Руни: Бир қарорга келаман
26.05.2017
Уэйн Руни кўплаб клублардан таклифларга эгалигини ва ўз фаолиятини давом эттириш ҳақидаги қарорни яқин ҳафталар ичида қабул қилишини маълум қилди. 31 ёшли футболчининг манкунианликлар билан шартномаси 2019 йил ёзигача мўлжалланган.
«Менда инглиз клубларидан ҳам, хорижий клублардан ҳам таклифлар бор. Мураббий қолишимни истамоқда, бироқ… Мен шунчаки футбол борасидаги қарорни қабул қилишим керак бўлади ва мен буни қилмоқчиман. Мен яқин орада оилам даврасида бир қарорга келаман.
Мен фаолиятим давомида иккита инглиз клуби учун ўйнаганман ва бу клублар мен Англияда ўйнаган ягона клублар бўлиб қолади.
Албатта, мен 10 йил аввалги ўйинчимасман. Бироқ менда жамоага ёрдам бериши мумкин бўлган жиҳатлар сақланиб қолган. Ҳар доим ўйнаш ва майдонга чиқишни истайсан ва агар ёшроқ бўлганимда ҳозирги ҳолатимдан ранжиган бўлардим. Бироқ клубга ёрдаминг тегиши мумкинлиги ҳақида ўйлаш керак», деб Рунининг сўзларини келтириб ўтди Daily Mail нашри.
Моуриньо: Фаолиятим омадли кечмоқда
26.05.2017
«Манчестер Юнайтед» жамоаси бош мураббийи Жозе Моуриньо яна 15 йил давомида ишламоқчи. BT Sport телеканали эфирида у ҳали йўлнинг ярмида эканини айтиб ўтди.
«Фаолиятим омадли кечмоқда. Мен Испанияда, Италияда, Португалияда ва Англиядаги дербиларда қатнашдим. Барча кубоклар финалларида қатнашдим ва совринлар учун курашдим. Бу зўр ҳаётий тажриба. Бугун ҳам фаолиятимни мамнуният билан якунлашим мумкин, аммо ҳали йўлнинг ярмидаман. Олдинда яна 15 йил бор.
«Манчестер Юнайтед» ҳақида гапирсам, мен ҳали ҳеч нарса қилмадим. Масалан, Басби ва Фергюсон – бу икки афсона кўпгина соврин ютган. Уларнинг ютуқларига қарар эканман, мен ҳали ҳеч қандай ютуққа эришмаганимни биламан. Мен «МЮ»да олган совринлар ҳали ҳеч нарса эмас, бу етарли эмас.
Баъзида мен ортга қарайман ва тушунаманки, кўп иш бажариб қўйдим. Бу кўпчилик аввал қилмаган ишлар. Ҳеч қайси менежер Испания, Италия ва Англия чемпионатларида мен кўрсатган натижаларни кўрсата олмаган.
Биз «Андерлехт»ни ютганимизда, менга айтишдики, 10 мартадан еврокубок ярим финалларида иштирок этган сэр Алекс ва Жованни Трапаттонининг натижаларини такрорлабман. Аммо улар аллақачон фаолиятларини якунлашган. Менда эса ҳали яримфиналларда ўйнаш учун имконият бўлади. Менда фахрланиш учун сабаб кўп», — деган Моуриньо.
#ACITYUNITED
25.05.2017
Манчестер шаҳрининг икки азалий рақиблар «Манчестер Юнайтед» ва «Манчестер Сити» 23 май куни шаҳарда содир бўлган терактда жабр чекканлар учун ёрдам бериш мақсадида бир ёқадан бош чиқаришди.
«Манчестер Сити» расмий сайти берган хабарга кўра, манкунианлар биргаликда терактдан жабр кўрганларни қўллаб-қувватлаш мақсадида ташкил қилинган We Love Manchester Emergency Fund жамғармасига 1 миллион фунт стерлинг миқдорида маблағ ажратишган.
Эслатиб ўтамиз, «Манчестер-Арена» стадионида америкалик қўшиқчи Ариана Гранде концерт бераётган вақтда портлаш содир этилган. Теракт оқибатида 22 киши ҳалок бўлган, 100дан ортиқ одам яраланган. Ушбу қабиҳликни ташкил этишни ИШИД ўз бўйнига олган.
