«Юнайтед» нишонида тўрт супер футболчи
03.10.2020
Трансфер бозория ёпилишига бир неча кун қолган паллада Сульшер тўртта зўр футболчидан бирини танлашига тўғри келади.
Манчестерликлар орзусидаги футболчи Жейдон Санчони қўлга кирита олмаганидан кейин бошқа ҳужумкор ўйинчиларга эътибор қаратишга мажбур бўлмоқда.
Айни пайтда скаутлар Сульшерга Эдинсон Кавани, Лука Йович, Усмон Дембеле ва Исмоил Сарр хизматларини таклиф қилмоқда. Бу футболчилардан фақат Лука Йович МЮ таркибига кўчиб ўтмоқчи. Дембеле Каталониядан кетиш нияти йўқлигини маълум қилди. Саррнинг эса харидорлари кўп ва танлов имкони бор. Кавани ёши ўтиб қолган бўлса-да, катта маош талаб қилмоқда.
«Манчестер Юнайтед» айни пайтда уларнинг барчаси билан музокарани давом эттирмоқда.
Жеймс жамоани тарк этиши мумкин
03.10.2020
«Манчестер Юнайтед» яримҳимоячиси Дэниел Жеймс трансферлар ойнаси якунигача жамоани тарк этиши мумкин.
Football Insider'нинг ёзишича, уэльслик 22 ёшли футболчига «Лидс» қизиқмоқда. «Товуслар» яримҳимоячининг трансфери бўйича манкунианликларга 25 млн фунт стерлинг (27,5 млн евро) таклиф қилишган. Аввалроқ «қизил иблислар» Дэниелни ижарага беришдан бош тортишганди.
Жеймс 2019 йили, «Суонси»да ўйнаб юрганида «Лидс»га ўтиши мумкин эди, аммо томонлар молиявий масалаларда келиша олишмаган.
Жеймс ўтган мавсумда АПЛда 33та ўйинда майдонга тушиб, 3та гол ва 6та ассистни ўз ҳисобига ёздириб қўйган.
«МЮ» Усмон билан музокара олиб бормаган
03.10.2020
«Барселона» техник котиби Рамон Планьес клуб 23 ёшли яримҳимоячи Усмон Дембеленинг трансфери борасида «Манчестер Юнайтед» билан музокара олиб бормаётганини таслиқлади.
«МЮ» билан музокаралар олиб борилмаган. Буни тасдиқлашим мумкин. Дембеле – «Барселона» футболчиси. Биз унинг имкониятларини биламиз ва жамоада юз берган ўзгаришлар туфайли у ўзини кўрсата олади, деган умиддамиз.
«Барселона» ўзининг барча имкониятларидан фойдаланмоқчи. Усмон биз билан яхши мавсумни ўтказишига ишонамиз», – дея Планьеснинг сўзларини келтиради Football Espana.
Дембеле «Барселона»га 2017 йил ёзида 138 млн евро эвазига «Боруссия» Дортмунддан ўтган. Унинг клуб билан амалдаги шартномаси 2022 йилгача мўлжалланган.
«Юнайтед» муаммоларга дуч келмоқда
01.10.2020
Мавсумнинг дастлабки учрашувлардаёқ ёрқин ўйин кўрсата олмаётган «Манчестер Юнайтед» катта муаммоларга дуч келмоқда. Нотўғри ташкил қилинган трансфер сиёсати туфайли жамоа ёзги трансферлар бозори вақтида ўзи орзу қилган ҳужумкор футболчини олишга улгурмаслиги мумкин.
Манчестерликлар асосий нишони бўлган Жейдон Санчони олиш учун жуда кўп вақт йўқотди ва барибир мақсадига ета олмади. Яқинда Сульшер Санчонинг ўрнига «Барселона»даги Усмон Дембелени ўйнатишга рози бўлган.
Гарчи «Барселона» франциялик футболчини «Манчестер Юнайтед»га трансфер қилишга розилик берган бўлса-да, Дембеленинг ўзи Каталонияни тарк этишга рози бўлмаяпти. Жароҳатлари туфайли ўтган мавсумда ўзини кўрсата олмаган футболчи янги бош мураббий қўл остида асосий таркибга қайтмоқчи.
Шак Сварт: Умуман тушунмадим
01.10.2020
Донни ван де Бек вакиллари футболчига тақдим этилаётган ўйин вақтининг камлигидан норозилик билирмоқда.
— Мен «Брайтон» каби жамоага қарши ўйинда захирадан ўйинга қўшилган Донни ван де Бекнинг жамоадаги ролини умуман тушунмадим. Доннидек ўйинчи учрашув якунланишига тўрт дақиқа қолганида ўйинга туширилишига ишонгим келмайди. Лекин шунда ҳам у тўрт дақиқа ичида учта фойдали ишни амалга ошира олди. Ҳатто жамоага ғалаба келтирган пенальти белгиланишида ҳам Доннининг иштироки бор, — деди Донни ван де Бекнинг агенти Шак Сварт.
Донни ван де Бек АПЛда иккита учрашувни ҳам захирадан бошлади ва битта гол уришга муваффақ бўлди.
30.09.2020
«Юнайтед» дортмунднинг «Боруссия» жамоасига ярим ҳимоячи Жейдон Санчо трансфери бўйича янги таклифни тайёрламоқда, деб маълумот берди Daily Mail нашри.
