Кин: Энди рақобат мавжуд
30.11.2020
Рой Кин жамоа дарвозабони Давид Де Хеани танқид қилди.
«Де Хеа бу мавсумда бироз яхшироқ ўйнай бошлади. Ўйлашимча, бунга Дин Ҳендерсоннинг қайтиши таъсир қилган. Энди муносиб рақобат мавжуд. Улар ҳар куни машғулотларда бир-бирларининг кўзларига қарашлари мумкин.
Де Хеа биладики, агар у сўнгги йилларда бўлганидек тез-тез хато қилса, ўрнини Ҳендерсон эгаллайди.
Сўнгги пайтларда унинг формаси яхшиланди. Аммо у ҳали ҳам етарли даражада ишламайди ва кўпроқ статистика ҳақида гапиради.
Унинг юқори қийматли шартномаси бор. Давиднинг хатолари туфайли жамоа кўплаб очколар йўқотди. У 10 йил ичида фақат бир бор АПЛ ғолиблигини қўлга киритди. Баъзан у савиясиз ҳимоячилар билан ўйнаган, аммо дарвозабонлик – унинг вазифаси.
У бир нечта сейвларни амалга оширганда, одамлар уни ҳаддан ташқари кўкка кўтаришади», – дея Киннинг сўзларини келтиради Manchester Evening News.
Оле: Саутҳэмптон энг яхши жамоаларидан бири
28.11.2020
Оле-Гуннар Сульшер АПЛнинг 10-туридан ўрин олган «Саутҳэмптон»га қарши ўйин олдидан ўз фикрларини билдирди.
«Қийин ўйин бўлади. Агар сўнгги 30-40 ўйинни оладиган бўлсак, «авлиёлар» – Премьер-лигадаги энг яхши жамоалардан бири. Улар натижа ва ўйин борасида улкан ютуқларга эришишди. Шунинг учун бизни қанчалик жиддий баҳс кутиб турганини биламиз. Ўтган мавсумда улар билан 2 марта дуранг ўйнадик.
Мухлисларнинг қайтишига келадиган бўлсак, аста-секин бунга эришаётганимиздан хурсандман. Биз уларни кутяпмиз ва яна ўз мухлисларимизни «Олд Траффорд»да кўришни истаймиз», – дея Сульшернинг сўзларини келтиради клуб расмий сайти.
Маълумот учун, 9-турдан кейин «МЮ» 13 очко билан 10-ўринни, «Саутҳэмптон» эса 17 очко билан 5-поғонани эгаллаб турибди.
Алекс Фергюсон: Рэшфорд билан фахрланамиз
28.11.2020
сэр Алекс Фергюсон манкуниаликлар ҳужумчиси Маркус Рэшфордни фаол ижтимоий позицияси учун ҳурмат қилишини айтди.
«Қанча бола бепул овқатга муҳтожлигини билиб ҳайрон қоласиз. Маркус Рэшфорд ушбу муаммога бутун Англия бўйлаб эътибор берди. У қилган иш ажойиб эди ва биз ҳаммамиз у билан фахрланамиз.
Футбол уни ўзгартиргани йўқ. Спортда пул ва шон-шараф одамларни ўзгартириши мумкинлиги хавфи мавжуд. Аммо гап Рэшфорд ҳақида эмас. Бу йигит атиги 23 ёшда бўлишига қарамай, жуда яхши иш қилди», – дея шотландиялик мутахассиснинг сўзларини келтиради Sky Sports.
Маълумот учун, Рэшфорд Фергюсон қўл остида ўйнамаган. У афсонавий мураббий фаолиятини якунлаганидан 3 йил ўтиб «МЮ»да дебют қилган.
Оле: Фернандеш катта таъсир ўтказади
28.11.2020
Оле-Гуннар Сульшер яримҳимоячи Бруну Фернандешнинг «Қизил иблислар» ўйинига таъсирини юқори баҳолади ва уни манкунианликларнинг собиқ вингери Криштиану Роналду билан таққослади.
