Венгер:«Юнайтед» таклиф қилганди
22.10.2020
Лондоннинг «Арсенал» клуби собиқ бош мураббийи Арсен Венгер Манчестер клубларидан таклиф тушгани ҳақида берилган саволга жавоб берди.
«Сити»дан таклиф бўлмаган, «Юнайтед» эса таклиф қилганди. Аммо бу таклиф қачон тушгани ҳақида айта олмайман. Ўшанда таклифни рад этгандим. Сабаби «Арсенал»да фаолият юритаётгандим. «Арсенал» билан ўртамизда мисли муҳаббат тарихи бор эди. Қизил ва оқ ранг – ҳаётим бўлган. Лондон клубига келган илк кунимдаёқ бу жамоага бўлган ўзгача ҳиссиётни туйганман», - дейди франциялик мутахассис.
Эслатиб ўтамиз, Венгер 2019 йилдан буён ФИФА қошидаги футболни глобал ривожлантириш бўлимида фаолият юритмоқда. У 1996 йилдан 2018 йилга қадар «Арсенал» клубини бошқарган. Венгер қўл остида «канонирлар» 17та совринга эга чиққан.
Оле: Бу гуруҳ босқичининг бошланиши
22.10.2020
Оле-Гуннар Сульшер ЕЧЛнинг 1-туридан ўрин олган «ПСЖ»га (2:1) қарши ўйиндан сўнг ўз фикрлари билан ўртоқлашди.
«Бу ердаги сўнгги ғалабага нисбатан бошқача туйғу бор. Ажойиб жамоани мағлуб этган бўлсак ҳам, бу – гуруҳ босқичининг бошланиши. Ўтган сафар плей-офф баҳси эди ва эйфория бўлганди. Бу сафар мухлисларсиз ўтди, аммо ажойиб ўйнадик ва ғалаба қозонишга лойиқ эдик.
Неймар ва Мбаппеси бор жамоага қарши яхши ҳимояланишингиз, дарвозабон эса сейвларни амалга ошириши керак. Аксель Туанзебе – топ-ҳимоячи. Унинг 10 ой ичидаги биринчи ўйини савиясидан далолат беради.
Бруну кетма-кет икки пенальтидан фойдалана олмади, аммо у зарба беришда давом этади. У характер намойиш этди. Биламизки, гуруҳдан чиқиш учун 10 очко керак. Шунинг учун келаси ҳафтадаги ўйин жуда муҳим бўлади», – дея Сульшернинг сўзларини келтиради BBC.
Рэшфорд: Кўрсатмаларига ишонишимиз шарт
22.10.2020
Маркус Рэшфорд ЕЧЛ 1-тури доирасидаги «ПСЖ» устидан эришилган ғалабадан (2:1) кейин фикрлари билан ўртоқлашди.
«Ўйлайманки, биз яхши ўйин кўрсатдик, аммо ҳали янада ўсишимиз керак. Энг аввало мураббийимизнинг кўрсатмаларига ишонишимиз шарт. Ўйин давомида баъзи вазиятларда қийин бўлди, аммо умуман олганда ўзимизга ишониб тўп сурдик. Учрашув якунига яқин рақиб босим қилишга интилди, аммо биз юқори босимга ҳам дош бера олдик. «ПСЖ» сингари юқори техникага эга футболчиларга эга жамоага қарши баъзида чуқур ҳимоядан тўп суришга тўғри келади.
Парижда бу сафар ҳам гол уриш жуда ёқимли, аммо энг муҳими жамоамиз ғалабасидир. Гуруҳда ўрнимизни кучайтирдик, аммо ҳали бор йўғи 1-тур ортда қолди. «ПСЖ»га қарши ўйинда кўрсатган совуққонлик ва ўзимизга бўлган ишончни сақлаб қолишимиз шарт», - дейди «МЮ» форварди УЕФА расмий сайтига берган интервьюсида.
