Оле: Криштиану барча мақтовларга лойиқ
25.09.2021
Оле-Гуннар Сульшер жамоанинг 36 ёшли ҳужумчиси Криштиану Роналду ҳақида фикр билдирди.
«У 40 ёшгача ўйнаса ҳам, ҳайрон бўлмайман. Унинг ўзига эътибори, қайғуриши асосий масаладир. Албатта, унда ўзгача ген ҳам бўлиши керак.
Криштиану унга айтилган барча мақтовларга лойиқ. Аввало, жисмоний ҳолати учун. Бундан ҳам таъсирли томони шундаки, у ҳамма совринларга эришса-да ғалабага очликни ҳис қилади.
Унда тўғри менталитет бор. Ҳаммаси унинг хоҳишига боғлиқ. Ва у оёқлари, ҳатто боши унга тўхташни айтмагунича ўйнашни давом эттиради», — дея Сульшернинг сўзларини келтиради Goal.
Де Хеа: Роналду «Юнайтед» афсонаси
25.09.2021
Давид Де Хеа жамоадоши Криштиану Роналду ҳақида фикр билдирди.
Испаниялик дарвозабон Роналду аллақачон «Манчестер Юнайтед» афсонасига айланиб бўлганини айтди.
«Роналду аллақачон клуб афсонаси, шунинг учун ҳар куни унинг спорт залда машқ қилишини ва ўз устида қандай ишлашини кўриш ёш йигитлар учун ажойиб мастер класс.
Роналду катта ўйинчи, унинг ҳар куни тинимсиз меҳнат қилиб, жамоага ёрдам беришини кўриш жуда ажойиб», — деди Де Хеа.
Варан: Поль мен билан клубда қолиши керак
24.09.2021
«Манчестер Юнайтед» марказий ҳимоячиси Рафаэль Варан ўз ватандош Поль Погбанинг жорий мавсум якунига етгач, жамоани тарк этмаслигига умид қилмоқда.
Погбанинг «Манчестер Юнайтед» билан шартномаси кейинги ёзгача мўлжалланган. Томонлар ўзаро ҳамкорликни узайтириш борасида ҳали келиша олишмаган.
«Унинг келажаги ҳақидаги қарорни албатта унинг қабул қилиши аниқ, лекин у мен билан клубда қолиши керак. Поль — фантастик футболчи, бизга ва жамоамиз у каби футболчига муҳтож», — дейди Варан.
Премьер-лигада янги мавсум давомида Погба ажойиб ўйин кўрсатмоқда. Франциялик яримҳимоячи 5 та ўйин ўтказиб, 7 та (!) ассистни амалга оширди.
Оле: Бунинг иложи йўқ
23.09.2021
Оле-Гуннар Сульшер Англия Лига Кубоги 1/16 финали доирасида «Вест Ҳэм»га (0:1) қарши ўтказилган баҳсдан сўнг, Роналдунинг майдонга ташланмагани ҳақида гапирди.
«Криштиану жамоамизга келгач, натижаларимизга ижобий таъсир ўтказишга улгурди. У ҳар битта ўйинда майдонда бўлишни хоҳлайди, лекин бу - иложсиз.
Мен футболчиларга алоҳида тўхталиб ўтиш тўғри эмас, деб ҳисоблайман. Футбол - жамоавий ўйин. Энтони ҳам ҳужум чизиғимиздаги бошқа футболчилар сингари яхши ўйин намойиш эта олди, бироқ якуний паллаларда адашди. Марсьялнинг ўзи ҳам ундан нима кутишимизни яхши билади. Агар у мана шундай қаттиқ ишлашда давом этса, ўз имкониятини олади», - деди норвегиялик мутахассис.
Маълумот учун, манчестерликлар келгуси учрашувни АПЛ доирасида «Астон Вилла» клубига қарши ўтказишади.
«МЮ» Марсьял билан хайрлашмоқчи
22.09.2021
Антони Марсьялга клуб у билан хайрлашмоқчи эканлигини хабар қилди, деб ёзади Eurosport.
Манбага кўра, манкунианликлар футболчининг агентларига мижози учун янги жамоа топишни таклиф қилган. Шу билан бирга инглиз клуби 25 ёшли француз учун камида 40 млн евро олмоқчи.
Хабар қилинишича, ҳужумчининг ўзи фаолиятини АПЛда давом эттиришни хоҳлайди.
Марсьяль «МЮ»га 2015 йили «Монако»дан ўтган. Унинг жамоа билан шартномаси 2024 йилгача мўлжалланган.
Ҳужумчи бу мавсумда АПЛда 4та баҳсда майдонга тушиб, бирорта самарали ҳаракатни амалга оширмади.
Скоулз: Криштиану юқори даражада
22.09.2021
Пол Скоулз жамоанинг собиқ ҳавбеки Эрик Кантонани ҳужумчи Криштиану Роналду билан таққослади.
«Эрик унга ўхшайди, аммо Криштиану ҳамон юқори даражада. Кантона шунчаки майдонга чиқиб, машқ қиларди. У спортзалга боришни ёқтирмасди.
