УЕФА ЧЛ тақвим режасини эълон қилди
03.07.2020
УЕФА расмий сайти Чемпионлар лигаси 2020/21 мавсуми тақвим режаларини эълон қилди.
Унга кўра, клублар ўртасидаги энг нуфузли мусобақанинг саралаш босқичи 8 август куни бошланса, гуруҳ босқич ўйинлари эса нисбатан кечроқ – 20 октябрь кунлари старт олади.
Саралаш босқичи:
Дастлабки раунд – 8-11 август
Биринчи саралаш босқичи – 18-19 август
Иккинчи саралаш босқичи – 25-26 август
Учинчи саралаш босқичи – 15-16 сентябрь
Плей-офф – 22-30 сентябрь
Гуруҳ босқичи:
1-тур – 20-21 октябрь
2-тур – 27-28 октябрь
3-тур – 3-4 ноябрь
4-тур – 24-25 ноябрь
5-тур – 1-2 декабрь
6-тур – 8-9 декабрь
Плей-офф:
1/8 финал – 16 февраль, 17 март
1/4 финал – 6 апрель, 14 апрель
1/2 финал – 27 апрель, 5 май
Финал – 29 май (Истанбул)
Эслатиб ўтамиз, жорий йилги Чемпионлар лигаси чорак финал ўйинларидан бошлаб «Саккизлик финали» форматида ўтказилиши эълон қилинганди. 12-23 август кунлари Лиссабонда ўтказилиши белгиланган баҳслар бир ўйиндан иборат бўлади.
«МЮ» Гризманн бўйича «Барселона»га сўров жўнатди
03.07.2020
«Манчестер Юнайтед» ва «Сити» клублари «Барселона»га Антуан Гризманн трансфери масаласида сўров жўнатишди. Бу ҳақда Mundo Deportivo нашри хабар бермоқда.
Манбанинг ёзишича, «Барселона» сўровга жавобан франциялик ҳужумчини сотиш режаси йўқлигини маълум қилган. Қайд этилишича, клубдаги мавқеига қарамай, Гризманн «Барселона»дан кетиш ҳақида ўйлаётгани йўқ. Шунга қарамай, футболчининг агенти мижозининг клубдаги ҳолати бўйича клуб раҳбарияти билан учрашмоқчи.
Антуан сўнгги марта 16 июнь кунги «Леганес»га қарши ўйинда «Барселона» сафида тўлиқ ўйинни ўтказганди. Охирги учта ўйинда эса захирадан майдонга тушмоқда. Хусусан, «Атлетико»га қарши баҳсда бош мураббий Сетьен уни 90-дақиқада майдонга туширгани 120 миллион трансфер пули эвазига сотиб олинган футболчига ёқмаган.
Маълумот учун, Гризманн жорий мавсум Ла Лигада 32 ўйинда 8та гол уриб, 5та ассистга муаллифлик қилган.
Фернандеш: «МЮ» Чемпионлар лигасида ўйнаши шарт
02.07.2020
Бруну Фернандеш АПЛ 32-тури доирасида «Брайтон» (3:0) устидан қозонилган ғалабадан кейин ўз таассуротлари билан ўртоқлашди.
«Биз Чемпионлар лигаси йўлланмаси учун кураш олиб бораяпмиз ва ишонамизки бу турнирга чиқа оламиз. «МЮ» Чемпионлар лигасида ўйнаши шарт.
Погба билан ўйинимиз ҳақида? Албатта, Поль билан бирга ўйнашдан жуда хурсандман. У майдонда катта ҳажмдаги ишларни бажаради. Биз ўйин жиҳатларимиз билан бир-биримизни тўлдира оламиз. Бироқ бу ҳақда кўп гапиришни истамасдим. Сабаби Погба сингари бу чизиқдаги бошқа жамоадошларимни ҳам ҳурмат қиламан ва улар билан ҳам биргаликдаги ўйинимиздан доим хурсанд бўламан», — дея футболчининг сўзларини келтирмоқда ВВС.
