Санчес қайтмоқчи эмас
31.07.2020
Ижара асосида «Интер»да ўйнаётган ҳужумчи Алексис Санчес «Манчестер Юнайтед»га қайтмоқчи эмас.
«Daily Star» тарқатган хабарга кўра, 31 ёшли футболчи «қизил иблислар» раҳбариятига «нерадзурри» сафида қолиш нияти борлигини маълум қилган. Чилилик футболчининг ижара шартномаси 2 август куни якунига етади.
«Юнайтед» бош мураббийи Уле-Гуннар Сульшер кейинги мавсумда Санчеснинг хизматидан фойдаланмоқчи, аммо унинг йирик миқдордаги маоши (ҳафтасига 400 минг фунт) раҳбариятга маъқул келмаяпти.
«Интер» эса Алексиснинг трансферини сотиб олиш бўйича музокара бошлади. Бу борада томонлар келишувга эришишга яқин туришибди. Жорий мавсумда футболчининг 75% маошини «МЮ» тўлаётган эди. Миланликлар унинг ҳуқуқини тўлиқ сотиб олишса, футболчининг маоши ҳозиргига нисбатан камаяди.
Моуриньо: Фернандеш катта бурилиш ясай олди
30.07.2020
Жозе Моуриньо «Манчестер Юнайтед» хавбеки Бруну Фернандешнинг Англиядаги натижалари ҳақида киноя аралаш гапирди.
«Бруно «Манчестер Юнайтед» сафига келганида юқори спорт формасида эди. У жуда тез мослашиб, «Юнайтед»нинг ўйинида катта бурилиш ясай олди. Албатта, у қарийб 20та пенальтини амалга аниқ ошириб, жаҳоннинг энг яхши пенальтичиларидан бири эканлигини барчага исботлади», - дейди Моуриньо Record нашрига берган интервьюсида.
Эслатиб ўтамиз, АПЛ 38-тури доирасида «МЮ» сафарда «Лестер»ни мағлуб этган (2:0) эди. Ушбу ўйиндаги дастлабки гол айнан Фернандеш томонидан 11 метрлик нуқтадан киритилиб, бу «Юнайтед»нинг мавсумдаги 14-пенальтиси сифатида лига рекорди қайд этилганди.
Маълумот учун, январь ойида «Манчестер Юнайтед» сафига ўтган Фернандеш АПЛ доирасидаги 14 ўйинда майдонга тушиб, 8та гол (4таси пенальтидан) ва 7та голли узатмага муаллифлик қилди.
Энг қиммат бренд «Юнайтед» учинчи поғонада
29.07.2020
Инглиз консалтинг компанияси Brand Finance дунёнинг энг қиммат футбол брендлари рейтингини эълон қилди.
Биринчи ўринни худди ўтган йилдагидек «Реал» эгаллади – 1,572 млрд доллар. Лекин Мадрид клуби бренди аввалги йилгига қараганда пасайган. «Реал» бренди нархи 2019 йилда 1,846 млрд доллар эди.
Рейтингда иккинчи ўринни «Барселона», учинчи поғонани «Манчестер Юнайтед» эгаллади.
Дунёнинг энг қиммат клублари ўнлиги:
1 (1). «Реал» (1,572 млрд долларов)
2 (3). «Барселона» (1,565 млрд)
3 (2). «Манчестер Юнайтед» (1,456 млрд)
4 (6). «Ливерпуль» (1,398 млрд)
5 (5). «Манчестер Сити» (1,245 млрд)
6 (4). «Бавария» (1,169 млрд)
7 (8). «ПСЖ» (1,071 млрд)
8 (7). «Челси» (1,051 млрд)
9 (10). «Тоттенҳэм» (868 млн)
10 (9). «Арсенал» (796 млн).
Изоҳ: Қавс ичида жамоаларнинг ўтган йилги ўринлари кўрсатилган.
Марсьяль ой футболчиси бўлишга даъвогар
29.07.2020
Премьер-лига расмий сайтида июль ойининг энг яхши футболчиси бўлишга даъвогарлар эълон қилинди.
Номзодлар – Кристиан Пулишич («Челси»), Раҳим Стерлинг («Манчестер Сити»), Антони Марсьяль («МЮ»), Ҳарри Кейн («Тоттенҳэм»), Оливье Жиру («Челси»), Майкл Антонио («Вест Ҳэм»), Ник Поуп («Бёрнли»).
Ғолиб жамоа сардорлари, футбол мутахассислари ва мухлисларнинг овоз бериш натижаларига кўра аниқланади.
Фергюсон: Мукофотга муносибсан
29.07.2020
сэр Алекс Фергюсон «Ливерпуль» бош мураббийи Юрген Клоппни Премьер-лиганинг энг яхши мураббийи деб топилгани билан табриклади.
«Юрген Клопп, ажойиб иш. «Ливерпуль» чемпионатда охирги марта 30 йил аввал зафар қучганди.
Қойилмақом. У мукофотга лойиқ. Сенинг жамоангнинг ўйин даражаси ҳайратланарли. Ўйлашимча, бу ажойиб мавсум бўлди.
Англия чемпионатидаги ғалабангни айтиш учун мени кечқурун 3:30да уйғотганингни кечираман. Сен ҳар қанақасига ушбу мукофотга муносибсан. Шундай давом эт», – деб Фергюсоннинг сўзларини келтиради Sky Sports.
«Боруссия» 98 миллионлик таклифини рад этди
27.07.2020
«Юнайтед» ҳужумкор яримҳимоячиси Жейдон Санчо трансфери масаласида Дортмунд клуби билан келиша олмаяпти, дея ёзмоқда Bild нашри.