Эслатиб ўтамиз, Маркус Рэшфорднинг 87-дақиқада киритган голи Парижда «Юнайтед»га «ПСЖ» устидан 2:1 ҳисобидаги ғалабани келтирди.
Оле айбни ўз бўйнига олди
19.10.2020
Оле-Гуннар Сульшер жамоанинг мавсумни қониқарсиз бошлагани учун айбни ўз бўйнига олди.
«Ҳозирги натижаларимиз учун барча айб менга қўйилиши керак, чунки бош мураббий сифатида мен жавобгарман, бошқалар эмас. Клубдаги футболчи ва ходимлар «Манчестер Юнайтед» аъзоси сифатида ўз масъулиятини чуқур англаб турибди. Улар бундай ҳолатларга тайёр туриш лозимлигини яхши англашади.
Бундай ҳолат ҳар биримиз учун навбатдаги жиддий синов. Футболчиларга қай даража ишонишимизни айтиш учун ҳам қулай имконият. «Ньюкасл» билан ўйинга фақат ғалаба учун борамиз. Қўл остимдаги ўйинчилар билан юқори ўринлар учун кураша олишимизга ишонаман», - дея «МЮ» бош мураббийи сўзларини келтирмоқда Goal.
«Манчестер Юнайтед» АПЛдаги 3 ўйиндан кейин турнир жадвалида 3 очко билан 16-ўринни эгаллаб турибди.
Оле: «Юнайтед»да ютқазишга одатланмаган
17.10.2020
Оле-Гуннар Сульшер яримҳимоячи Бруну Фернандешнинг жамоада зиддиятлар борлиги ҳақидаги миш-мишларни рад этганига изоҳ берди.
«Манчестер Юнайтед»га хуш келибсиз. Икки ўйинда ютқазганингизда доим шундай бўлади. Бу –шундай ҳолатлардан бири: буни иложи борича тезроқ енгиб ўтиш керак.
Баъзилар бизнинг жамоани бузмоқчи. Бруну бир неча кун олдин «Биз бирмиз ва бирлашишимиз керак», деб жуда яхши гапирди. Ташқаридаги одамлар фикрини тингламаслигимиз керак.
Бруну «МЮ»га келганидан бери Премьер-лигада фақат 2 ўйинда мағлуб бўлди. Бу серияга ўхшаса-да, у «Юнайтед»да ютқазишга одатланмаган.
Ташқаридагилар келишмовчилик яратишга уринишда давом этишади, аммо бу содир бўлмайди. Чунки жамоа бирликни сақлаб қолишни истайди», – дея Сульшернинг сўзларини келтиради Sky Sports.
Испан грандлари Фернандешга қизиқмоқда
17.10.2020
Бруну Фернандеш фаолиятини Испания чемпионатида давом эттириши мумкин, деб хабар беради The Sun.
Манбага кўра, португалиялик 26 ёшли футболчига «Барселона» ва «Реал» қизиқмоқда.
Аввалроқ ОАВда Фернандешнинг манкунианликлар бош мураббийи Оле-Гуннар Сульшер билан муносабати яхши эмаслиги ёзилганди. «Реал» ва «Барселона» вазиятни кузатиб бормоқда ва хавбек учун курашга қўшилишга тайёр.
Эслатиб ўтамиз, яримҳимоячи сентябрь ойида «МЮ» мухлислари томонидан жамоанинг ўтган мавсумдаги энг яхши ўйинчиси деб топилди.
Фернандеш ўтган мавсумда АПЛда 22та ўйинда майдонга тушиб, 12та гол урди ва 8та голга ассистентлик қилди.
Серхио Ромеро МЛСга кетмоқчи
15.10.2020
Серхио Ромеро жамоадан кетиш вариантларини кўриб чиқмоқда. Бу ҳақда The Sun нашри маълум қилди.
