Маруан Феллаини «Юнайтед»да қолади!?
30.04.2018
Маруан Феллаини клуб билан янги шартнома имзолайди. Бу ҳақда бош мураббий Жозе Моуриньо хабар берган.
Маълумки, футболчининг амалдаги шартномаси шу йилнинг ёзигача мўлжалланган ва у бошқа клубга ўтиши мумкинлиги айтилган эди.
«Биз деярли янги шартнома имзоладик, аммо ҳали байрам қилишимга эрта. Чунки бу «деярли» етарли эмас. Қачонки, клуб ва футболчи шартномани имзоласа, шунда хурсанд бўлишим мумкин» - деб Моуриньо сўзларини келтирмоқда ВВС.
Эслатиб ўтамиз, Феллаини 2013 йилда «Эвертон»дан «Манчестер Юнайтед»га 27,5 миллион фунтга ўтган эди. Шу пайтгача у жамоа таркибида 154та ўйин ўтказиб, 19та гол урган.
Венгер: Cулҳ билан кетмоқчиман
29.04.2018
«Арсенал» бош мураббийи Арсен Венгер эртага бўлиб ўтадиган АПЛ доирасида «Манчестер Юнайтед»га қарши ўйин олдидан рақиб бош мураббийи Жозе Моуриньо ҳақида фикр билдирди.
«Уни жуда ҳурмат қиламан. Сиз, журналистлар охирги ҳафталарда мени тинч қўйишингиз керак ва охирги жанжалга етакламаслигингиз керак. Мен сулҳ билан кетмоқчиман.
Моуриньо – ажойиб мураббий. Мен ҳамма билан хайрлашяпман. Францияда «au revoir» деймиз, бу «кўришгунча» дегани.
«Олд Траффорд»да мени яхши кутиб олишса, ҳурсанд бўламан. 22 йилдавомида кўблаб қизиқарли курашлар ўтди. «МЮ» - фантастик ўйинчиларга эга ақлбовар қилмас клуб.
Хаёлимда ортга қайтсам, «МЮ»да қандай зўр жамоа бўлганини кўраман. Уларда Гиггз, Бекҳэм, Роналду ва Скоулз бор эди. Вақт ўтиб буни тушуниб боряпман», - дейди Венгер.
Моуриньо: Совринсиз қолмаганман
28.04.2018
Жозе Моуриньо совринсиз ўтаётган мавсум ғалати эканини айтди.
«Фаолиятимда жуда кўп ғалабаларга эришдим. Ҳар доим ғалабалар ва ғалабалар бўлган. Мана деярли 1 йилдан бери соврин йўқ. Ҳеч қачон соврин ютмаган одамлар учун нималар муҳим эканини тушуниб етмоқдаман.
Ҳеч қачон ҳеч нарса ютмаганлар, ҳар доим ютиб, кейин совринсиз қолганлардан ҳам ёмон. Умримда совринсиз ўтказган мавсумим бўлмаган. Агар Англия Кубогида ғалаба қозонмасам, финалга чиққанимиз оддий имконият бўлиб қолади» - деб Моуриньо сўзларини келтирмоқда ESPN.
Эслатиб ўтамиз, Англия Кубоги финали 19 май куни ўтказилади ва унда «Манчестер Юнайтед» «Челси» билан беллашади.
«МЮ» Марсиални сотишга тайёр
28.04.2018
Антони Марсиал бошқа клубга ўтиши мумкин.
Бош мураббий Жозе Моуриньо 22 ёшли футболчини ёзда сотиб юборишга тайёр, деб хабар беради Calciomercato.
Айни пайтда франциялик иқтидор учун «Ювентус» ва «Бавария» курашмоқда. Аммо туринликларнинг имконияти юқори баҳоланмоқда.
«Манчестер Юнайтед» Марсиал учун 50 миллион евро сўраяпти, бу эса «Ювентус»га маъқул келган.
Моуриньо: Салоҳни қўйиб юбормаган эдим
28.04.2018
Жозе Моуриньонинг маълум қилишича, «Челси» раҳбарияти ярим ҳимоячи Муҳаммад Салоҳни «Рома»га қўйиб юбориш ҳақидаги қарорни мустақил равишда қабул қилган.
«Бу мен ҳақимда гапиришаётган яна бир ёлғон нарса. Одамлар мен Салоҳни қўйиб юборганим ҳақида гапирмоқда, бироқ ҳаммаси аксинча – мен уни сотиб олгандим. Мен «Челси»га Салоҳни сотиб олиш ҳақида гапирган инсон эдим.