Манбанинг ёзишича, инглизлар Дортмунд клубининг англиялик футболчиси трансфери учун 98 миллион евро таклиф қилган, бироқ «Боруссия» сўровни рад этган. Немис клуби Санчони 120 миллион евродан камига сотмоқчи эмас. «МЮ» музокарани эса давом эттирмоқчи.
Жейдон 2017 йилда «Манчестер Сити»дан «Боруссия» сафига 7,8 млн евро эвазига қўшилганди.
Маълумот учун, 20 ёшли ҳужумкор футболчи Бундеслига жорий мавсумида 32 ўйинда майдонга тушиб, 17та гол ва 16та голли узатмага муаллифлик қилган.
Кин: Бу улкан меҳнатнинг самараси
27.07.2020
Рой Кин «Челси» бош мураббийи Фрэнк Лэмпард ва «МЮ» мураббийи Оле-Гуннар Сульшернинг жорий мавсумдаги ишини таққослади.
«Айтишим керакки, Фрэнк бу мавсумда Сульшердан яхшироқ ишлади. Тўғриси, улар бошқарувидаги жамоалар мавсум давомида ўртача савияда ўйин кўрсатса керак, деб тахмин қилгандим, аммо Лэмпард ўз ишини жуда яхши уддалади.
У чемпионат давомида муҳим қарорларни қабул қилди, ёшларни асосий таркибга қўрқмай жалб этди. Имкониятга эга бўлган иқтидорлар бугунга келиб барчага ўзларини кўрсата олишди. Бу улкан меҳнатнинг самараси.
«Челси» мавсумни топ-4да якунлади. Агар бу жамоа Англия кубогини қўлга кирита олса, Лэмпард учун йил ажойиб ўтган бўлади.
Фрэнк тўртликдан жой олгани унинг учун жуда катта натижа эмаслигини айтган бўлса-да, бу «Челси» учун олдинга ташланган улкан қадам», – дейди Кин Sky Sports эфирида.
Маълумот учун, «Челси» 1 август куни Англия кубоги финали доирасида «Арсенал»га қарши майдонга тушади.
Эслатиб ўтамиз, жорий мавсум аввали билан ҳисоблаганда «Манчестер Юнайтед» трансферлар учун 190 млн фунт сарфлаган бўлса, «Челси» ФИФА томонидан қўйилган тақиқ туфайли трансферларни амалга ошира олмаганди.
Сульшер: Энди «Юнайтед»га ўхшаяпмиз
27.07.2020
Оле-Гуннар Сульшер АПЛнинг сўнгги, 38-туридан ўрин олган «Лестер» (2:0) билан ўйиндан кейин ўз фикрларини билдириб ўтди.
«Хурсандман. Чемпионлар Лигасига чиқдик. Баъзи жамолардан орқада эдик ва якунда уларни қувиб ўтдик. Барқарорлик ва менталитетга эга эканлигимизни кўрсатдик. «МЮ» фахрланишга арзийдиган маданият яратади.
Йигитларга бугун нима бўлишидан қатъи назар ғалаба қозонишимиз кераклигини айтдим. Футболчилар жамоа сифатида фазилатларини намойиш этдилар.
Йигитлар майдонда тобора «Манчестер Юнайтед»га ўхшашмоқда. Вазият аввалгига қараганда анча яхши», – деб Сульшернинг сўзларини келтиради ВВС Sport.
Манкунианликлар 66 очко билан турнир жадвалида 3-ўринни эгаллашди ва Чемпионлар Лигасига йўлланма олишди.
«Юнайтед» АПЛ рекордчисига айланди
27.07.2020
АПЛ 38-тури доирасидаги «Лестер» - «МЮ» (0:2) учрашувида Бруну Фернандеш манчестерликларнинг дастлабки голини пенальтидан киритди.
Ўйиннинг 71-дақиқасида Марсиялга нисбатан ишлатилган қўполлик учун белгиланган 11 метрлик жарима зарбасини португалиялик яримҳимоячи моҳирона зарба билан амалга ошириб, Шмейхель дарвозасини ишғол этди.
Ушбу 11 метрлик жарима тўпи «Манчестер Юнайтед»нинг Премьер-лига жорий мавсумидаги 14-пенальтисига айланди. Бу турнир тарихидаги рекордга айланди.
Бунгача бир мавсумда клублар томонидан киритилган энг кўп пенальти 13та бўлиб, ҳакамлар 2015/16 йилги мавсумда «Лестер» ва 2004/05 йилги чемпионатда «Кристал Пэлас» рақиблари дарвозаси томон шунча пенальти белгилашган эди.
Эслатиб ўтамиз, «МЮ» чемпионатни 3-ўринда якунлаб, кейинги мавсум Чемпионлар лигасида иштирок этиш ҳуқуқини қўлга киритди.
Сульшер: Cабрсизлик билан кутяпмиз
24.07.2020
Оле-Гуннар Сульшер АПЛнинг 38-туридан ўрин олган «Лестер»га қарши баҳсдан нималар кутаётгани ҳақида фикр билдирди.
«Ўйинни сабрсизлик билан кутяпмиз. Келаси мавсумда Чемпионлар Лигасида ўйнашимиз мумкин.
Биз шунчаки майдонга чиқиб, натижага эришиш учун юқори даражада ўйнашимиз керак. Ўйинда устунлик қилишни хоҳлаймиз. «Лестер» майдонида ғалаба қозонишга ҳаракат қиламиз», – деб Сульшернинг сўзларини келтиради ВВС.
Эслатиб ўтамиз, сўнгги тур олдидан «МЮ» 63 очко билан 3-ўринни, «Лестер» эса 62 очко билан 5-поғонани эгаллаб турибди. 26 июль куни бўлиб ўтадиган ўйинда дуранг ҳам манкунианликларни Чемпионлар Лигасига олиб чиқади.