Манбанинг таъкидлашича, манкунианликлар немис клубига 72 млн евро ва 100 млн еврогача етиши мумкин бўлган бонусларни таклиф қилмоқчи. «Манчестер Юнайтед» клуби трансфер мавсумининг охирги ҳафтасида «Боруссия» ушбу таклифни қабул қилишига умид қилмоқда. Эслатиб ўтамиз, немислар бошида «қизил иблислар» дан 120 млн евро талаб қилган эди.
Санчо — «Манчестер Сити» клуби тарбияланувчиси. 2017 йилнинг ёзида дортмунднинг «Боруссия» си Жейдонни «шаҳарликлар» дан 7,84 млн еврога сотиб олган. Жорий мавсум 20 ёшли англиялик футболчи 44 та ўйинда 20 та гол ва 20 та голли узатмани амалга оширган. Футболчининг клуб билан амалдаги шартномаси 2023 йилнинг ёзига қадар амал қилади.
Рой Кин: Сульшер совринлар ютиши шарт
29.09.2020
«Манчестер Юнайтед»нинг собиқ сардори Рой Кин «қизил иблислар»нинг 2020/21 йилги мавсумдаги мақсадлари ҳақида гапирди.
«Бу мавсумда Сульшернинг вазифалари бошқача бўлади. Ўйлашимча, ўтган мавсумдаги мақсад кучли тўртликка кириш эди, аммо бу йил талаблар юқори. «МЮ» «Ливерпуль» ва «Манчестер Сити»га яқинлашиши керак.
Сульшер совринлар ютиши шарт. Унинг «МЮ»даги асал ойи тугади. Босим янада кучаяди», – дея Киннинг сўзларини келтиради Monday night.
Маълумот ўрнида, «Манчестер Юнайтед» ўтган мавсумда 38та ўйинда 66 очко тўплаб, 3-ўринни қўлга киритди.
«Лидс»га Дэниэль Жеймс керак
29.09.2020
Англия премьер-лигаси дебютанти «Лидс» бош мураббийи Марсело Бьелса «Манчестер Юнайтед» даги ҳамкасби Сульшер билан бир неча марта боғланиб, 22 ёшли ярим ҳимоячи Дэниэль Жеймсни беришни сўрамоқда.
«Лидс» уэльслик футболчини сотиб олиш ҳуқуқисиз бир йилга ижарага олмоқчи.
Сульшер бу трансферга қарши эмас. Лекин у Жеймсни «Боруссия» дан Жейдон Санчо олиб келинсагина қўйиб юборишини маълум қилди.
Марсело Бьелса, Жеймсни қўлга кирита олмаса, «Норвич» вакили Тодд Кантуэллни таклиф қилишни режалаштирмоқда.
«Юнайтед»га Н'Голо Канте керак
28.09.2020
«Манчестер Юнайтед» Н'Голо Кантени ўз сафига қўшиб олишни истамоқда, дея ёзади Mirror.
Манбанинг ёзишича, манчестерликлар бош мураббийи Оле-Гуннар Сульшер франциялик яримҳимоячига жамоанинг майдон марказидаги муаммоларига ечим сифатида қарамоқда. «МЮ» 29 ёшли футболчининг трансфери масаласида Лондон клубига таклиф жўнатиб, ўйинчининг вакиллари билан ҳам учрашишга улгурган.
Аввалроқ, Кантега Италиянинг «Интер» клуби ҳам қизиқиш билдирган ва Н'Голо учун Эриксен ва Брозовични алмашишга тайёрлиги ҳақида хабар берилганди.
Маълумот учун, Кантенинг «Челси» билан амалдаги шартномаси 2023 йилга қадар имзоланган бўлиб, Transfermarkt портали футболчи трансфер қийматини 80 миллион еврога баҳолаган.
Моуриньо Сульшерга жавоб қайтарди
28.09.2020
«Тоттенҳэм» бош мураббийи Жозе Моуриньо «МЮ» бош мураббийи Оле-Гуннар Сульшернинг сўзларига жавоб қайтарди.
Португалиялик мутахассис «шпорлар»нинг Европа Лигаси саралаши доирасида «Шкендиа-79»га (3:1) қарши ўйинидан олдин ҳакамларга «Тоттенҳэм» дарвозаси 5 сантиметрга паст эканлигини исботлаганди.
«МЮ» устози Сульшер эса АПЛнинг 3-туридан ўрин олган «Брайтон» (3:2) билан ўйиндан сўнг «Яхшиямки, Жозе дарвозани ўлчаш учун бу ерда эмасди», дея ҳазиллашди. Чунки «Брайтон» ўйин давомида 5 бор манкунианликлар дарвозаси устуни ва тўсинини нишонга олди.
«Фикримча, Оле бу даражада омади келганлигидан ҳайратда қолган ва хурсандлигидан ҳазиллашишга қарор қилган. Мен унинг учун дарвоза катталиги муҳим эмаслигини тушунаман. Унга жарима майдончасининг катталиги муҳим.
У ҳеч қачон жарима майдончасини 1 метрга ҳам қисқартиришга рози бўлмайди. Ўйлашимча, у жарима чизиғи яна 4 метрга сурилишини хоҳлаган бўларди», – дея Моуриньонинг сўзларини келтиради ESPN.
Жозе бу гаплари билан «МЮ»нинг кўп пенальти тепишига киноя қилди.