Регилон учун 30 млн евро
05.09.2020
«Реал» ҳимоячиси Серхио Регилон жамоасини ўзгартириши мумкин.
ABC'нинг ёзишича, «Манчестер Юнайтед» 23 ёшли испан учун 30 млн евро тўлашга тайёр, бу қиймат бонуслар ҳисобига ортиши ҳам мумкин. «Реал» ушбу таклиф борасида ўйламоқда.
«Севилья» эса Регилонни яна бир мавсумга ижарага олмоқчи. Шунингдек, унга «Ювентус» ҳам қизиқмоқда.
Ҳимоячи ўтган мавсумда Ла Лигада 31та ўйинда майдонга тушиб, 2та тўп киритган.
Саутгейт Магуайрни терма жамоага қайтаради
05.09.2020
Англия миллий жамоаси бош мураббийи Гарет Саутгейт «Манчестер Юнайтед» ҳимоячиси Гарри Магуайр масаласида фикр билдирди.
Англиялик ҳимоячи Греция суди томонидан безорилик қилганликда айблангач, Саутгейт Магуайрни Миллатлар лигаси ўйинлари олдидан миллий жамоадан четлатган эди. Кўп ўтмай, футболчининг ҳуқуқшунослари апелляция бериб, Магуайрга белгиланган 21 ойлик шартли қамоқ жазоси бекор қилиниб, оз миқдордаги жарима тўлови билан алмаштирилганди.
«Магуайрга қўнғироқ қилишдан уяламанми? Йўқ, албатта. Энди, бу иш қанчалик қийин бўлганлигини ва ҳаммаси ҳам биз ўйлаганчалик эмаслигини барча билади. Бундай пайтда футболчини қўллаб-қувватлаш шарт эканлигини яхши тушуниб тургандим, аммо жиноий ишнинг кўриб чиқилишигача тезроқ қарор қабул қилишим шарт эди. Гарри миллий жамоанинг Миллатлар лигаси доирасидаги икки ўйинини ўтказиб юборса-да, кейинги йиғинга албатта чақирилади. Ўтган икки ҳафта Гарри учун жуда оғир бўлди. У ҳозир ҳамма муаммолардан узоқлашиб, шунчаки яхши дам олиши керак. Магуайрни октябрь ойидаги ўйинларимизга чақириш режамда бор», - дея Саутгейтнинг сўзларини келтирмоқда The Guardian.
Гринвуд ва Уильямс рақамларини ўзгартиришди
04.09.2020
Клуб расмий сайтининг ёзишича, ҳозиргача 26-рақамда тўп тепган 18 ёшли форвард эндиликда 11-рақам остида ҳаракат қилади. 53-рақамда ўйнаган Уильямс эса 33-рақамни танлади.
Гринвуд «Юнайтед» сафида 11-рақамда ўйнаган тўртинчи футболчига айланади. Бунгача ушбу рақамда Райан Гиггз, Аднан Янузай ва Антони Марсьяль тўп тепган.
Дастлаб «МЮ» Гиггздан сўнг 11-рақамни ҳеч кимга бермаслиги маълум қилинганди, аммо кейинчалик уэльслик собиқ футболчи буни зарур эмас деб ҳисоблаган.
Санчес: «Арсенал»га қайтишни сўрадим
04.09.2020
Алексис Санчес «Манчестер Юнайтед»даги фаолияти ҳақида гапирди.
«МЮ»даги биринчи машғулотдан сўнг мен кўп нарсани тушундим. Уйга келдим ва оилам, менежеримдан шартномани бузиб, «Арсенал»га қайтишни сўрадим. Ҳеч нарса менга мос келмасди, аммо аллақачон шартнома имзолаб бўлгандим. Ўша пайтда биз бир жамоа сифатида бирлашмаган эдик.
Журналистлар ва клубнинг собиқ футболчилари билмасдан гапиришарди. Улар жамоа ичида нима бўлаётганини билмай, менга босим ўтказишарди. Биз бир оила эмасдик, бу майдонда ҳам акс этган. Агар кимнидир айблаш керак бўлса, эътиборни менга қаратишарди. Албатта, ўзимни ҳам танқид қиламан. Бундан яхшироқ ўйнашим керак эди. Аммо бир неча дақиқа ўйнасам ҳам, доим мени айблашарди», – дея Санчеснинг сўзларини келтиради Goal.
Эслатиб ўтамиз, 31 ёшли чилилик форвард ёзда «МЮ» билан шартномасини бекор қилди ва «Интер» билан 2023 йилгача мўлжалланган шартнома тузди.
Ван де Бек: «Манчестер Юнайтед»дан юқориси йўқ
03.09.2020
Донни ван де Бек ўз таассуротлари билан ўртоқлашди.
«Бундай ажойиб тарихга эга клубга ўтгандан сўнг гапни нимадан бошлашни ҳам билмаяпман.
«Аякс»даги барчага миннатдорчилик билдирмоқчиман. Мен у ерда ўсганман ва ҳар доим клуб билан алоқада бўламан. Энди фаолиятимдаги кейинги қадамимни ташлаб, юқори савияда ўйнашга тайёрман. «Манчестер Юнайтед»дан юқориси йўқ.
Менга «Олд Траффорд»даги атмосфера нақадар ажойиб эканлигини айтишди, жамоа либосида майдонга тушишни сабрсизлик билан кутяпман.
Ушбу жамоада дунёнинг энг яхши яримҳимоячилари бор ва мен улардан кўп нарса ўрганишим мумкинлигини биламан. Шунингдек, ўзим ҳам жамоага нимадир бера оламан.
