Серхио Ромеро фаолиятини Испанияда давом эттиради
21.09.2020
«Юнайтед»нинг захира дарвозабони Серхио Ромеро фаолиятини Испанияда давом эттиришга яқин турибди.
Маълумотларга қараганда, 33 ёшли аргентиналик дарвозабонни «Валенсия» ўз сафига чорламоқда. Испанияликлар манчестерликларнинг асосий таркибига киришдан бутунлай умидини узган дарвозабон учун 6 миллион евро тўлашга тайёр.
«Манчестер Юнайтед»ҳам Ромерони сотиб юборишдан манфаатдор. Чунки айни пайтда жамоа таркибида яна икки нафар кучли голкипер — Давид де Хеа ва Дин Хендерсон бор.
Ромеро 2015 йили «Сампдория»дан олиб келинган эди. Асосий таркибга кириш учун Давид де Хеа билан рақобатлаша олмаган дарвозабон асосан турли миқёсдаги кубок ўйинларида майдонга тушди.
Люк Шоу: Таркибимизни кучайтиришимиз шарт
20.09.2020
Люк Шоу АПЛ 2-тури доирасида «Кристал Пэлас»га учралган мағлубиятдан (1:3) кейин ўз фикрини билдирди.
«Жамоамиз сафи яхши савиядаги футболчилардан иборат бўлса-да, ўйлайманки таркибимизни яна ҳам кучайтиришимиз шарт. Бу жамоага яхши туртки бўларди.
Чемпионатдаги барча рақобатчиларимиз ўз сафига кучли футболчиларни жалб этаётганлигини кўраяпмиз. Биз ҳам улардан қолишмаслик учун янги ўйинчиларни жалб қилишимиз керак», - дейди Люк Шоу мағлубиятли ўйиндан кейин TV2 телеканалига.
Маълумот учун, «Юнайтед» ушбу ёзда ҳозирча фақат бир нафар трансферни амалга ошириб, Донни ван де Бекни «Аякс»дан таклиф этди. Жейдон Санчо масаласида «Боруссия» билан музокара тўхтаб қолган бўлса, клуб қизиқиш билдирган Гарет Бэйл ва Серхио Регилон «Тоттенҳэм»га ўтишди.
Жесси Лингард «Тоттенҳэм»га ўтади!?
20.09.2020
Жесси Лингард фаолиятини «Тоттенҳэм»да давом эттириши мумкин, дея ёзади Daily Star.
Манба хабарига кўра, «Тоттенҳэм» бош мураббийи Жозе Моуриньо собиқ шогирдини Лондон клубига чақирмоқчи. Португалиялик мураббий «МЮ» захира ўриндиғида қолаётган англиялик футболчини «Тоттенҳэм»га қўйиб юборишига ишонмоқда.
Аввалроқ, «Юнайтед» Лингардни 30 миллион евро трансфер пули эвазига қўйиб юборишга тайёр эканлиги ҳақида хабар қилинган эди.
Маълумот учун, 27 ёшли Жесси ўтган мавсумда АПЛ баҳсларида 22 ўйинда битта гол ва битта ассистга муаллифлик қилган.
ФИФА конгресси регламентга ўзгартириш киритди
19.09.2020
ФИФА конгресси футболчиларнинг миллий жамоадаги иштирокига боғлиқ регламентга ўзгартириш киритди, дея ёзади BBC.
Унга кўра, ФИФА ўз миллий жамоасида фақат битта ўйин ўтказган, у ҳам ФИФА доирасида катта мусобақалардаги ўйин бўлмаса, футболчининг мамлакат миллий жамоасини ўзгартиришга рухсат берадиган қоидани жорий қилди.
Эслатиб ўтамиз, бунгача халқаро спорт арбитраж суди (CAS) 2018 йилда «Барселона» тарбияланувчиси саналмиш Мунир Эль-Ҳаддадининг Марокаш миллий жамоаси сафида ЖЧ-2018 турнирида иштирок этишига рухсат бермаган эди.
CAS’нинг бундай қарорига асли марокашлик бўлган ўйинчининг Испания миллий жамоаси сафида Евро-2016 турнирида битта баҳсда майдонга тушгани сабаб бўлганди.
«МЮ» Алекс Теллес билан келишувга эришди
19.09.2020
«Порту»нинг чап қанот ҳимоячиси Алекс Теллес «Манчестер Юнайтед»га ўтиши мумкин.
«МЮ» 27 ёшли бразилиялик билан 5 йиллик шартнома тузиш борасида келишувга эришди, деб ёзади RMC Sport.
Энди манкунианликлар «Порту» билан трансфер нархини келишишлари керак. Аввалроқ португалияликлар ҳимоячи учун 20 млн евро сўрашгани хабар қилинганди.
Шунингдек, Теллесга «ПСЖ» ҳам қизиқмоқда.
Алекс «Порту»да 2016 йилдан бери ўйнайди. У ўтган мавсумда Португалия чемпионатида 31та ўйинда майдонга тушиб, 11та тўп киритган.