Муҳаммад «Челси»га келганида, у ҳали бола эди. У на жисмонан, на руҳан тайёр эмасди. У ижтимоий ва маданий нуқтаи назардан ўзини йўқотиб қўйгандек ҳис этган, унга жуда қийин бўлган. Биз уни ижарага беришга қарор қилдик, у ҳам бу ҳақда сўраганди. Салоҳ тажриба орттириш учун майдонда кўпроқ ҳаракат қилишни хоҳлаганди. Биз уни «Фиорентина»га юбордик, ҳамда у ўша ерда кучли футболчига айлана бошлади.
Айнан «Челси» уни қўйиб юборишга қарор қилди. Кимдир мен Салоҳни қўйиб юборганлардан бири бўлганим ҳақида гапираётган бўлса, у ёлғон сўзламоқда. Мен уни харид қилдим ва ижарага бердим, сабаби бу керакли нарса эди. Мен «Челси»да вингерлар етарли, деган фикрда эдим. Улардан баъзилари ҳамон ўша ерда ўйнамоқда, масалан Виллиан ва Азар. Ўшанда улар умуман бошқа даражада эди.
Салоҳни ижарага бериш ҳақидаги қарор жамоавий бўлган. Бироқ, уни қўйиб юбориш ва олинган пулларни бошқа футболчини харид қилиш учун сарфлаш ҳақидаги қарор меники эмасди. Ҳаттоки ўша қарор мендан чиққанда ҳам, биз футболда доимий равишда хатога йўл қўямиз. Жуда кўп пайтларда ўйинчилар ҳеч ким кутмаган даражада ривожланиб кетади. Бошқа футболчилар эса, аксинча, кутилаётган даражага чиқа олмайди. Шунинг учун мен бу хато бўлган, деган фикрда эмасман, бу ишимизнинг бир қисми, холос.
Мен ҳақиқатдан ҳам Салоҳни таркибга қўшиб олгандим, лекин уни қўйиб юбормаган эдим, лекин бу ҳеч қандай аҳамиятга эга эмас. Муҳими, у фантастик ўйинчи. Мен ҳозирда у билан рўй бераётган барча нарсадан жуда хурсандман, айниқса, у голларни қандай ураётгани одамни қувонтиради. У бизга иккита ўйинда ура олмаган голларни урмоқда», - дея Моуриньонинг сўзларини келтиради ESPN.com.br.
Погба: Бу мен учун чорлов
27.04.2018
Поль Погба матбуот вакиллари ва мухлисларнинг ўз ўйинига нисбатан адолатсиз муносабатда эканини айтди.
«Мени бошқа яримҳимоячилар каби баҳолашмаяпти. Менга голлар ва узатмаларимга қараб баҳо беришяпти. Мен ўйинни зўр ўтказишим мумкин, аммо гол урмасам ёки голли узатмани амалга оширмасам, «ёмонмас» деб қўйишади.
Агар бошқа футболчи шундай ўйнаса, уни ўйиннинг энг яхши футболчиси деб топишяпти. Аммо, бу мени кўпроқ ишлашга мажбур қилмоқда. Бу мен учун чорлов ва уни қабул қиламан.
Мен гол уришга ва голли узатмаларни амалга оширишга ҳаракат қиламан. Аммо яримҳимояда ҳам ишламоқчиман» - деб Погба сўзларини келтирмоқда Sky Sport.
Жорий мавсумда Погба «Манчестер Юнайтед» таркибида 32та ўйин ўтказиб, 5та гол урган ва 11та голга ҳаммуаллифлик қилган.
Невилл: «Арсенал»ни Диего Симеоне эгаллаши керак
27.04.2018
«Манчестер Юнайтед»нинг собиқ футболчиси, айни вақтда телевидениеда футбол эксперти сифатида ишлаётган Гари Невиллнинг ҳисоблашича, Арсен Венгер ўрнини Лондоннинг «Арсенал» жамоасида «Барселона»нинг собиқ мураббийи Луис Энрике эмас, «Атлетико» мураббийи Диего Симеоне эгаллаши керак.
«Луис Энрике муваффақиятли ишлаган, аммо гап Чемпионлар лигасига қайтиш ҳақидами ёки Премьер-лига ғолиблиги?
АПЛни ютиш учун, «Арсенал»да фақат икки вариант бор: бир бош баланд сакрай оладиган мураббийни чақириш, ёки начать «Манчестер Сити», «Манчестер Юнайтед» ва «Челси» каби харажат қилиш. Иккинчи вариантнинг эҳтимоли кам.