Мураббий билан унинг қарашлари, клуб қайси йўналишда ҳаракат қилаётгани ҳақида суҳбатлашгандан кейин ниҳоятда ҳаяжондаман. Ушбу лойиҳанинг бир қисми бўлишни хоҳлайман», – дея ван де Бекнинг сўзларини келтиради клуб расмий сайти.
Эслатиб ўтамиз, 23 ёшли нидерландиялик «МЮ» билан 5+1 шаклида шартнома имзолади.
Ван де Бек «Манчестер Юнайтед» аъзоси
03.09.2020
Яримҳимоячи Донни ван де Бек «Аякс»дан «Манчестер Юнайтед»га ўтди.
23 ёшли ҳавбек манкунианликлар билан беш йиллик шартномага имзо чеккан, шартномада келишувни яна бир йилга узайтириш имконияти кўзда тутилган.
Аввалроқ ОАВда ушбу футболчи «МЮ»да йилига олти миллион евро миқдорида маош олиши айтилганди.
Қайд этилишича, трансфер учун 40 млн евро тўланган, шунингдек бонуслар кўзда тутилган.
Альба «Юнайтед» таклифини қабул қилиши кутилмоқда
03.09.2020
«Барселона» да янги шаклланаётган жамоадан жой тегмайдиган Хорди Альба фаолиятини Англия премьер-лигасида давом эттириш имконига эга бўлди.
Сульшер каталонияликлар юлдузини кўп жароҳат оладиган Люк Шоунинг ўрнида ўйнатишни мақсад қилган.
Рональд Куман жамоа таркибини ёшартириш мақсадида ёши катта юлдузларнинг ҳаммасига чиқиш эшикларини очиб бермоқда. Хусусан, Иван Ракитич «Севилья»га ўтди, Луис Суарес ва Артуро Видаль Италия грандлари билан музокара олиб бормоқда. Кетиш навбати Альба ва Пике каби ҳимоячиларга ҳам етиб келмоқда.
31 ёшли испаниялик ҳимоячи вазиятни тўғри баҳолаган ҳолда «Манчестер Юнайтед» таклифини қабул қилиши кутилмоқда.
Сульшерга Жейдон Санчо керак
03.09.2020
Сульшер «Боруссия» юлдузи Жейдон Санчони олиш масаласини яна кўтарди.
Аввалроқ, манчестерликлар раҳбарияти дортмундлик ҳамкасблар билан трансфер бўйича келишувга эришолмаганди. Қолаверса, «Боруссия» ҳам ўйинчи яна камида бир йил Дортмундда тўп суришини таъкидлаган.
Воқеаларнинг бундай ривожи Сульшерни қониқтиргани йўқ. Норвегиялик мутахассис агарда Жейдон Санчонинг ўзи «Манчестер Юнайтед»га келиш истаги йўқлиги расман оммавий тарзда эълон қилсагина, унинг трансферидан воз кечиши мумкинлигини таъкидламоқда.
«Боруссия» клуби эса, бу трансфер масаласини кейинги ёзгача чўзиб, курашга «Барселона», «Реал» ва «Манчестер Сити» каби гранд клубларнинг қўшилишини кутмоқда.
Ван де Бек 34-рақамда ўйнайди
02.09.2020
«Аякс»дан «Манчестер Юнайтед»га ўтишга яқин турган яримҳимоячи Донни ван де Бек янги жамоасида қайси рақамда ҳаракат қилиши маълум бўлди, деб хабар беради Daily Mail.
Манбага кўра, 23 ёшли хавбек «Аякс»да ўйнаган собиқ жамоадоши Абдулҳақ Нури ҳурмати юзасидан 34-рақамни танлайди. Абдулҳақ амстердамликлар сафида айнан шу рақам остида тўп тепган.
Эслатиб ўтамиз, 2017 йилнинг июлида «Аякс»нинг «Вердер»га қарши ўртоқлик ўйинида Нури майдонда ҳушидан кетган эди. Аммо яримҳимоячига майдонда вақтида етарли ёрдам кўрсатилмайди. Уни вертолётда касалхонага олиб боришади. Шифокорлар унда оғир аритмия – юрак уриш тезлигининг кескин ўзгаришини аниқлашади.
Ўшанда шифокорлар кўйган ташхисга кўра, футболчи ҳеч қачон юролмайди, гапира олмайди, одамларни танимайди ва ҳатта овқат ея олмайди.
2018 йилнинг июль ойида Нури кўзларини очди. 2020 йил март ойида эса Нурининг акаси собиқ футболчининг комадан чиққанини маълум қилди.
Фернандеш: Пенальтини яхши тепаман
02.09.2020
Бруну Фернандеш «Тоттенҳэм» бош мураббийи Жозе Моуриньонинг сўзларига жавоб қайтарди.
Португалия мутахассис июль ойида шундай деганди: «Бруну дунёнинг энг яхши пенальтичиларидан бири эканлигини исботлади, у 20тача пенальти тепди».
«Ростини айтсам, хафа бўлганим йўқ. Пенальтини яхши тепаман деб ўйлайман ва бошқа ҳеч нарса йўқ. Ҳаммасини тушунаман.
20та пенальти? Бу тўғри, лекин «МЮ»га келганимдан бери эмас.
Одамларнинг «У фақат пенальтидан гол уради» деган гапларини эшитаман. Аммо мен бир қанча вақт олдин статистикани кўрдим: АПЛда пенальтиларни ҳисобга олмаса, яримҳимоячилар ичида фақат Кевин де Брюйне голларда мендан кўра кўпроқ қатнашган», – дея Фернандешнинг сўзларини келтиради A Bola.