Умтити «Юнайтед» аъзосига айланиши мумкин
27.03.2019
«Барселона» ҳимоячиси Самюэль Умтити ёзда «Манчестер Юнайтед» аъзосига айланиши мумкин, деб маълум қилди Daily Mail.
Хабарда айтилишича, «МЮ» ҳимоя чизиғини кучайтириш устида бош қотирмоқда. Шу билан бир пайтда, «Барса» «Аякс» ҳимоячиси Маттейс де Лигт трансфери бўйича музокаралар ўтказяпти. Агар де Лигт ёзда Каталонияга келса, у ҳолда аввалроқ тиззасидан жароҳат олиб, анча вақт майдондан четда қолган Умтити «кўк-анорранглилар»нинг захира футболчисига айланиши мумкин. У бу мавсумда «Барса»нинг 10та ўйинида қатнаша олди, холос.
25 ёшли французнинг шартномаси 2023 йил ёзигача мўлжалланган. Унга «Арсенал» ҳам бефарқ эмаслиги ҳақида маълумот бор.
Погба: Муаммо нимада эди?
24.03.2019
Поль Погба декабрь ойида бош мураббий Жозе Моуриньонинг истеъфосига жамоа футболчиларининг таъсири бўлмаганини таъкидлади. Эслатиб ўтамиз, у португалиялик мураббий билан муносабатлари энг зиддиятли ўйинчилардан бири саналарди.
«Муаммо нимада эди? Биз ғалаба қозонмай қўйгандик. Шунинг учун ҳам улар бош мураббийни ўзгартиришга қарор қилишди. Натижа – энг муҳим омил.
Агар ғалабаларга эришиб, яхши натижалар кўрсатганимизда эса мураббий ўз лавозимида қолган бўларди. Бор гап шу», – деган Погбанинг сўзларини келтирмоқда Mirror.
Маълумот учун, Оле-Гуннар Сульшер жамоа бошқарувига келгач, франциялик хавбек АПЛда 8та гол муаллифи бўлди. Чемпионат стартидан Моуриньонинг истеъфосига қадар деярли тўрт ой давомида учта гол билан кифояланган эди.
Сульшер 3 нафар футболчининг трансферини сўраган
24.03.2019
Уле-Гуннар Сульшер раҳбариятга мурожаат қилиб, ёзда 3 нафар футболчининг трансферини сўраган.
Evening Standard хабарига кўра, норвегиялик мутахассис жамоаси таркибида «Наполи» ҳимоячиси Калиду Кулибали, «Спортинг» яримҳимоячиси Бруну Фернандеш ва «Боруссия» Д ҳужумчиси Жейдон Санчони кўришни истаяпти.
Сульшер ўз истагини «Манчестер Юнайтед» ижрочи директори Эд Вудвордга етказган.
Ҳозирча Сульшернинг «Манчестер Юнайтед» билан имзолаган шартномаси узайтирилмади. У мавсум якунига қадар амал қилади.
«Юнайтед» Холид Кулибалини сотиб олмоқчи
24.03.2019
«Юнайтед» ёзги трансферлар чоғида «Наполи»дан сенегаллик ҳимоячи Холид Кулибалини сотиб олмоқчи.
La Gazzetta dello Sport хабарига кўра, инглизлар клуби раҳбарияти неаполлик ҳамкасблари билан ушбу трансфер борасида учрашув ўтказишган. «Наполи» президенти Аурелио де Лаурентис 27 ёшли бу футболчининг трансфер нархи 150 млн евро эканини маълум қилган, «қизил иблислар» эса сўралган пулни тўлашга тайёр.
Кулибалини сотиб олиш ғояси Жозе Моуриньо «Манчестер Юнайтед»ни бошқарган вақтда ҳам мавжуд эди. Аммо ўтган йилнинг декабрида португалиялик мутахассис ишдан бўшатилди, унинг ўрнини Оле-Гуннар Сульшер мавсум якунига қадар бош мураббий вазифасини бажарувчи сифатида эгаллади.
Манба маълумотига кўра, «Манчестер Юнайтед»дан ташқари бу футболчига «Барселона», «Реал» ва «Челси» каби клублар ҳам харидор.
Кулибали «Наполи»га 2014 йилда «Генк»дан келганди. Ўшанда итальянлар ҳимоячи трансфери учун 8 млн евро тўлашганди. Унинг клуб билан амалдаги шартномаси муддати 2023 йил ёзига қадар тузилган.
21.03.2019
Поль Погба «Реал»га ўтиши мумкинлигини истисно этмаслигини билдирди.
«Ҳар доим айтганман, «Реал»да ўйнашни орзу қилмайдиган футболчи бўлмаса керак. «Реал» – жаҳондаги энг йирик клублардан бири. У ерда ҳозир Зидан ишлаяпти, у билан бир жамоада бўлиш ҳам бир орзу.
Ҳозир «Манчестер Юнайтед»даман. Келажакда нималар рўй беришини била олмаймиз. Ҳозир Манчестердаман ва бундан бахтлиман», – деган Погбанинг сўзларини келтириб ўтди Sky Sports.