Аргентиналик посбон Европада трансфер ойнаси ёпилгани учун МЛС клубларидан бўладиган таклифларни кўриб чиқмоқчи. Бундан ташқари у МЮ раҳбариятидан ўзини эркин агент сифатида қўйиб юборишни сўрамоқда.
Ўтган ёзги трансферлар даврида Ромерога «Челси», «Валенсия» ва «Эвертон» клубларидан таклифлар бўлган эди. Бироқ МЮ ўзининг молиявий талабида жиддий туриб олгани учун якунда Серхио сотилмай қолди.
Уэйн Руни бош мураббий!?
15.10.2020
Англиянинг «Дерби Каунти» клуби сафида ўйновчи-мураббий сифатида тўп сураётган Уэйн Руни тез орада бош мураббий сифатида тайинланиши мумкин, дея ёзмоқда The Sun.
Манбанинг ёзишича, «Дерби Каунти» клуби раҳбарияти январь ойидан буён ўйновчи-мураббий сифатида фаолият юритаётган Уэйн Рунига жамоани ишониб топширмоқчи. Раҳбарият нидерландиялик мураббий Филипп Кокунинг ишидан қониқмаяпти ва яқин орада истеъфога чиқармоқчи. Қайд этилишича, Коку кейинги ҳафтадаёқ жамоани тарк этиши, унинг ўрнига эса 35 ёшли Руни бош мураббий сифатида тайинланиши мумкин.
Маълумот учун, «Дерби» Чемпионшип 2020/21 йилги мавсумининг 4 ўйинида 3та мағлубиятни тан олишга мажбур бўлиб, 24 жамоа орасида 20-ўринда бормоқда.
Мата 20 миллион евролик таклифни рад этди
14.10.2020
Хуан Мата Осиёдан тушган ажойиб таклифни рад этди, дея хабар бермоқда Sport.es.
Манбанинг ёзишича, 32 ёшли испаниялик футболчини Саудия Арабистонининг «Ан-Наср» клуби ўз сафига қўшиб олишни истаган. Матага дастлаб йиллик 16 миллион еврога тенг шартнома таклиф қилинган, аммо у таклифни рад этган. Саудияликлар иккинчи уринишда таклифни йиллик 20 миллион еврогача кўтарган. Қизиғи, испаниялик футболчи «МЮ»да қолишини билдириб, ажойиб таклифга ҳам рад жавоб берган.
Қайд этилишича, Мата жорий мавсумда ҳам «Манчестер Юнайтед»га ёрдами тегишига ишонмоқда. Испаниялик яримҳимоячи клубнинг чемпионат ва Чемпионлар лигасида муваффақиятли иштирок этишига умид боғлаяпти.
Эслатиб ўтамиз, Мата 2014 йилдан буён «Манчестер Юнайтед» сафида ҳаракат қилмоқда. Жорий мавсумда Хуан клуби сафида Англия лига кубоги доирасида иккита ўйин ўтказиб, 1та голга муаллифлик қилган.
Магуайр сардорлик боғичидан маҳрум қилиниши мумкин
13.10.2020
«Манчестер Юнайтед» сардори Харри Магуайр сардорлик боғичидан маҳрум қилиниши мумкин.
Эквадорлик ҳимоячи Антонио Валенсия инглиз клубини тарк этганидан сўнг, жамоа устози Уле Гуннар Сульшер лидерлик вазифасини 2019 йил ёзида манкунияликларнинг энг қиммат трансферига айланган Магуайрга топширган эди.
Мавсумлар оралиғида Грецияда юз берган кўнгилсиз воқеа, клубнинг АПЛдаги омадсиз старти ва «Тоттенхэм»га қарши ўйинда Антони Марсьяль билан боғлиқ вазиятдан норози бўлган клуб мухлислари Магуайрни сардорлик боғичидан маҳрум қилишни талаб этмоқда.
Британия матбуотига кўра, дарвозабон Давид Де Хеа ёки ярим ҳимоячи Бруну Фернандеш мавсум сўнггигача сардор сифатига тайинланиши мумкин.