«Бруну Фернандеш «МЮ»да ўйнаган Криштиану Роналду каби ўйинга ва жамоадошларига катта таъсир ўтказади.
У келганидан бери натижаларга қаранг. Бруну энергияга ва етакчилик фазилатларига эга. У – жамоавий ўйинчи ва муваффақиятларимиз калити.
Баъзи футболчилар дам олиши керак. Лекин Брунуга «Лейпциг»га қарши сафар ўйинини ўтказиш юборишини айтмоқчи эмасман. Жамоа маданияти алоҳида шахслар билан боғлиқ эмас ва Бруну буни қайта-қайта исботламоқда», – дея норвегиялик мутахассиснинг сўзларини келтиради Daily Mail.
Роналду «МЮ»да 2003 йилдан 2009 йилгача ҳаракат қилган ҳамда 292та баҳсда 118та гол ва 69та ассистни ўз ҳисобига ёздириб қўйган. Фернандеш эса манкунианликлар сафига 2020 йил январида келиб қўшилди ва ҳозиргача 35та ўйинда гол+пас тизимида 34 очко тўплашга улгурди.
Ҳоқон Чалханўғлу «Юнайтед»да!?
28.11.2020
«Милан» яримҳимоячиси Ҳоқон Чалханўғлу катта эҳтимол билан фаолиятини Англия Премьер-лигасида давом эттиради.
Таниқли инсайдер ва журналист Кристиан Фалькнинг маълум қилишича, туркиялик яримҳимоячи ёзги трансфер ойнасида эркин агент сифатида «Манчестер Юнайтед»га ўтиши кутилмоқда. Томонлар деярли келишувга эришган ва Чалханўғлунинг «МЮ»га ўтиш эҳтимоли 90%га баҳоланмоқда. Туркиялик яримҳимоячининг миланликлар билан шартномаси 2021 йилнинг ёзида якунига етади.
Маълумот учун, 26 ёшли хавбек Италия А Серияси жорий мавсумида 8 ўйинда майдонга тушиб, ҳисобига битта ассист ёзиб қўйган.
«Олд траффорд»га рухсат берилмади
27.11.2020
Стадионларга томошабинлар киришига рухсат берилиши масаласида Англия Премьер-лигаси клублари уч тоифага тақсимланди, дея хабар бермоқда Sky Sports.
Унга кўра, 2 декабрь кунидан Премьер-лиганинг 10та клуби уй стадионига 2 минг нафаргача томошабин киритишига рухсат берилади. Қолган 10 клуб ўйинларни томошабинларсиз ўтказишда давом этади.
Ўз стадионига чекланган миқдорда мухлислар кириши рухсат этилган клублар: «Тоттенҳэм», «Челси», «Вест Ҳэм», «Кристал Пэлас», «Арсенал», «Фулҳэм», «Ливерпуль», «Эвертон», «Брайтон», «Саутҳемптон».
Стадионидаги уй ўйинларига томошабинлар киришига рухсат берилмаган клублар: «Астон Вилла», «Вулверҳэмптон», «Манчестер Юнайтед», «Манчестер Сити», «Ньюкасл Юнайтед», «Лидс Юнайтед», «Вест Бромвич», «Шеффилд Юнайтед», «Лестер Сити», «Бёрнли».
Аввалроқ, Буюк Британия ҳукумати 2 декабрь кунидан очиқ стадионда ўтадиган оммавий спорт тадбирларига чекланган миқдорда мухлислар киришига рухсат берилиши ҳақида эълон қилганди. Унга кўра, ҳудудлар коронавирус хавфи даражасидан келиб чиққан ҳолда уч тоифага бўлиниб, 4 минг нафаргача томошабинлар киришига рухсат этилиши хабар қилинганди.
Рэшфорд мукофот қўлга киритди
27.11.2020
Маркус Рэшфорд Буюк Британиянинг спорт журналистлари ассоциацияси томонидан «Спорт ижтимоий ўзгаришлар учун» номинацияси ғолиби деб топилди, деб хабар беради UtdReport.