Маълумот учун, Погбага собиқ клуби «Ювентус» ҳам даъвогар экани ҳақида айтиб келинади.
26 ёшли хавбек бу мавсум жамоасининг барча мусобақалардаги 37та ўйинида 25та голда бевосита қатнашди (14+11).
САФнинг сақичи салкам ярим миллион еврога сотилди
21.03.2019
«Юнайтед» собиқ бош мураббийи Алекс Фергюсоннинг клуб бошқарувида кечган сўнгги учрашувида чайнаган сақичининг бир қисми кимошди савдосида 390 минг фунтга (450 минг евро) сотилди, деб хабар беради The Sun.
Ўша ўйинда «қизил иблислар» «Вест Бромвич» билан дуранг натижа қайд этганди (5:5).
Маълум қилинишича, тушган даромад «Манчестер Юнайтед» хайрия жамғармаси ҳисоб рақамига ўтказилади.
Алекс Фергюсон «Манчестер Юнайтед»ни 1986-йилдан 2013-йилга қадар бошқарган. «Манкунианлар» унинг қўл остида Англия чемпионлигини 13 маротаба қўлга киритди, Англия Кубогида 5 марта ва Европа Чемпионлар Лигасида 2 марта ғалаба қозонган.
2010-йил 19-декабрида сер Алекс Фергюсон «қизиллар»ни энг узоқ вақт бошқарган мутахассис сифатида Метт Басби ўрнатган рекордни янгилади.
Погба: Сульшернинг қолишини истаймиз
20.03.2019
Поль Погба бош мураббий Уле-Гуннар Сульшер ҳақидаги фикрлари билан ўртоқлашди.
«Биз унинг қолишини истаймиз. Натижалар ажойиб. У билан муносабатларим жуда яхши, унинг футболчилар билан муносабатлари ҳам яхши.
Агар футболчи мураббийдан мамнун бўлса, мамнуниятни давом этишини истайди. Сульшер бунга муносиб. У клуб ҳақида ҳамма нарсани билади.
У футболчиларга ишончни қайтарди. Бу бизга эркинликни берди. Натижада футболдан завқ ола бошладик. Ваҳоланки, аввалги қониқарсиз натижалар туфайли, буни йўқотган эдик», – деб Погба сўзларини келтирмоқда Sky Sports.
«Юнайтед» Гризманн учун асосий даъвогар
20.03.2019
«Атлетико» ҳужумчиси Антуан Гризманн фаолиятини бошқа чемпионатда давом эттириши мумкин.
Испаниянинг «Sport» нашри берган маълумотга кўра, ҳозирда 27 ёшли француз учун «Манчестер Юнайтед» ва «Бавария» асосий фаворитлар бўлиб турибди. Рақобатда инглиз клуби бироз устунлик қилаётгани айтилмоқда.
Қайд этилишича, аввалроқ Антуанга бефарқ эмаслиги айтилган «Барселона» ва «Реал» клублари ҳозирча бу йўналишда амалий ҳаракатларга ўтишгани йўқ.
Аввалроқ Гризманнга «ПСЖ» қизиқаётгани, клуб уни Неймар ёки Килиан Мбаппе жамоани тарк этган тақдирда хариди қилиши мумкинлиги хабар қилинганди.
7-рақам эгасининг «Атлетико» билан шартномаси 2023 йилгача мўлжалланган.
Бэйл «Юнайтед»га керак эмас
19.03.2019
«Юнайтед» клуби «Реал» яримҳимоячиси Гарет Бэйлни сотиб олмоқчи эмас.
ESPN хабарига кўра, манкунианликларни футболчининг ёши (29) ва юқори трансфер қиймати қониқтирмаяпти. «Юнайтед» асосий эътиборни ёш иқтидорларнинг трансферига қаратмоқчи.
Аввалроқ, «Реал» Бэйлни ёзда сотиб юбормоқчи экани ҳақида хабарлар тарқалган эди.
Жорий мавсумда Бэйл «Реал» таркибида 35та ўйин ўтказиб, 14та гол урган ва 5та голга ҳаммуаллифлик қилган. Унинг шартномаси 2022 йилгача мўлжалланган. Трансфер қиймати 70 миллион евро атрофида.
Санчес «Ювентус» қизиқиш доирасида
19.03.2019
Алексис Санчес «Ювентус» қизиқиш доирасида бўлиб турибди, деб хабар бермоқда Calcio Mercato.
Таъкидланишича, Турин клуби чилилик футболчини ўз таркибига қўшиб олишга қарши эмас, аммо бунинг учун у маошининг сезиларли равишда камайишига рози бўлиши керак.
Аввалроқ «МЮ» бош мураббийи Оле-Гуннар Сульшер 30 ёшли Алексисни ўз режаларига киритмагани, шу туфайли Санчеснинг жамоадаги келажаги мавҳум бўлиб тургани хабар қилинган эди. Инглиз матбуотига кўра, у ўз агентларидан янги жамоа топишни сўраган. У Манчестердан кетиш учун маошининг камайишига ҳам рози.
Ҳужумчи Премьер-лиганинг бу мавсумида 17та ўйинда қатнашиб, 1+2 маҳсулдорлик натижаси билан кифояланган.