Маълумот учун, «Манчестер Юнайтед» 52 очко жамғариб, АПЛ турнир жадвалида 5-ўринда бормоқда. Португалиялик футболчи «Брайтон»га қарши ўйинда дублга эришди.
Анхель Гомес «Юнайтед»ни тарк этди
02.07.2020
Ёш яримҳимоячи Анхель Гомес «Манчестер Юнайтед»ни тарк этди. Бу ҳақда клуб матбуот хизмати хабар берди.
19 ёшли инглизнинг «қизил иблислар» билан имзолаган шартномаси муддати 30 июнь куни якунланди ва у «Олд Траффорд»дан эркин агент мақомида кетди.
Гомес «Манчестер Юнайтед» тарбиланувчиси ҳисобланади. У асосий жамоа таркибида 10та ўйинда майдонга тушган эди.
Аввалроқ, бош мураббийи Уле-Гуннар Сульшер Анхель Гомесни «Манчестер Юнайтед»даги «энг яхши ўсмир футболчи» деб айтган эди.
Трансфер учун 140 миллион фунт кредит
29.06.2020
«Юнайтед» клуби 140 миллион фунт стерлинг миқдорида кредит олди ва бу маблағ трансфер ойнасида янги футболчилар учун сарфланади, дея ёзади Manchester Evening News.
Манбанинг ёзишича, клуб Чемпионлар лигасига йўлланма олса 3 нафар футболчини сотиб олишни мақсад қилган. Бош мураббий Оле-Гуннар Сульшер янги ўйинчилар борасида ўз таклифини клуб раҳбариятига берган.
Клуб кредит маблағи жамоанинг молиявий ҳолатини барқарор сақлаш учун олинганлигини билдирган.
Маълумот учун, бир ҳафта олдин клуб «МЮ»нинг молиявий қарздорлиги бир йилда 127,4 млн фунтга ошиб, ҳозирда 429 миллион фунт стерлингни ташкил этаётгани ҳақида ҳисобот берганди.
Уайтсайд буюмларини сотишга мажбур
29.06.2020
«Манчестер Юнайтед»нинг 55 ёшли фахрийси Норман Уайтсайд Англия Кубогидаги ғалаба учун қўлга киритган медали ва бошқа эсдалик буюмларини сотишга мажбур бўлди, деб ёзади The Sun.
Уайтсайд 1985 йилда Англия Кубогида ғалаба қозонган. 26 ёшида оғир жароҳат туфайли футболчилик фаолиятини якунлаган. У «Манчестер Юнайтед» таркибида 7 йил тўп тепиб, 200дан ортиқ ўйинларда майдонга тушган.
Собиқ футболчи пулга муҳтожлиги сабабли совринларини сотишга мажбур бўлганини айтмоқда. Англия Кубоги ғолиблиги учун берилган медаль 15 минг фунт бошланғич нарх билан аукционга қўйилган.
Қайд қилиш жоизки, Уайтсайд «Манчестер Юнайтед» тарихидаги энг ёш сардор ҳисобланади.
9 футболчи «Юнайтед» ни тарк этди
26.06.2020
«Юнайтед» клуби 9 нафар футболчи билан хайрлашганини эълон қилди.
Уларнинг ҳаммаси «Манчестер Юнайтед» академияси тарбияланувчилари бўлиб, 30 июнь куни шартномаси муддати якунланади.
Улар:
Кэмерон Бортуик-Жексон,
Деметри Митчелл,
Итан Ҳэмилтон,
Дион Макги,
Жорж Таннер,
Эйдан Барлоу,
Киран О’Ҳара,
Алекс Фойтичек ва Ларжи Рамазани.
Manchester Evening News хабарига кўра, 19 ёшли Эйнжел Гомесга янги шартнома таклиф қилинди. Футболчи ўйлаб кўриш учун мухлат сўради.
Луи Саа: Уларнинг даражаси тенг
25.06.2020
Луи Саа «МЮ» ҳужумчиси Маркус Рэшфорд ва «ПСЖ» голеадори Килиан Мбаппени ўзаро таққослади.
