Мбаппе: Мен ухлай олмадим
11.03.2019
«ПСЖ» клуби ҳужумчиси Килиан Мбаппе жамоасининг Европа чемпионлар лигаси 1/8 финал босқичида «Манчестер Юнайтед»га мағлуб бўлиб мусобақани тарк этгани ҳақида фикр билдириб ўтди.
«Мен ҳайрон қолдим, сўз йўқ. Мен ухлай олмадим. Қолганларда ҳам шунақа бўлган бўлса керак деб ўйлайман. Жуда ҳам қийин. Биз мақсадга етиш учун роса меҳнат қилдик. Афсусдамиз. Энди ўзимизга келиб мавсумни якунлашимиз лозим.
Ростини айтсам, чемпионлар лигаси бизнинг мақсадимиз эди, айнан шунинг устида ишлаётган ҳам эдик. Мухлислар ҳам биз билан эди. Стадион тўлди ва улар ўз ишини қилишди. Ҳақиқатдан ҳам ажойиб муҳит бор эди, бироқ биз кечани барбод қилдик.
Бизга шубҳа билан қараётганлар кўп. Лекин мен ҳали ҳам бизнинг лойиҳамизга ишонаман. Мухлислар учун яхшироқ ютуқларни қўлга киритишимизга ишонаман», - дейди Мбаппе.
Коутиньо «Юнайтед»га ўтишни истамоқда
10.03.2019
Бразилиялик яримҳимоячи Филиппе Коутиньо «Манчестер Юнайтед»га ўтишни истамоқда.
Mirror нашри хабарига кўра айни вақтда «Барселона» аъзоси бўлган футболчи дўстлари билан суҳбат вақтида Каталония клубида ўзини намоён эта олмагани ҳақида гапирган. Филиппе «МЮ» сафидаги бир неча футболчи билан ҳам алоқа ўрнатган ва бу унинг келажаги бўйича тахминларни юзага келтирган.
Коутиньо премьер-лигани соғинганини айтган, аммо у ҳозир ўзини собиқ жамоаси «Ливерпуль»га керак деб ҳисобламаяпти.
Айни вақтда 26 ёшда бўлган футболчи «Барселона»га 2018 йилнинг январида «Ливерпуль»дан 135 миллион евро эвазига трансфер қилинганди. Шу вақтгача Коутиньо каталонлар клуби учун жами 61 ўйинда майдонга тушган ва 18 гол урган.
Сульшер учун 7 миллион евро
10.03.2019
«Манчестер Юнайтед» «Мольде» клубига Оле Гуннар Сульшер учун компенсация сифатида 7 миллион евро тўлайди.
The Mirror хабарига кўра, инглизлар ушбу норвегиялик мутахассисни мавсум якунланганидан кейин ҳам жамоада олиб қолмоқчи.
Сульшер ўтган йилнинг декабрида мавсум якунига қадар мураббий вазифасини бажарувчи сифатида олиб келинганди. Энди эса клуб раҳбарияти муваффақиятли натижалар туфайли, Сульшер билан кўп муддатли битим тузишга қарор қилган.
Маълум бўлишича, Сульшернинг «Мольде» билан шартномаси у Манчестерга кетаётганида бекор қилинганди. «Қизил иблислар» эса шведларга 7 миллион еврони ўз ихтиёрига кўра бермоқда.
Қайд этиш керакки, Сульшер бошчилигида «МЮ» Англия чемпионатида ва ички кубокларда бирор марта мағлуб бўлмади, Чемпионлар лигасида «ПСЖ» тўсиғидан ўтиб, чорак финалга чиқди.
Мен пенальти бермаган бўлардим, лекин...
09.03.2019
«ПСЖ» ҳамда «Манчестер Юнайтед» ўйини тақдирини 90+2-дақиқада белгиланган пенальти ҳал қилганини кўрдингиз. Мухлислар «ПСЖ» дарвозасига белгиланган ўша пенальтини кенг муҳокама қилишди. Кимдир пенальти бор эди деяпти, кимдир эса ҳимоячининг қўли табиий ҳолатда бўлганини айтмоқда. Бу борада ҳакамлар нима дейди?
Саудия Арабистони лигасида ҳакамлик корпусини бошқарувчи англиялик машҳур ҳакам Марк Клаттенбург «Daily Mail» нашридаги колонкасида ушбу вазият бўйича фикрларини билдириб ўтди.
«Дамир Скомина ўша вазиятда пенальти бериб, хато қилди дейиш тўғри эмас. Чунки ҳакам УЕФАнинг янги қоидаларига кўра тўғри қарор қабул қилди. Масалан, мен Премьер-Лига ўйинларида бу ҳолат учун пенальти бермаган бўлардим. Чунки Кимпембе қўли билан атайлаб ўйнагани йўқ. Бироқ пенальти Чемпионлар Лигаси ўйинида белгиланди.