«Юнайтед» Жуан Феликсга қизиқмоқда
17.09.2020
«Манчестер Юнайтед» раҳбарияти «Атлетико» нинг энг қиммат ҳужумчиси Жуан Феликсни ўз сафига қўшиб олишни истамоқда.
Айни пайтда мадридликлар 126 миллион еврога сотиб олинган ёш ҳужумчининг ўйинидан умуман қониқмаяпти ва имкон борида, Феликснинг нархи тушиб кетмасидан уни сотиб юбориши кутилмоқда.
Мутахассисларнинг таъкидлашича, Португалиянинг энг истеъдодли ҳужумчиларидан бўлган Феликс жамоа бош мураббийи Диего Симеоненинг тактикасига тушмаяпти.
«Манчестер Юнайтед» хўжайинлари 20 ёшли ҳужумчини олиш учун 100 миллион евро тикишга тайёр. Бош мураббий Сульшер жамоа етакчиларидан бири Бруну Фернандеш ёрдамида Феликснинг ўйини очилиб кетишига ишонмоқда.
«МЮ» Алекс Теллесни сотиб олишга ҳаракат қилади
17.09.2020
«Манчестер Юнайтед» трансфер бозори ёпилгунига қадар «Порту» ҳимоячиси Алекс Теллесни сотиб олишга ҳаракат қиладиган бўлди.
Португалияликлар 27 ёшли бразилиялик футболчини аввалига 30 миллион фунтга баҳолаган эди. Бу нарх «Манчестер Юнайтед» каби бошқа харидорларни қочирди. Энди «Порту» раҳбарияти Теллесни 18,5 миллион фунтга қўйиб юборишга розилигини билдирди.
Чунки, Теллеснинг ўзи келаси йили якунланадиган шартномани имзолашдан бош тортди. Португалияликлар эса, футболчи эркин агент мақомини олишидан аввал, уни кирган нархига пуллаб, маблағ ишлаб олмоқчи.
17.09.2020
«Барселона»нинг франциялик футболчиси Усмон Дембеле фаолиятини «Манчестер Юнайтед»да давом эттиришга яқин турибди.
Каталонияликлар раҳбарияти бош мураббий Куманга керак бўлмай қолган ҳужумкор ўйинчини манчестерликларга таклиф қилмоқда. Ўз навбатида, инглизлар бош мураббийи Сульшер ҳужумкор ярим ҳимоячига жиддий эҳтиёж сезмоқда ва ўзи орзу қилган Жейдон Санчони қўлга кирита олгани йўқ.
Бундан ташқари, «Манчестер Юнайтед» раҳбарияти «Реал»да ўрнини йўқотган Гарет Бэйлни ҳам кўзлаётган эди. Уэльслик футболчиси «Тоттенхэм»га қайтиб, ўзиини ҳурмат қиладиган Жозе Моуриньо қўл остида ўйнашни маъқул кўрмоқда.
«Барселона» Дембелени катта чегирма билан 60 миллион еврога қўйиб юборишга тайёр. Бу трансфердан келадиган маблағ бошқа футболчиларни олишга йўналтирилади.
Грилиш «МЮ»га ўтмайдиган бўлди
15.09.2020
«Астон Вилла» яримҳимоячиси Жек Грилиш фаолиятини Бирмингем клубида давом эттиради. Бу ҳақда клуб расмий сайти хабар бермоқда.
Англиялик яримҳимоячи узоқ музокаралардан кейин «Астон Вилла»да қолишга қарор қилган ва жамоаси билан 2025 йилга қадар шартнома имзолаган.
The Telegraph’нинг ёзишича, янги келишувга кўра 25 ёшли футболчи ҳафтасига 125 минг фунт маош олади.
Аввалроқ, Грилишга «Манчестер Юнайтед» қизиқиш билдирганди. Аммо АПЛда қолган «Астон Вилла» эса ўз футболчиси учун 75 миллион фунт сўрагани учун музокаралар тўхтаб қолганди.
«Юнайтед» раҳбарияти «Боруссия»ни кўндиролмади
14.09.2020
«Манчестер Юнайтед» раҳбарияти «Боруссия» даги ҳамкасбларини ярим ҳимоячи Жейдон Санчони Англияга қўйиб юборишга кўндиролмади. Айни пайтда манчестерликлар бошқа вариантларни кўриб чиқмоқда.
Биринчи навбатда, «Манчестер Юнайтед» Англия премьер-лигасида катта тажриба тўплаган «Реал» вакили Гарет Бэйлни олишни мўлжалламоқда. Мадридликлар ҳам катта маош оладиган ҳужумкор футболчидан тезроқ қутилмоқчи.
МЮ хўжайинлар Бэйлдан ташқари яна икки футболчига қизиқиш билдирмоқда. «Ювентус» трансферга қўйган бразилиялик Дуглас Коста ва «Интер» га керак бўлмаган Иван Перишич ҳам янги мавсумни Сульшер қўл остида бошлаши мумкин.