланишлари зарур. Улар эса алоҳида эпизодларда ёрқин ўйнашмоқда, холос. Жамоада алоҳида гуруҳдаги ўйинчилар керакли вазиятларда ўзларини кўрсатишмоқда. Ўйин жиҳатдан эса муаммолар бор. Роналду, Варан ва Санчонинг жамоа ўйинига киришиши учун ҳам вақт талаб этилади.
«Челси», «Ливерпуль» ва «Манчестер Сити» ўйинини кўраман, уларда жамоавий ўйин бор. Оле-Гуннар Сульшер ҳам «Манчестер Юнайтед»да ўз имзосини кўрсатиши керак», - дейди Невилл Sky Sports’даги эфирида.
Маълумот учун, «МЮ» АПЛ 6-туридан кейин 13 очко билан 4-ўринда бормоқда.
Фергюсон: Бу - фантастика
27.09.2021
Сэр Алекс Фергюсон Криштиану Роналдунинг «Манчестер Юнайтед»га қарши беллашуви ҳақида ўз фикрларини билдириб ўтди.
«Бу - фантастика. Сиз ҳам кўриб турибсиз, Роналдунинг «Манчестер Юнайтед»га қайтиши Цезарнинг Римга келишига ўхшаб кетади: келди, кўрди, забт этди.
Бу мен каби «қизил иблислар» мухлислари учун нақадар катта воқеа эканлигини тасаввур қилиш қийин эмас. Бизлар бир неча миллионмиз. «Ньюкасл»га қарши биринчи уй ўйинида «Олд Траффорд» ташқарисида ҳам минглаб томошабинлар жам бўлишди. У бу стадионга бола ҳолида келган вақтида ҳам барчасини тезда ўзлаштириб олганди ва кўп нарсаларни ўзгартира олган», - деди шотландиялик 79 ёшли мутахассис.
Маълумот учун, қайтганидан сўнг, манчестерликлар таркибида Премьер-лигада 3та ўйин ўтказиб, 3та гол уришга муваффақ бўлди.
Оле: Жуда ҳам хафаман
26.09.2021
Оле-Гуннар Сульшер АПЛ 6-тури доирасидаги «Астон Вилла»га (0:1) қарши ўйиндан кейин ҳакамлар қароридан дарғазаб бўлди.
«Жуда ҳам хафаман, чунки рақибнинг голи офсайд ҳолатидан киритилди. Бундай қарорлар бизга қарши қабул қилинаётгани ачинарли. Албатта, мағлубиятдан кейин хотиржам бўлиш қийин.
Ўйинда рақиб жамоа яхши гол киритса, бунга чидаш мумкин. Аммо бу сафар ҳакамлар яққол ўйиндан ташқари ҳолатини кўришмади. Футболчи бош билан зарба бераётганда ўйиндан ташқари ҳолатда бўлган рақиб ўйинчиси Де Хеага халақит қилди. Қандай қилиб бу голга айланиши мумкин-у, «Лестер»нинг худди шундай голи бекор қилинади? Бу яққол офсайд ҳолати. Афсуски биз якунда бир очкони қўлга киритиш имкониятидан ҳам маҳрум бўлдик. VAR керакли вазиятда жим турди. Уларни тушуниш тобора қийинлашмоқда.
Брунунинг пенальтиси? Ўша вазиятда рақиб футболчилари Фернандеш зарба беришидан олдин унга босим ўтказишга уринишди, ҳакам рақиб ўйинчиларидан бирига сариқ карточка кўрсатишга ҳақли эди.
Ким пенальти тепишини ўйиндан олдин ҳал қилиб олгандик. Умуман олганда учрашув давомида етарлича тажовузкорлик кўрсатдик, аммо ҳал қилувчи зарбаларни беришда кўп хато қилдик», - дейди Сульшер.
Маълумот учун, ушбу мағлубият «МЮ»нинг АПЛ жорий мавсумидаги илк муваффақиятсизлигига айланди.
«МЮ» ўнг қанот ҳимоясини кучайтиришни режалаштирмоқ
26.09.2021
«Манчестер Юнайтед» қишки трансферлар ойнаси вақтида ўнг қанот ҳимоясини кучайтиришни режалаштирмоқда, деб хабар берди «Fijaches» сайти.
«Қизил иблислар» январда «Лейпциг» ҳимоячиси Норди Мукиелени таркибга қўшиб олишга ҳаракат қилиб кўради. Бу орқали манчестерликлар ўнг қанот ҳимоясидаги рақобатни оширишни мақсад қилган. Манбанинг маълум қилишича, бу трансфер «МЮ» учун 22 млн фунт-стерлингга тушиши мумкин.
Маълумот ўрнида, Мукиеле жорий мавсум Бундеслигада 5та учрашувда майдонга тушиб, бир маротаба гол уришга муваффақ бўлган.
Оле: Умид боғлашдан бошқа иложимиз йўқ
25.09.2021
Оле-Гуннар Сульшер «Ливерпуль» устози Юрген Клоппнинг манчестерликларга ҳакамлар кўпроқ жарима зарбалари бераётгани ҳақидаги фикрларига жавоб қайтарди.
«Биз шунчаки ўзимиз лойиқ бўлган нарсаларга эришганимизга ишонишимиз мумкин. Аслида, сўнгги 2та ўйинда 3та пенальти тепишимиз керак эди.
Лигада бизнинг пенальтиларимиз ҳақида кўп «қайғурадиган» биргина мураббий бор ва буни ҳамма билади. Лекин бизга тақдим этилмаган пенальтилар ҳақида гапиришни унутмоқда.
Юрген пенальтиларимиз ҳақида гапиришни бошлаганидан буён ҳакамлар бизга нисбатан ўта совуққонлик қилишмоқда. Биз рефериларнинг тўғри қарор чиқаришига умид боғлашдан бошқа иложимиз йўқ», - деди норвегиялик мураббий.
Эслатиб ўтамиз, «қизил иблислар» Премьер-лига 6-тури доирасида бугун, 25 сентябрь куни 16:30да «Олд Траффорд»да «Астон Вилла»га қарши баҳс олиб боришади.