УЕФА қўл танага ёпишиб турмаган ҳар қандай ҳолатда эҳтиётсизлик учун пенальти берилишини талаб қилмоқда. Расмийларнинг қарорларини ҳурмат қилиш керак. Ҳакам вазиятни секинлаштирган лавҳада кўрганини ҳам унутмаслик керак. Футболчи тескари қараган вақтда қўлини назорат қила олмайди, лекин яна такрорлайман, ҳакам УЕФАнинг янги талабларига кўра қарор чиқарган», дейди Клаттенбург.
«CBS Sports» нашри журналисти Рожер Гонсалес Жаҳон чемпионати финалини бошқарган ҳакам билан бу борада гаплашганини ёзди. У ҳакамнинг ким эканини айтмаган, лекин гап катта эҳтимол билан 2010 йилги мундиал финалини бошқарган Ҳовард Уэбб ҳақида кетмоқда. Хуллас, ўша «сирли» ҳакамнинг фикрича, «ПСЖ» дарвозасига пенальти ҳақли тарзда белгиланган:
«Сиз ўйин охирида бундай ҳолат учун пенальти берилиши керакми деяпсиз, лекин ҳакам вазият қачон содир бўлганига эътибор бермаслиги керак. 1-дақиқами, 90-дақиқами, бунинг фарқи йўқ. Пенальти ҳақида гапирадиган бўлсам, бу ерда ҳакам шубҳасиз тўғри қарор қабул қилди».
Англияда журналист ва экспертлар катта ўйинлардан кейин ундаги вазиятларни атрофлича муҳокама қилишади. Альбионда энг машҳур футбол эксперти Гари Линекер эканини биласиз. Линекер «BT» телеканалидаги ўйиндан кейинги шоуга Рио Фердинанд, Майл Оуэн каби футболчилар ва бир неча ҳакамни таклиф қилди. Келинг, уларнинг ҳам фикрларига қулоқ тутсак.
«Холис бўлиб гапирадиган бўлсам, менимча, бу пенальти эмас. Тўп шунчаки унинг қўлига тегиб, бурчакка қараб кетди», дейди ҳам «МЮ», ҳам унинг азалий рақиби «Ливерпуль»да ўйнаган собиқ футболчи Майкл Оуэн.
«Тўғри, мен бу ҳолатни пенальти эмас деган бўлардим, лекин ҳимоячи сифатида тўпга орқангни қаратдингми, бунинг учун жазоланасан», дейди «МЮ»нинг собиқ сардори Рио Фердинанд.
«Кимпембе тўпга тескари турган бўлса-да, қўл ҳаракати билан танасини каттароқ қилди, яъни қўл тўпни тўсиш учун ишлатилди. Бу шубҳасиз қўл билан ўйин эди. VAR менимча, фақат вазият жарима майдончаси ичида содир бўлдими ёки ташқарисидами деган саволга жавоб олиш учун ишлатилди», дейди собиқ ҳакам Петер Уолтон.
Лукаку — Полдан ўпкалаган
09.03.2019
Ромелу Лукаку 2 март куни АПЛ доирасида «Саутҳэмптон»га қарши кечган ўйинда (3:2) жамоадоши Поль Погбанинг ҳаракатларидан норози бўлган.
«Олд Траффорд»даги баҳснинг 94-дақиқасида (ҳисоб 3:2) майдон эгалари пенальти тепиш имкониятига эга бўлишганди. Бунга қадар Лукаку 59- ва 88-дақиқаларда гол урган, ўн бир метрлик нуқтадан муваффақият қозонса, ҳет-трик қайд этган бўларди. Аммо жамоанинг пенальти тепиш бўйича штатдаги футболчиси Погба Лукакуга бу имкониятни бермади ва уни ўзи амалга ошириб, гол ура олмади.
The Sun`нинг ёзишича, Ромелу бу воқеа сабабли Полдан ўпкалаган. Бельгиялик ҳужумчи ўйиндан кейин франциялик хавбек баланд овозда тортишган, натижада вазиятга бош мураббий Оле-Гуннар Сульшер аралашишига тўғри келган.
Нашр манбасига кўра, Лукаку жамоадаги ўзига яқин футболчилардан бири бўлган Погбага собиқ мураббий Жозе Моуриньо билан зиддиятлари вақтида уни қўллаб-қувватлагани ҳақида эслатган. У, шунингдек, Погбага «Ливерпуль» ҳужумчиси Муҳаммад Салоҳни намуна сифатида кўрсатган – Салоҳ «Арсенал» билан ўйинда жамоадоши Роберто Фирминога пенальтидан гол уриб, ҳет-трик қайд этишга имкон берганди.