Эслатиб ўтамиз, 23 ёшли футболчи Англиядаги 1,3 млн болани ёзги таътил пайтида бепул овқатланиши учун ваучерлар билан таъминлашга ёрдам берди. Унинг тарғиботи туфайли ҳукумат камбағал болалар ва уларнинг оилаланини қўллаб-қувватлаш учун 450 млн евродан кўпроқ маблағ сарфлади.
«Маркус Рэшфорд футболчиларнинг жамиятдаги таъсирини кўрсата олди. У футбол майдонидан ташқарида қаҳрамонга айланди», – дейди спорт журналистлари ассоциацияси раиси.
Маълумот учун, ҳужумчи бу мавсумда «МЮ» сафида барча турнирлар доирасида 14та ўйинда майдонга тушиб, 8та гол урди ва 3та голга ассистентлик қилди.
Донни ван де Бек «Ювентус»да!?
27.11.2020
Донни ван де Бек фаолиятини «Ювентус»да давом эттириши мумкин, дея хабар бермоқда Calciomercato.
Манбанинг ёзишича, Турин клуби нидерландиялик футболчини кейинчалик сотиб олиш ҳуқуқи билан ижарага олмоқчи. Шунингдек, клублар футболчиларни ўзаро алмашиш борасида ҳам келишувга эришишлари мумкин. Туринликлар сафидан «МЮ» қизиқаётган ягона футболчи – Пауло Дибала ҳисобланади.
Маълумот учун, ван де Бек мавсум бошида «МЮ» билан беш йиллик шартнома имзолаганди. «Аякс» трансфер учун инглизлардан 40 миллион евро трансфер пули олганди. Ван де Бек жорий мавсумда АПЛ доирасида 6 ўйинда майдонга тушиб, битта голга муаллифлик қилган.
Смоллинг: Бироз хафа бўлдим
23.11.2020
Крис Смоллинг «Манчестер Юнайтед»дан қай тариқа кетгани ҳақида айтиб берди.
«Бироз хафа бўлдим. Биринчидан, кетишим ҳақида олдинроқ айтишларини истагандим. Иккинчидан, мен Италияда трансферлар ойнаси очилганидан 1 кун олдин кетишим мумкин эди.
Англияда трансферлар ойнаси ёпилди. Мени жуда ёмон аҳволда қолдиришди. Қарор қабул қилишим керак эди. Рафиқам эндигина фарзанд кўрганди. Хуллас, сўнгги дақиқаларда жуда кўп нарса юз берди», – дея Смоллингнинг сўзларини келтиради Daily Mail.
Эслатиб ўтамиз, англиялик 30 ёшли футболчи «Рома» сафига октябрь ойида ўтди ва клуб билан 2023 йилгача мўлжалланган шартнома имзолади.
Погба шартномасини узайтирмоқчи эмас
23.11.2020
Поль Погба «Манчестер Юнайтед» билан шартномасини узайтирмоқчи эмас.
The Athletic’нинг ёзишича, француз «МЮ» билан амалдаги шартномаси охиригача тўп суриб, жамоани эркин агент сифатида тарк этиш ҳақида ўйламоқда. Ўз ўрнида «Манчестер Юнайтед» раҳбарияти футболчини текинга қўйиб юбормаслик учун Поль Погбани шартномаси якунланишидан аввал сотиб юбормоқчи.
Аввалроқ, «Манчестер Юнайтед» Погба билан амалдаги шартномадаги шартларидан бири бўлмиш келишувни автоматик тарзда 2022 йилнинг июнь ойига қадар узайтириш шартини фаоллаштирганди.
Маълумот учун, 27 ёшли футболчи жорий мавсумда АПЛ доирасида 7 ўйинда майдонга тушган. Клуб турнир жадвалида 8-турдан кейин 10 очко билан 14-ўринда бормоқда.