Манчини «қизил иблислар» таклифини рад этди
24.11.2021
«Bild» нашри журналисти Кристиан Фалькнинг ёзишича, манкунианлар Италия миллий жамоаси бош мураббийи Роберто Манчини билан боғланган.
Маълум бўлишича, «Манчестер Сити» собиқ устози Италия миллий жамоаси билан ЖЧ-2022 йўлланмасини қўлга киритиши шарт эканини айтиб, «қизил иблислар» таклифини рад этган.
Бунгача, «Манчестер Юнайтед» «Реал» собиқ бош мураббийи Зинедин Зидан вариантидан ҳам воз кечгани маълум бўлган.
Аввалроқ, клубнинг Почеттино билан музокара ўтказаётгани ҳақидаги хабарлар ёлғон экани борасида хабар берилган эди.
Кэррик: Асосийси – натижа
23.11.2021
«Манчестер Юнайтед»нинг вақтинчалик бош мураббийи Майкл Кэррик ЕЧЛ 4-туридан ўрин олган «Вильярреал» билан ўйин олдидан ўз фикрларини билдирди.
«Бу – жуда яхши, уюшқоқ, мураббийини тушунадиган жамоа. Шанба кунги ўйин бўлмайди. Бутунлай бошқача баҳс бўлади.
«Вильярреал»да юқори тезликка эга, бўш ҳудудларга қандай киришни биладиган яхши техник футболчилар бор. Бу – юқори сифатларга эга мувозанатли жамоа. Уларга ҳурмат билан муносабатда бўламиз.
Баҳсга ғалаба қозониш мақсади билан тушамиз. Мухлислар учун асосийси – натижа.
Ҳозир клубдаги барча учун ҳиссиётли давр. Оле билан 3 йил ишладим, уни анчадан бери биламан. Унинг ишидан айрилганини кўриш қийин эди. У билан фикрларимиз ўхшаш, шунинг учун ҳам бирга ишладик.
Диққатни жамлаш керак. Бу клубда ҳар қандай вазифада ишлаш – бу катта имтиёз. Ўзгаришларга вақт йўқ, лекин мен тайёрман. Атрофимда ажойиб инсонлар, ажойиб футболчилар бор.
Фақат «Вильярреал» билан ўйин ҳақида ўйлайман ва кейин нима бўлиши ҳақида бош қотирмайман. Клуб менга муҳтож экан, у учун боримни бераман», – дея Кэррикнинг сўзларини келтиради Manchester Evening News.
«Вильярреал» – «МЮ» баҳси бугун, 23 ноябрь куни бўлиб ўтади. 4-турдан сўнг иккала жамоада ҳам 7тадан очко мавжуд. «Қизил иблислар» ўзаро ўйин натижасига кўра пешқадам бўлиб турибди.
«Юнайтед» Сульшерни истеъфога чиқарди
21.11.2021
«Манчестер Юнайтед» бош мураббий Оле-Гуннар Сульшерни истеъфога чиқарганини эълон қилди.
48 ёшли мутахассис жамоани 2018 йилдан бери бошқараётганди. Унинг қўл остида жамоа бирорта совринни қўлга киритмади. Манкунианликлар норвегиялик мураббий бошқарувида ўтган мавсумда Европа Лигаси финалига чиқиб, «Вильярреал»га ютқазиб қўйганди.
ОАВ'нинг ёзишича, «Юнайтед» Сульшерга 7,5 млн евро товон пули тўлайди.
«МЮ» бу мавсумда АПЛда 12-турдан сўнг 17 очко билан 7-ўринни эгаллаб турибди. Жамоа сўнгги 7 ўйиннинг 5тасида мағлубиятга учради.
Дин яна бошқа клубга йўл олади
17.11.2021
Дин Хендерсон яна ижара асосида бошқа клубга йўл олади. Бу ҳақда «The Sun» нашри хабар бермоқда.
Манбанинг маълум қилишича, англиялик посбон қишки трансфер вақтида «қизил ибилислар"ни тарк этади. Хендерсон рақобатда Де Хеага ютқазиб қўйди. МЮ кейинги бир ярим мавсумда захира дарвозабонидан фойдаланмоқчи эмас.
Аввалқро, Дин хизматига «Ньюкасл» қизиқиш билдираётгани ҳақида хабарлар тарқалган эди. Жорий мавсум дарвозабон АПЛ доирасида бирорта ўйинга майдонга тушмади. Унинг манкунианликлар билан амалдаги шартномаси 2025 йилнинг ёзига қадар мўлжалланган.
«Юнайтед» Лингардни сотиб юборишга қарор қилди
17.11.2021
The Sun нашрининг хабар тарқатишича, «Манчестер Юнайтед» қишки трансферлар вақтида Жесси Лингардни сотиб юборишга қарор қилди.
Англиялик ярим ҳимоячи келажакда етарли ўйин амалиётига эга бўлмаслигини ҳис қилган ҳолда, клуб билан янги битим тузмади.
Манбанинг хабарига кўра, манчестерликлар уни 10 миллион еврога қўйиб юборади. 28 ёшли футболчига «Вест Хэм» жиддий қизиқиш билдирмоқда. Қолаверса, «Ньюкасл» ҳам Лингардни ўз сафига қўшиб олишни истаяпти.
Лингард жорий мавсумда премьер-лигада саккизта учрашувда майдонга тушиб, иккита гол урди ва битта ассист муаллифи бўлди.