Роналду машғулотдан аввал ҳам, кейин ҳам ишлайди. У АПЛда кучли бўлиш учун залга борди. Мен ҳеч қачон у каби профессионални кўрмаганман. У кун бўйи ишларди, жарималар тепишни ўрганарди, тезлигини оширишга уринарди. У оёқларида оғирлик билан тепаликларга югурди.
Роналду инглиз футболчилари ҳеч қачон кўрмаган нарсаларни амалга оширди. Ва бу ҳаммаси эмас. У яхши тайёргарлик кўриш учун ҳамма нарса қилди», — дея Скоулзнинг сўзларини келтиради Goal.
Фердинанд: Рюдигер энг яхши ҳимоячи
21.09.2021
Рио Фердинанд «Челси» футболчиси Антонио Рюдигерни Премьер-лиганинг айни дамдаги энг яхши ҳимоячиси деб атади.
«Тухель «Челси» бошқарувини қўлига олгач, Антонио Рюдигер Англия Премьер-лигасининг энг яхши ҳимоячисига айланди. Савия жиҳатдан унга «Манчестер Сити» ҳимоячиси Рубен Диаш яқинроқ кела олиши мумкин. Рюдигернинг «Челси» ўйинидаги таъсири жуда катта.
Лэмпард қўл остида Рюдигер Фрэнкнинг ўйинига мос эмаслиги кўринарди. Антонио унга ёқмасди. Ўшанда ҳатто клуб бу ҳимоячи билан хайрлашмоқчи экани ҳақида ҳам айтилганди. Ҳозирга келиб эса Рюдигер нафақат жамоасининг, балки турнирнинг ҳам энг яхши ҳимоячиси сифатида гавдаланмоқда», - дея Фердинанднинг сўзларини келтирган Daily Mail.
Маълумот учун, Рюдигер жорий мавсум АПЛда 5 ўйинда майдонга тушиб, битта голга муаллифлик қилди. «Челси» 5-турдан кейин 13 очко билан турнир жадвалида пешқадамлик қилмоқда.
Роналду: Олға, қизил иблислар
21.09.2021
Криштиану Роналду «Вест Ҳэм» устидан қозонилган ғалабадан (2:1) кейин инстаграмда пост қолдирди.
«Премьер-лигадаги ҳар бир ўйин – 3 очко учун кечадиган ажойиб кураш. Бугунги учрашув орқали биз йўлимизда учраши мумкин бўлган барча тўсиқлар ҳақида тушунчага эга бўлдик. Мақсадимиз сари юришда давом этамиз. Биргаликда! Кучлироқ! Ҳамжиҳатликда! Олға, қизил иблислар!» - дея пост қолдирган португалиялик 36 ёшли форвард.
Эслатиб ўтамиз, «Вест Ҳэм»га қарши ўйинда Криштиану Роналду икки марта жарима майдони ичида лондонликлар ҳимоячилари томонидан йиқитилган бўлса-да, учрашув бош ҳаками Мартин Аткинсон икки марта ҳам пенальти белгиламади. 90+3-дақиқада эса тўп Шоунинг қўлига теккач, Аткинсон VARга мурожаат қилиб, якунда Де Хеа қайтарган 11 метрлик нуқтани белгилаганди. Ушбу вазиятлар мунозараларга сабаб бўлмоқда.
Маълумот учун, Роналду «МЮ»даги дастлабки 3 ўйинида 4та голга муаллифлик қилди.
Погба ўрнига Франк Кессьени!?
21.09.2021
«Юнайтед» жамоани тарк этиши мумкин бўлган Поль Погба ўрнига «Милан» яримҳимоячиси Франк Кессьени олиб келмоқчи, деб хабар беради Mundo Deportivo.
Ивуарлик 24 ёшли футболчи ўтган мавсумда «россонери» сафида барча турнирлар доирасида 50та ўйин ўтказиб, 14та гол ва 6та ассистни ўз ҳисобига ёздириб қўйган. Transfermarkt ҳавбекни 50 млн еврога баҳоламоқда.
Кессиэнинг «Милан» билан амалдаги шартномаси 2022 йил ёзигача мўлжалланган.
Ўз навбатида Погбанинг манкунианликлар билан шартномаси ҳам келаси йил ёзида ниҳоясига етади. Франциялик яримҳимоячи бу мавсумда АПЛда 5та баҳсда майдонга тушиб, 7та голга ассистентлик қилди.
Далот «Юнайтед»ни тарк этишга яқин
20.09.2021
Диого Далот кейинги трансфер ойнасида «Манчестер Юнайтед»ни тарк этишга яқин турибди. Бу ҳақда Goal.com портали ўз саҳифаларида хабар беради.
«Милан»даги ижарадан қайтгач, футболчи «қизил иблислар»нинг асосий таркибига кира олмади. Оле-Гуннар Сульшер бошқа ҳимоячиларга таянмоқчи.
Ёзги трансфер ойнасида Дортмунднинг «Боруссия»си ва «Милан» клублари Далотга қизиқиш билдиришди, аммо инглиз клуби футболчини сотмасликка қарор қилган эди. Энди эса вазият ўзгаргани айтилмоқда.