Менимча, «Арсенал»га Диего Симеоне жуда мос тушади. У кўп йиллардан буён Чемпионлар лигасида ва Примерада бюджети «Реал» ёк «Барселона»никидек бўлмаган жамоа билан катта натижаларга эришди», – дея Невиллнинг сўзларини келтирган Sky Sports.
Моуриньо: Арсенни жуда ҳам ҳурмат қиламан
27.04.2018
«Манчестер Юнайтед» бош мураббийи Жозе Моуриньо анчадан буён «Арсенал» устози Арсен Венгер билан чиқишолмай юрибди.
Бироқ, португалиялик мутахассис франциялик ҳамкасби билан ярашиб олишга тайёрлигини айтди.
«Мен Арсенни жуда ҳам ҳурмат қиламан. Агар у ҳурматимнинг ярмича мени ҳам ҳурмат қилса, келажакда дўст бўлишимиз мумкин.
2004 йилда Англияга келганимда, у чемпион, мен эса ундан унвонни тортиб олмоқчи эдим. Чунки, бу футбол. Аммо бу уни ҳурмат қилмайман дегани эмас.
Сўнгги икки йилда анча зиддиятга бордик, бироқ энди фаолиятимнинг бошқа босқичига қадам қўйдим, ўзгардим.
Афсуски, Алекс Фергюсондан кейин яна бир ҳурматли инсон Премьер-лигани тарк этмоқда», – деб Моуриньо сўзларини келтирмоқда Skysports.
Рафаэл: Ван Гаал ёмон мураббий эмас
20.04.2018
«Манчестер Юнайтед»нинг собиқ ўнг қанот ҳимоячиси Рафаэл 2015-16 йилларда жамоани бошқарган Луи ван Гаал ҳақида фикрлари билан ўртоқлашди.
«Луи ван Гаал бош мураббий этиб тайинланганини эшитганимизда, тўрт ёки беш танишим, улар ичида футболчилар ҳам бор эди, менга телефон қилишди ва Луининг бразилиялик футболчиларни ёқтирмаслигини айтишди. Улар менга «Барселона»да Ривалдо билан юзага келган воқеани ҳам эслатишди. Ишонгим келмади.
Лекин биринчи мавсумдаёқ у мени ёнига чақириб, «Кетишинг мумкин» деди. Атиги бир дақиқа гаплашдик холос. Шу билан тамом. Манчестерни тарк этишим учун бирмунча вақт керак бўлди, лекин шунда ҳам у ердан кетишим осон эмасди. «Манчестер Юнайтед» клуби, шаҳри, мухлислари, умуман клубга тегишли бўлган ҳар бир нарса менга ёқар, шунинг учун ажралиш осон бўлмаган.
«Ван Гаал ёмон мураббий эмас, аммо унинг характери менга ёқмаган. Менга жамоа ёқарди, яъни мен фақат у туфайли тарк этишга мажбур бўлдим. Мен жамоани яхши кўрсам-да, Луи билан муносабатлар шу қадар оғир эдики, тезроқ бошқа жамоага ўтишни истадим», деган футболчи.
Эслатиб ўтамиз, Рафаел Да Силва 1990 йилда туғилган ва 18 ёшида эгизаги Фабио билан биргаликда «Манчестер Юнайтед» академиясига қабул қилинганди. У 2008-2015 йиллар мобайнида клуб сафида ҳаракат қилиб, 3 марта АПЛ чемпионлигига эришган. 2015 йилда Франциянинг «Лион» клубига сотиб юборилган.
Жозе Моуриньо: Мен дангасаман
06.01.2018
Жозе Моуриньо нима сабабдан Манчестердан уй олмаганини айтиб ўтди. Ушбу ҳолатдан манкунианликларнинг бир қатор мухлислари норози бўлишганди.
«Мен мухлисларни тушунмайман. Агар уларни менинг шароитим безовта қилса, шуни айтишим мумкинки, менинг шароитим яхши. Мен дангасаман, шу сабаб меҳмонхонада яшашни маъқул кўраман. Барча қулайликларга эга бўлган меҳмонхонада истиқомат қиламан ва у ерда барча шароитлар етарли.
Агар улар хонадонда яшашимни хоҳлашса, мен улар учун бу ишни қилишим мумкин. Аммо у тақдирда мен бахтсиз бўламан. Бахтсиз одам эса яхши ишлай олмайди», — дейди Моуриньо.