«Реал» интизорлик билан кутмоқда
08.09.2020
Испания чемпиони уэльслик юлдуз Гарет Бэйл бўйича «Манчестер Юнайтед» таклиф билдиришини интизорлик билан кутмоқда.
Жорий трансферлар мавсумида Бэйлни сотиб юбориш "Қироллик клуби«нинг асосий мақсадига айланган. Тажрибали футболи жамоа бош мураббийи Зинедин Зидан билан чиқиша олмаяпти. Ҳар икки томон ҳам бирга ишлай олмаслигига амин бўлган. «Реал» футболчига яна икки йил давомида 30 миллион фунт тўлашни истамаяпти. Бэйл эса кетишга шошилмай, захирада ўтириб бўлса ҳам, маошини олишга рози.
«Реал» шу пайтгача Бэйл бўйича аниқ таклиф олгани йўқ. Мадридликлар «Манчестер Юнайтед» раҳбарлари "Боруссия"дан Жейдон Санчони трансфер қила олмаганидан кейин манчестерликларнинг эътиборини Бэйл трансферига қаратмоқчи.
Сульшернинг БЕШ муаммоси!?
08.09.2020
Сульшер режаларига кирмайдиган беш нафар футболчини бошқа клубга ўтишга кўндира олмаяпти.
Ҳимояилар Фил Жонс, Крис Смоллинг, Маркос Рохо, ярим ҳимоячи Андреас Перейра ва дарвозабон Серхио Ромеро «Манчестер Юнайтед»дан кетган тақдирда маоши қисқаришига рози бўлмаяпти. Бундан ташқари, улар манчестерликлардан шартномани бир томонлама бекор қилаётгани боис компенсация ҳам талаб қилмоқда.
Айни пайтда Смоллингга «Рома» харидор бўлмоқда. Ромеронинг жавобини «Астон Вилла», «Эвертон» ва «Лидс» кутаётган бўлса, Перейра олдида «Бенфика» ва «Валенсия» вариантлари бор. Рохо ўз юртига қайтиб, «Бока Хуниорс» шарафини ҳимоя қилиши мумкин.
Антуан Гризманн «Барселона»да қолади
08.09.2020
Антуан Гризманн ушбу трансфер мавсумида «Барселона» клубини тарк этишни истамайди.
Гризманнинг «Атлетико» клубига қайтиши ва Англияга кўчиб ўтиши ҳақидаги гапларга қарамай, 29 ёшли франциялик футболчи Барселонада қолишни истайди.
Diario Sport нашрининг маълум қилишича, ўйинчи бутун эътиборини «Барселона» клубига қаратади. Бунга ҳаттоки АПЛ топ-клубларининг қизиқарли таклифлари ҳам тўсқинлик қилмайди.
Гризманн каталонияликларнинг янги бош мураббийи Роналд Куман уни юқори бахолашини ва марказий ҳужумчи ролида кўриш истаги борлигини билади. Луис Суарес кетганидан кейин франциялик футболчида кўпроқ эркинлик бўлади. У Лионель Месси билан муносабатларини йўлга қўйиш ниятида.
Аввалроқ, «Ливерпуль», «Манчестер Юнайтед» ва «Арсенал» клублари Гризманни кузатишаётгани айтилган эди.
Сульшер фикридан қайтмади
08.09.2020
«Манчестер Юнайтед» жорий трансфер мавсуми якунлангунича, тўртта футболчини сотиб олиш учун курашади.
Манчестерликлар учун асосий трансфер нишони ҳамон Жейдон Санчо бўлиб қолаверади. Сульшер 20 ёшли инглиз футболчисини ватанига қайтариш фикридан воз кечмади ва клубдан уни олиб келишни талаб қилмоқда. Агар бу трансфер ўхшамаса, унинг ўрнига «Ювентус» нинг бразилиялик легионери Дуглас Коста, «Борнмут» ярим ҳимоячиси Дэвид Брукс ва «Интер» вакили Иван Перишичдан бири таклиф этилади.
Бундан ташқари, Сульшер чап қанот ҳимоячи учун «Реал»дан Серхио Регилон ёки Киевнинг «Динамо»сидан Виталий Миколенкони олиб келмоқчи.
Шунингдек, манчестерлик скаутлар таркибни тўлиқ мустаҳкамлаш учун марказий ҳимоячи ва тўпурар ҳужумчи қидирмоқда.
Мэйсон Гринвуд Англия миллий жамоасидан четлатилди
07.09.2020
Мэйсон Гринвуд Англия миллий жамоаси сафини тарк этишди, дея ёзмоқда Daily Mail.
Манбанинг ёзишича, ушбу футболчилар миллий жамоа ихтиёрида карантин қоидаларини қасддан бузишган. Қайд этилишича, Исландияга қарши ўйиндан кейин ёш футболчилар миллий жамоа жойлашган меҳмонхонага кўнгилхушлик учун енгил табиатли қизларни чақиришган. Меҳмонлардан бири ижтимоий тармоқда бу ҳақда сурат жойлагач, ёш футболчиларнинг яширин ҳатти-ҳаракати ошкор бўлган.
Энди Фоден ва Гринвуд Англияга қайтиши, миллий жамоа эса Дания билан ўйин учун Копенгагенга йўл олиши кутилмоқда.
Англия миллий жамоаси бош мураббийи Гарет Саутгейт Фоден ва Гринвуднинг ҳатти-ҳаракатини қоралаб, бу жиддий масала эканлигини таъкидлади.
Рэшфорд: Кевин Ҳоллинрейкни танқид қилди
07.09.2020
Маркус Рэшфорд британиялик депутат Кевин Ҳоллинрейкни мамлакатдаги оч болаларга муносабати учун танқид қилди.