«Манчестер Юнайтед» қанча фойда кўрди
25.05.2017
«Манчестер Юнайтед» футболчилари Европа Лигасидаги ғалаба эвазига жами бўлиб 38 млн фунт стерлинг миқдорида фойда кўришди. Бу ҳақда The Times нашри хабар тарқатди.
Манба берган хабарга кўра, «МЮ» футболчилари шартномасида ҳафтасига 20 минг фунт стерлингдан кўпроқ оладиганларнинг барчаси Европа чемпионлар Лигаси йўлланмасини қўлга киритгани учун қўшимча маош сифатида 25 фоиз устама ишлаб оладиган бўлишган. Шунингдек футболчилар УЕФА томонидан мукофот сифатида 1 млн фунт стерлингни қўлга киритишган.
Эслатиб ўтамиз, Европа Лигаси финалида «Манчестер Юнайтед» Нидерландиянинг «Аякс» клубига қарши майдонга тушиб, 2:0 ҳисобида ғалаба қозонган ва келгуси мавсумда ЕЧЛда иштирок этиш масаласини ижобий ҳал қилганди.
Glory Glory Manchester United !!!!!
25.05.2017
Қадирли дўстлар ва «Манчестер Юнайте» жамоасининг ашаддий муҳлисларни барчангизни Европа Лигаси ғолиблиги билан табриклаймиз. Жамоамизни тинимсиз равишда қўллаб-қуватлагинингиз учун алоҳида ташаккур.
Келаси мавсумда «Манчестер Юнайтед» жамоасидан ва футболчилардан чиройли ўйинлар ва ажойиб ғалабаларни кутиб қоламиз.
Биз билан бирга бўлаётганингиз учун раҳмат. Бизни кузатишда давом этинг.
Олға «Манчестер Юнайтед», Олаға «Чемпионлар» !!!!
Glory Glory Manchester United !!!!!
Гризманн: «Атлетико»дан кетишга тайёрман
24.05.2017
«Атлетико» ҳужумчиси Антуан Гризманн ўз китоби тақдимотига бағишланган матбуот анжумани вақтида маълум қилдики, у ёзги трансферлар вақтида Мадриддан кетишга тайёр. ОАВда «Манчестер Юнайтед»га йўл олиши айтилаётган франциялик футболчининг сўзларига кўра, у совринлар қўлга киритиш учун шундай қадам ташлашга тайёрлигини айтган.
«Биз Примерада учинчи бўлдик, клубнинг мақсади шундай эди, аммо футболчи кўпроғини истайди. Мен шунчаки яхши футбол ўйнаш ва кўп голлар уриш етарли эмас деган хулосага келмоқдаман. Совринлар қўлга киритиш – менинг келажак учун мақсадим шу ва бу борада ёзда янги қадам ташламоқчиман.
«Атлетико» билан Чемпионлар лигаси ярим финалига чиқдик. Биз ҳамиша мақсадга жуда яқин бўламиз, аммо нимадир етишмайди. Клуб бу вазиятда нима қилиш кераклигини кўриб чиқиши керак. Бу трансферларга боғлиқ. Барча, жамоадошларим ҳам, журналистлар ҳам, оилам ҳам, мен совринлар ютишни исташим ҳақида билишади. Мен шундай ҳиссиётга эга бўлишим керак. Кўрамиз, воқеалар ривожи қандай кечаркан.
Бугунги кунга келиб, агар кетишимга тўғри келса, бу муаммо бўлмайди. Менинг келгуси жамоам ҳамма айтаётганидек Англияда бўлиши мумкин. Германия, Хитой ёки … Мен «Атлетико»дан кетишга тайёрман», — дея Гризманнинг сўзларини келтирган Get Football News France.
Анри: Погба қўп нарсага қодир
23.05.2017
Лондоннинг «Арсенал» футбол жамоаси собиқ ҳужумчиси Тьерри Анрининг фикрича, «Манчестер Юнайтед» бош мураббийи Жозе Моуриньо ярим ҳимоячи Поль Погбадан етарли даражада самарали фойдалана олмаяпти.