«Мбаппе ва Рэшфорд маҳорат бобида бир хил даражадами? Худди шундай. Уларнинг иккиси ҳам жуда тезкор, 2-3 нафар рақиблар орасидан чиқиб кета олишади - дриблинг ва техникаси юқори даражада. Иқтидор ва маҳорат бобида уларнинг даражаси тенг.
Мбаппенинг омади шундаки, у «ПСЖ» кучли ва барқарор жамоага айланганида таркибнинг етакчиларидан бири бўлди ва катта ўсишга эришди. Рэшфорд ҳам сўнгги йилларда ҳар томонлама ривожланишга эришган бўлса-да, бу давр «Манчестер Юнайтед»даги ўзгаришлар даврига тўғри келиб қолганлиги сабабли Маркус ҳали катта ютуқларга эриша олгани йўқ. Аминманки, Мбаппе Франциянинг етакчисига айлангани каби Рэшфорд ҳам Англия миллий жамоасининг асосий тўпурарига айлана олади», - дейди франциялик собиқ ҳужумчи Луи Саа France Football нашрига.
Маълумот учун, жорий мавсумда Мбаппе Франция чемпионатидаги 20 ўйинда 18та голга муаллифлик қилган бўлса, Рэшфорд Англия Премьер-лигасида ҳозирча 23 учрашувда 14 марта рақиб дарвозасини ишғол этган.
Сульшер: Бизга 3-ўрин керак
25.06.2020
Оле-Гуннар Сульшер АПЛ 31-тури доирасидаги «Шеффилд Юнайтед» (3:0) билан ўйиндан кейин фикрлари билан ўртоқлашди.
«Ўйин тақдирини танаффусгача ҳал қилиб қўйишимиз мумкин эди. Ўйинимиз ва натижадан хурсанд бўлсам-да, биз янада йирокроқ ҳисобда ғалаба қозонишимиз мумкин эди. Шунга қарамай, ҳали ҳаммаси олдинда, бизни жиддий кураш кутмоқда.
Мавсум якунидаги мақсадларимиз ҳақида гапирадиган бўлсам, 4-ўрин бизни қаноатлантириши ҳақида ҳеч қачон гапирмаганман. Бизга 3-ўрин керак. Умид қиламанки, чемпионат якунигача биздан юқорида фақат икки жамоа бўлиши учун етарлича очко тўплай оламиз», - дейди «МЮ» устози BBCга ўйиндан кейин.
Маълумот учун, АПЛ якунига 7 тур қолган бир пайтда «МЮ» ҳисобида 49 очко бўлиб, 5-ўринда бормоқда. 4-ўриндаги «Челси» ҳисобида 51, 3-ўриндаги «Лестер»да эса 55 очко мавжуд.
Узоқ кутилган илк ҳет-трик
25.06.2020
Антони Марсьяль АПЛ 31-туридан ўрин олган «Шеффилд»га қарши ўйинда учта гол урди. Бу футболчининг АПЛдаги илк ҳет-трики бўлди.
Марсьяль сэр Алекс Фергюсон «МЮ»дан кетгач, АПЛда ҳет-трик қайд этган жамоанинг илк футболчиси бўлди. Англия чемпионатида «МЮ» сафида охирги марта Робин ван Перси ҳет-трик қайд этган. Нидерландиялик суперюлдуз 2013 йил апрелда «Астон Вилла» дарвозасига учта гол урганди.
Франциялик Антони Марсьяль шу тариқа жорий мавсумда «МЮ» сафида урган голлари сонини 19тага етказиб олди. Бу ҳужумчининг бир мавсумда урган голлари сони бўйича шахсий рекорди ҳисобланади.
Бу ғалабадан сўнг «МЮ» очколари сонини 49тага етказиб олди ва жамоа 5-ўринда бормоқда. 4-ўриндаги «Челси» ҳисобида 51та очко бор ва Лондон клуби 31-тур ўйинини эртага «Манчестер Сити»га қарши ўтказади.
Маълумот учун, сэр Алекс Фергюсондан кейин «МЮ»ни Дэвид Мойес, Луи ван Гаал, Райан Гиггз, Жозу Моуриньо ва эндиликда Оле-Гуннар Сульшер бошқармоқда.