MEN: «МЮ» Сульшерни истеъфога чиқариши кутилмоқда
17.11.2021
Manchester Evening News нашрининг маълум қилишича, «Манчестер Юнайтед» раҳбарияти тез орада бош мураббий Уле-Гуннар Сульшерни истеъфога чиқариши кутилмоқда.
Норвегиялик мутахассис ўрнига келиши мумкин бўлган номзодлар орасида Зинедин Зидан ҳам бор. Франциялик мутахассис «Реал»ни тарк этганидан бери ишсиз юрибди.
«Манчестер Юнайтед» етакчиси Криштиану Роналду ҳам Зиданнинг келишини истаяпти. Португалиялик ҳужумчи «Реал»да ўйнаган даврида франциялик мураббий қўл остида муваффақиятли тўп сурган. Улар биргаликда кетма-кет уч марта Чемпионлар лигасида зафар қучган.
Роналду жорий мавсумда Англия премьер-лигасида саккизта учрашувда қатнашиб, рақиблар дарвозасига тўртта гол урди.
Рио: Мураббий клуб ичини тўлиқ бошқариши керак
17.11.2021
Рио Фердинанд жамоага қандай мураббий керак эканини айтди.
«Мураббий янги жамоани қабул қилиб олганидан сўнг нега айнан у танланганини дарҳол кўрсатишига тўғри келади. Бу борада Контени намуна сифатида кўрсатса бўлади. У янги жамоага келганида «Ким эканлигимни яхши биласиз, айтганим бажарилмаса, кетишларинг мумкин», дейди. Фикримча, айнан мана шундай ёндашув ҳамда менталитет зўр мураббийларни яхши мураббийлардан фарқлайди. Мураббий жамоага келганидан кейин клуб ичини тўлиқ бошқариши керак.
Мен Эрик тен Ҳаагни яхши билмайман, аммо у «Аякс»да худди мана шундай ишлаётганини биламан. Агар, у «Манчестер Юнайтед»га келадиган бўлса, худди «Аякс»дагидек ишлаши талаб этилади», - дейди Фердинанд.
Аввалроқ, Сульшер ўрнига «МЮ» бош мураббийлиги учун Брендан Рожерс ва Эрик тен Ҳааг номзоди кўриб чиқилаётгани ҳақида хабар берилганди.
«МЮ» Зиданни кўндирмоқчи
15.11.2021
«Манчестер Юнайтед» клуби раҳбарияти бош мураббийни ўзгартириш устида иш олиб бормоқда.
The Times нашрининг ёзишича, клуб бош мураббий сифатида Оле-Гуннар Сульшернинг ўрнига Зинедин Зиданни тайинлашни истамоқда. Раҳбарият жамоада Криштиану Роналду ва Рафаэль Вараннинг борлиги Зиданни бу таклифга кўнишида катта аҳамиятга эга, деб ҳисобламоқда.
Аввалроқ, Зиданнинг ҳали мураббийлик фаолиятига қайтмоқчи эмаслиги ҳақида хабар берилганди. «МЮ» раҳбарияти эса франциялик мутахассисни Манчестерга келишга кўндирмоқчи.
Эслатиб ўтамиз, Зидан «Реал Мадрид»ни иккинчи бор тарк этганидан сўнг, айни дамда ишсиз бўлиб турибди. Баъзи манбаларнинг хабарига кўра, «қизил иблислар» бош мураббийлигига яна бир асосий даъвогар сифатида «Лестер» устози Брендан Рожерс айтилмоқда.
«Реал» Поль Погбага яна қизиқиш билдирмоқда
13.11.2021
Мадриднинг «Реал» клуби «Манчестер Юнайтед» яримҳимоячиси Поль Погбага яна қизиқиш билдирмоқда.
«Marca» нашрининг ёзишича, яқин ойлар ичида мадридликлар 28 ёшли франциялик футболчининг атрофидаги вазиятни кузатиб бормоқчи. Агар Погба «МЮ» билан мавсум якунида ўз ниҳоясига етувчи шартномасини узайтирмаса, «Реал» уни текинга қўлга киритади.
Шунга қарамай, бу кўчиш клуб учун арзонга тушмайди. Сабаби, Поль ўзининг янги клубида «МЮ»дагига қараганда кўпроқ маош олишни хоҳламоқда. Айни дамда у Манчестер клубида йилига 15,8 миллион евро миқдорида маош олади. «Реал»да эса у камида 20 миллион олишни мақсад қилган. Мадридликлар ҳам бу суммани тўлашга тайёр.
Жорий мавсумда франциялик футболчи «МЮ» сафида барча мусобақаларда 13та ўйинда майдонга тушиб, 7та ассист амалга оширишга муваффақ бўлган.
Рожерс фаолиятини «Юнайтед»да давом эттириши мумкин
13.11.2021
«Лестер» клуби устози Брендан Рожерс фаолиятини «Манчестер Юнайтед»да давом эттириши мумкин.
The Sun хабарига кўра, ирландиялик мутахассис Оле-Гуннар Сульшернинг «Манчестер Юнайтед»даги ўрнини эгаллаши мумкин бўлган асосий даъвогарга айланган.
Қайд этилишича, манчестерликлар бунгача Зинедин Зидан ва Эрик тен Ҳаг номзодига ҳам қизиққан, аммо Зидан ҳали мураббийликка қайтишни истамаган бўлса, тен Ҳаг «Аякс»дан кетмоқчи эмас.
Аввалроқ, Рожерс «Лестер»даги фаолиятини давом эттиришни истаётгани ҳақида хабар берилганди.
Маълумот учун, «Манчестер Юнайтед» АПЛ 11-туридан кейин 17 очко билан 6-поғонани эгаллаб турибди.