Дин Ҳендерсон шартномани узайтирди
27.08.2020
«Манчестер Юнайтед» дарвозабони Дин Ҳендерсон билан шартномани узайтирди. Бу ҳақда клуб расмий сайти маълум қилди.
23 ёшли инглизнинг манкунианликлар билан тузган янги битими 2025 йилгача мўлжалланган.
Аввалроқ дарвозабонга «Челси» қизиқаётганлиги ҳақида хабар қилинганди.
Маълумот учун, Ҳендерсон ўтган икки мавсумни «Шеффилд Юнайтед»да ижарада ўтказиб, 82та ўйинда майдонга тушган.
«Юнайтед» Лионель Месси учун курашадими
26.08.2020
«Юнайтед» «Барселона»нинг аргентиналик ҳужумчиси Лионель Мессини таркибга қўшиб олишга ҳаракат қилади.
Cuatro нашри маълумотига кўра, инглизлар клуби ёзги трансферлар доирасида ушбу футболчини қўлга киритиш учун жиддий ҳаракатлар бошлашга тайёрланмоқда.
Клуб раҳбариятидан норози бўлган 33 ёшли Месси яна бир марта «Барселона»дан кетиш ҳақида ўйламоқда. «Барса» эса Месси сотилмаслиги, уни қўлга киритишни истайдиган клуб шартномада белгиланган 700 млн евро миқдоридаги бадал пулини тўлаши кераклигини таъкидлаб келмоқда.
Эслатиб ўтамиз, аргентиналик футболчининг хизматларига «Манчестер Сити», «Пари Сен-Жермен» ва «Интер» каби клублардан ҳам қизиқишлар мавжуд.
Якунланган мавсумда Месси каталонияликлар жамоасининг барча турнирлар доирасидаги 44 ўйинида майдонга тушиб, 31 гол урган ва 26 голга узатма берган. Унинг клуб билан амалдаги шартномаси муддати 2021 йил ёзига қадар тузилган.
Ҳарри Магуайр терма жамоадан четлатиладими!?
25.08.2020
«Юнайтед» сардори Ҳарри Магуайр Грециядаги қилмишлари учун Англия футбол ассоциацияси томонидан муҳокама қилинади.
27 ёшли футболчи Греция полициячига ҳужум қилгани учун ҳибсга олинган эди. Кейинроқ, уни Англияга жўнатиб юборишди. Гарчи Магуайр айбини тан олмаган бўлса-да, унинг юристлари 25 август куни бўладиган суд маҳкамасида иштирок этади.
Англия футбол ассоциацияси раҳбарияти терма жамоа бош мураббийи Гарет Саутгейт билан вазият юзасидан суҳбат ўтказади.
Маълумотларга қараганда, бош мураббий интизомий чора сифатида Магуайрни сентябрь ойида Дания ва Исландияга қарши бўладиган учрашувлардан четлатишни режалаштирмоқда.
Луи ван Гал: Cотиб ололмаганимиз ҳайрон қолдирарди
25.08.2020
Луи ван Гал FourFourTwo журналига берган интервьюсида «Манчестер Юнайтед»даги фаолияти давомида клубга таклиф этмоқчи бўлган футболчилар номини айтиб ўтди.
«Мен таклиф этмоқчи бўлган янги футболчилар рўйхатидан ҳимоячилар Серхио Рамос ва Матс Хуммельс, яримҳимоячилар Риёд Маҳрез, Жеймс Милнер, Н'Голо Канте ва Садио Мане, ҳужумчилардан Томас Мюллер, Роберт Левандовски, Гонсало Игуаин ва Неймар жой олганди.
Чунки мен клубни қабул қилиб олганимда қўл остимда ёши катта футболчилар талайгина бўлган жамоа қолганди. Бу таркиб анча вақт ёшартирилмагани сабабли жамоанинг мавқеини туширмай ёшартиришга киришгандим. Бироқ ўзим истаган футболчиларни сотиб олиш жуда қийин бўлди.
Тўғрисини айтсам, яхши футболчиларни сотиб ололмаганимиз ҳайрон қолдирарди. «Юнайтед» жаҳоннинг энг бой клуби эканлиги учун жамоалар ўз етакчилари эвазига катта маблағ сўрашини тушунардим. Аммо бундай даражадаги катта клубда ишлаб, сен ҳар ўзинг хоҳлаган футболчини чақиришни кутасан. Бироқ бунинг имкони топилмасди – асосий трансфер эмас, 4-5-даражадаги трансфер режалар амалга ошарди» - дейди нидерландиялик собиқ мураббий FourFourTwo’га берган интервьюсида.
Маълумот учун, Луи ван Гал 2014-2016 йиллар давомида «Манчестер Юнайтед» бош мураббийи сифатида фаолият юритган.
24.08.2020
Норвегиянинг «Тромсе» клуби ҳужмчиси Исак Хансен-Аарен фаолиятини «Манчестер Юнайтед»да давом эттирадиган бўлди.
16 ёшли футболчи «қизил иблислар» билан узоқ йиллик шартнома имзолаган. Аммо келишув бандлари ошкор этилмаяпти. У аллақачон Англияга етиб келган ва жамоа машғулотларига қўшилган.
Хансен-Аарен «Тромсе» клуби тарбияланувчиси ҳисобланади. У асосий жамоада 15 ёшида дебют қилган. Ўтган мавсум 7 та ўйинда майдонга тушди ва 1 та голга ассистентлик қилди.