«Погба учун мавсум қийин бўлди. Моуриньо ундан нотўғри позицияда фойдаланмоқда. Погба жуда чуқур ҳаракат қилмоқда, у юқорироқда ўйнашга ёки чап қанотда ҳаракат қилишга ўрганган. Агарда Поль чуқурроқ ҳаракат қилса, бу позиция уни чеклаб қўяди. Футболчи шундай суммага харид қилинар экан, кишилар ҳар доим унга жуда диққатлик билан қарашади ҳамда имконият туғилди дегунча танқид қилишади.
Ўйлашимча, Погбанинг «МЮ»даги иккинчи мавсуми анча ёрқинроқ кечади. Поль анча кўпроқ нарсага қодир", - дея Анрининг сўзларини келтиради Sky Sports.
Невилл: Руни кетиши керак
23.05.2017
«Манчестер Юнайтед» клуби собиқ ҳимоячиси Гари Невилл ҳужумчи Уэйн Рунига жамоадан кетишни маслаҳат берди.
«Руни қолишига умид қилишингиз мумкин, аммо у жорий мавсум жуда кам ўйин амалиётига эга бўлди. У катта ўйинларда кўп ўйнашни истайди».
«Балки у «Манчестер Юнайтед»дан кетишга олиб келадиган йўлдадир. Ҳозир клубни ўзгартириш вақти келди, деб айтиш мумкин. У юқори савияда ўйнашда давом этишни истаса, «Манчестер Юнайтед»дан кетиши лозим», - дейди Невилл.
Эслатиб ўтамиз, Руни 2004 йилдан буён манкунианликлар шарафини ҳимоя қилиб келмоқда. Ҳужумчи жорий мавсум «Манчестер Юнайтед» сафида турли мусобақаларда 38 учрашувда майдонга тушди ва 8 та гол уриб, 8 та голли узатмани амалга оширди.
Де Хеа «Реал»га ўтиши мумкин
23.05.2017
Давид Де Хеа ёзги трансферлар вақтида «Реал»га ўтиши мумкин. Бу ҳақда Sport Witness нашри Correio da Manhã интернет-нашрининг пулли версиясидаги ахборотга таяниб хабар тарқатган.
Манбага кўра, «МЮ» бош мураббийи Жозе Моуриньо испаниялик дарвозабонни «Реал»га 85 миллион евро эвазига сотишга розилик билдирган.
Агар Де Хеанинг трансфери амалга ошса, Моуриньо жамоага «Бенфика» посбони Эдерсонни таклиф қилишни режалаштирмоқда.
Португалияликлар 23 ёшли дарвозабоннинг 50 фоиз ҳуқуқи учун 30 миллион евро талаб қилишмоқда. Эдерсоннинг яна 50 фоиз ҳуқуқи «Риу Аве» клубига тегишли саналади. Клуб Эдерсоннинг қолган ҳуқуқиин «Бенфика»га 5 миллион еврога сотишни истамаганди.
Маълумот учун, Correio da Manhã – Моуриньонинг «Манчестер Юнайтед»ни бошқаришини истаётгани ҳақида биринчилардан бўлиб хабар берган манба саналади.
Мхитарян: Биз ғалаба қозонмоқчимиз
22.05.2017
«Манчестер Юнайтед» ярим ҳимоячиси Генрих Мхитаряннинг таъкидлашича, манкунианлар Европа лигаси финалида «Аякс»ни мағлуб этмоқчи.
«Биз учун бу совринни қўлга киритиш ва Чемпионлар лигасида ўйнаш имкониятига эга бўлиш муҳим, чунки «Манчестер Юнайтед» - кетма-кет уч йил Европа лигасида ўйнайдиган жамоа эмас».
«Бу ҳаётимдаги энг муҳим ўйинлардан бири бўлади. Имкониятни қўлдан бой бермоқчи эмасман. Баҳсда фақат ғалаба қозониш ҳақида ўйлаяпман».
«Агар Европа лигаси финалида ғалабага эришсак, биз учун ажойиб мавсум бўлади, чунки иккита совринни қўлга киритдик ва бу учинчиси бўлади» - дейди Мхитарян.