Эслатиб ўтамиз, манкунианликларни бу ҳафта АПЛда «Арсенал»га (якшанба) қарши ўйинлар кутмоқда.
«Юнайтед» Сульшерни олиб қолмоқчи!?
09.03.2019
«Манчестер Юнайтед» клуби раҳбарияти Оле-Гуннар Сульшерга янги шартнома таклиф қилмоқчи.
Эслатиб ўтамиз, норвегиялик мутахассис «қизил иблислар» билан мавсум охирига қадар шартнома имзолаган эди. Унга кўра, мавсум тугаганидан сўнг, у Норвегиянинг «Мольде» клубига қайтиши лозим.
«Манчестер Юнайтед» раҳбарияти Сульшерга йилига 7,5 миллион фунт маош таклиф қилмоқчи. Бу аввалги бош мураббий Жозе Моуриньоникидан 2 баробар кам, аммо «Мольде» клуби таклиф қилаётган қийматдан 10 баробар кўпдир.
Айни пайтда «Манчестер Юнайтед» АПЛ жадвалида 4-ўринда боряпти. Жамоа Англия Кубоги ва Чемпионлар Лигасидаги иштирокини ҳам давом эттирмоқда.
Англияда янги соврин жорий қилинди
02.05.2018
Англия премьер-лигаси Cadbury шоколад ишлаб чиқариш компанияси ҳомийлигида янги совринни жорий қилди. Бу ҳақда ташкилот расмий сайти хабар тарқатди.
Манба берган хабарга кўра, эндиликда Премьер-лига якунида энг кўп голли пасни амалга оширган футболчига «Йилнинг энг яхши плеймейкери» соврини тақдим этилади. Ушбу совринни биринчи бўлиб «Манчестер Сити» ва Бельгия терма жамоаси яримҳимоячиси Кевин Де Брюйне қўлга киритишга яқин турибди.
Эслатиб ўтамиз, шу кунга АПЛ Carling билан энг чиройли гол, EA Sports билан ойнинг энг яхши футболчиси ва Barclays билан ҳамкорликда ой мураббийини аниқлаб келмоқда. Уларнинг сафига энди Cadbury ҳам қўшиладиган бўлди.
Антони Марсиал «Челси»да!?
02.05.2018
Антони Марсиал «Челси»га ўтиши мумкин.
The Telegraph хабарига кўра, лондонликлар футболчининг трансферига қизиқмоқда.
Аввалроқ, «Ювентус» франциялик учун 50 миллион евро таклиф қилган эди. Аммо, «Челси» ва «Тоттенҳэм» клублари ҳам шунча маблағдан айрилиб, Марсиал билан шартнома имзолашга тайёрлигини билдирган.
Ёзда «Челси» Батшуайи, Зума, Кенеди, ван Гинкель ва Пиазонни сотиб, Марсиал учун пул тўплашни режалаштирмоқда.
Погба: Англия кубогини қўлга киритмоқчимиз
30.04.2018
Поль Погба «Арсенал»га (2:1) қарши кечган Англия чемпионатининг 36-тур учрашувидан сўнг фикрларини билдирди.
«Биз нимага лойиқ бўлсак, шуни қўлга киритдик деб ҳисоблайман. Ҳужумлар бўлди, голли вазиятлар юзага келди ва Феллайни жарима майдончасида яхши ҳаракатланишини билардик.
Жамоа яхши ўйнади. Биз қимматли очколарни қўлга киритди. АПЛ ғолиблиги кўнгилдагидек натижа бўларди, аммо биз доим иккинчи эдик.
Иккинчи ўринни эгаллаб, Англия кубогини қўлга киритмоқчимиз», – деди Погба.
Жозе Моуриньо: Яна тўрт очко керак
30.04.2018
Жозе Моуриньо «Арсенал»га қарши ўйиндан сўнг ўз фикрларини билдириб ўтди.
«Менимча, бу ўйин дуранг билан якунланганда адолатсизлик бўларди. «Арсенал» яхши ўйнади, улар ҳимояда тартибли ҳаракатланди. Лекин бир жамоа бўлиб ғалаба қозонишни истадик. Ҳа, «МЮ»га бироз омад кулиб боқди, лекин сўнгги 20 дақиқа рақибга нисбатан кучлироқ ҳаракатландик.
Биз уч очкони қўлга киритиб, Европа чемпионлар лигасида ўйнаш ҳуқуқини деярли қўлга киритдик. Бироқ иккинчи ўринда қолиш учун яна тўрт очко йиғишимиз талаб этилади», - дейди Моуриньо.