Магуайр устидан жиноят иши қўзғатилди
22.08.2020
Ҳарри Магуайр ва унинг икки шериги устидан жиноят иши қўзғатилди, дея хабар бермоқда RM Sport.
Манбанинг ёзишича, Греция ҳуқуқни муҳофаза қилиш ходимлари томонидан футболчи ва икки шеригининг англиялик сайёҳлар билан юз берган жанжалда уларга тан жароҳати етказилгани ва полиция ходимларига қаршилик кўрсатиб, ҳақорат қилгани, устига-устак қўйиб юбориш учун полиция ходимларига пора таклиф қилгани сабаб бўлган. Греция қонунчилигига кўра, футболчи катта миқдордаги жарима пули билан қутилиши ёки 2 йилгача қамоқ жазосига тортилиши мумкин.
Аввалроқ, «Манчестер Юнайтед» ўз сардорининг Грецияда ҳибсда эканлигини тасдиқлаб, футболчи атрофидаги вазиятдан ташвишда эканлигини маълум қилганди. Клуб ҳуқуқшунослари ушбу вазиятни ўрганишмоқда.
«Юнайтед» Марк Хурадога қизиқмоқда
21.08.2020
«Ла Масия» академиясини яна бир истеъдод тарк этишга яқин. Маълум бўлишича, «Манчестер Юнайтед» раҳбарлари «Барселона» тарбияланувчиси Марк Хурадо билан музокараларнинг сўнгги босқичида.
16 ёшли футболчи ўнг қанот ҳимоясида ҳаракат қилади. У ҳозирги жамоасида асосий таркибга киритилишига ишонмаяпти. Шу боис, клубини ўзгартириш ҳақида жиддий бош қотирмоқда. Марк 11 ёшидан буён "Барса"нинг турли ёш тоифаларидаги жамоаларида ҳаракат қилиб келган.
Хурадо каталонияликлар академиясини тарк этаётган биринчи истеъдодли футболчи эмас. Ундан аввал, Хави Симонс, Мбуямба каби ёш вундеркиндлар ҳам жамоани тарк этганди.
«Юнайтед» Поль Погба бўйича бир қарорга келди
21.08.2020
«Манчестер Юнайтед» жамоанинг франциялик легионери Поль Погба бўйича бир қарорга келди.
Клуб раҳбарияти узоқ давом этган таҳлиллардан сўнг, Поль Погбани жамоа ўйинини кучайтиришга ишонч билдирди ва у билан амалдаги шартномани узайтиришга қарор қилди. Яқингача, франциялик юлдуз жамоа раҳбариятидан норози эди ва бошқа клубга кетишни режалаштириб юрганди.
Бироқ, Сульшер унинг кўнглига йўл топа олди ва Погба жамоа ютуқларига муносиб ҳисса қўша бошлади.
Маълумотларга қараганда, 27 ёшли футболчи билан 2024 йилнинг ёзигача мўлжалланган янги шартнома тузилади. Унга кўра, Погбанинг маоши ҳафтасига 150 мингдан 225 минг фунтгача кўтарилади. Полнинг ўзига ҳам Манчестерда қолиш истагини билдирган.
Ҳарри Магуайр ҳибсга олинди!?
21.08.2020
Ҳарри Магуайр кўчадаги жанжал туфайли Миконосда полициячилар томонидан ҳибсга олинди, дея хабар бермоқда Proto Thema.
Манбанинг ёзишича, Магуайр ва унинг дўстлари Миконосдаги барлардан бирида Англиядан ташриф буюрган бошқа сайёҳлар билан муштлашишган. Воқеа жойига полициячилар етиб келгач, Ҳарри ва унинг дўстлари полициячиларга ҳам қўл кўтарган. Оқибатда «МЮ» футболчиси ва унинг икки шериги тартибни сақлаш ходимлари томонидан ҳибсга олиниб, полиция маҳкамасига олиб кетилган. Хабар қилинишича, англияликлар қўлга олингандан кейин ҳам маҳкамада ҳуқуқни муҳофаза қилиш ходимларини ҳақорат қилишда давом этган.
Магуайр ва унинг дўстлари Греция қонунчилигига кўра сайёҳ сифатида тартибни бузгани ва полицияга қаршилик қилгани учун катта миқдордаги жаримага тортилиши мумкин.
Эслатиб ўтамиз, «МЮ» сардори Ҳарри Магуайр якунланган мавсумда АПЛда клуби билан 3-ўринни қўлга киритган бўлса-да, Англия кубоги, лига кубоги ва Европа лигаси турнири финал остонасида аламли тарзда тарк этганди.
Сульшер нишонида Коста ва Сандро
20.08.2020
«Манчестер Юнайтед» ёзги трансферлар вақтида «Ювентус» нинг икки футболчисини олишга ҳаракат қилади.
Сульшер нишонида ярим ҳимоячи Дуглас Коста ва ҳимоячи Алекс Сандро турибди. Бош мураббий Турин клубида барқарор ўйин кўрсатиб келаётган бу икки бразилиялик футболчи ёрдамида майдондаги муаммоли нуқталарни ёпишни мақсад қилган.
«Ювентус» ни қабул қилиб олган Андреа Пирло асосий таркибнинг деярли барча футболчиларидан бирма-бир воз кечаётганини инобатга олиб, манчестерликларга мўлжалдаги трансферни амалга ошириш қийинчилик туғдирмайди.
Инглизлар ҳар икки футболчи учун туринликларга 60 миллион фунт таклиф қилишни режалаштирмоқда.