Ҳоллинрейк «твиттер»даги саҳифасида фарзандларини боқиш ота-оналарнинг вазифаси эканлигини ёзганди.
«Твит ёзишингиздан олдин оилалар билан суҳбатлашишингизни маслаҳат бераман. Шу кунгача мен фарзандларини боқишга масъулиятсизлик қилган ёки буни ҳис қилмайдиган битта ҳам ота-онани учратмадим.
Депутатнинг ёзганларига эътибор беринг. Айнан шундай изоҳлар одамларга ҳақиқатни айтишга ва ёрдам сўрашга халақит беради. Биз бир-биримизни рағбатлантиришни бошлашимиз керак. Бу ҳақда ёзган ҳар бир кишига шундай жавоб берардим», – дея жавоб берди Рэшфорд «твиттер»даги саҳифасида.
22 ёшли ҳужумчи ўтган мавсумда АПЛда 31та ўйинда майдонга тушиб, 17та гол урди ва 7та голга ассистентлик қилди.
«Реал» Серхио Регилонни сотмайди
06.09.2020
«Манчестер Юнайтед» раҳбарияти «Реал» да ўрнини топа олмаётган Серхио Регилонни сотиб олиш орқали ҳимоядаги муаммоларни бир неча йилга ёпмоқчи эди.
Шу мақсадда манчестерликлар бу футболчи учун талаб қилинаётган 27 миллион фунтни тўлашга ҳам розилик берганди.
Кутилмаганда мадридликлар трансфер сиёсатини ўзгартирди. Ёзги трансферлар мавсумида йигирмага яқин футболчисини сотувга қўйган «Реал» раҳбарияти ушбу рўйхатда бўлган Регилонни сотишдан бош тортмоқда.
Энди «Манчестер Юнайтед» Регилонни фақатгина бир мавсумга, шунда ҳам сотиб олиш ҳуқуқисиз ижарага олиши мумкин.
Серхио Регилоннинг ўзи якунланган мавсумда Европа Лигасида бош совринни қўлга киритиб, янги мавсумда Чемпионлар лигасида иштирок этиш ҳуқуқини қўлга киритган «Севилья» сафига қайтишни истамоқда.
Дин Хендерсон клубни тарк этмоқчи
06.09.2020
«Манчестер Юнайтед» билан шартномаси янгилаган дарвозабон Дин Хендерсон клубни тезроқ тарк этиб, ўзига янги жамоа топишга ҳаракат қилмоқда.
Хендерсон манчестерликлар сафида захирага михланиб қолмаслик учун бошқа жамоага ижарага ўтишга рози. 23 ёшли истеъдодли дарвозабоннинг бу қарори келаси йили бўладиган Европа чемпионати олдидан Англия терма жамоасидаги ўрнини йўқотмасликка қаратилган.
— Асосий мақсадим — доим майдонга тушиш. Ўтган мавсумдаги ўйинларимдан сўнг, энди футболни ташқаридан кузата олмайман. Ҳеч нарса қилмасдан захирада ўтириш аҳмоқлик. Бу ҳолат на менга, на клубга фойда, — деди Дин Хендерсон.
Англия премьер-лигасида бу дарвозабонни сотиб олиш учун ҳам, ижарада ўйнатиш истагидагилар ҳам жуда кўп.
Погба «Ювентус»га қайтишни режалаштирган
06.09.2020
Поль Погба «Ювентус»га қайтишни истамоқда, деб хабар беради Tuttosport.
Манбага кўра, Турин клуби бир неча марта французнинг трансферини сўраган, аммо «қизил иблислар» яримҳимоячига катта нарх белгилашган – 130 млн евро.
Погба вазиятни ўзгартириб, яна Италияда ўйнашни хоҳлаяпти. У 2020/21 йилги мавсум якунини кутиб, инглиз жамоасини арзонроқ нархда тарк этишни режалаштирган.
Аввалроқ 27 ёшли футболчининг агенти Мино Райола шартномани узайтириш бўйича музокаралар босимсиз, жуда хотиржамлик билан олиб борилаётганини айтганди. Аммо, хабар қилинишича, Поль вақтдан ютиб, шартномани узайтирмасликни истамоқда.
Яримҳимоячининг манкунианликлар билан амалдаги шартномаси 2021 йил ёзигача мўлжалланган. Аммо битимда клуб уни яна бир йилга узайтириш мумкинлиги борасидаги банд бор.
Маълумот ўрнида, Погба 2012-2016 йиллар оралиғида «Ювентус»да ўйнаган.
Бербатов: Ҳимоя чизиғини кучайтириш керак
06.09.2020
«Манчестер Юнайтед»нинг собиқ ҳужумчиси Димитар Бербатов манкунианликларга Ҳарри Магуайр билан жуфтликда ўйнаш учун яна бир марказий ҳимоячи керак, деб ҳисобламоқда.
«Улар бошқа ўйинчи сотиб олишадими ёки йўқми, кўрамиз. Менимча, ҳимоя чизиғини кучайтириш керак. Қолган чизиқлар мувозанатли кўринмоқда.
Магуайр билан жуфтликда ўйнайдиган ҳимоячи керак. Ҳарри тўпни ҳимоядан олиб чиқиб, яримҳимоячиларга узатишни яхши кўради. Иккинчи ҳимоячининг ўйин услуби бошқача бўлиши керак, аммо у ҳам шундай даражада ўйнаши зарур.
Улар Рио Фердинанд ва Неманья Видич тандем каби бўлиши керак», – дея Бербатовнинг сўзларини келтираид Goal.