Фердинанд: Сульшер талабчан бўлиши керак
19.10.2021
Рио Фердинанд АПЛ 8-турида «Лестер»дан (2:4) учралган мағлубият учун жамоани танқид қилди.
«Лестер»га қарши ўйинни 2 марта кўрдим ва жамоа ўйинида зичлик, бирдамлик йўқлигидан ҳайратга тушдим.
Мураббий футболчиларга нисбатан кўпроқ талабчан бўлиши керак. Менга Санчо, Гринвуд ва Погба рақиб ортидан 90 дақиқа югура олмайди, деб айтманг.
Роналду баъзан йўқдек бўлиб қолиши мумкин, лекин сизга гол келтирадиган футболчиларни такомиллаштириш керак бўлади. Криштиану буни қила олади.
«МЮ»нинг ҳозирги таркиби Сульшерники. Энди у ғалабаларга қараб баҳоланади. У нимадир ютиши ва ривожланишни кўрсатиши керак. Агар бундай қила олмаса, ўйиндан чиқади.
Менимча, раҳбарият ҳозир бунчалик қаттиқ муносабатда бўлмайди. Сульшер мавсум охиригача қолиш учун етарли иш қилди», — дейди Фердинанд Vibe witf Five эфирида.
Невилл: Конте «Юнайтед» бош мураббийи бўлмайди
18.10.2021
Гари Невилл бош мураббий Оле-Гуннар Сульшер клубдан истеъфога чиқарилган тақдирда унинг ўрнига таклиф этилиши мумкин бўлган Антонио Конте жамоага мос эмаслигини айтиб ўтди.
«Фикримча, Конте «Манчестер Юнайтед» бош мураббийи бўлмайди. Клуб раҳбарияти мураббийлар орасидан бу номзодни танлайди, деб ўйламайман.
Тўғри, Антонио – ажойиб мураббий, аммо у ўз ўйин услуби билан маълум бир клубларга тўғри келади. Унинг иш услуби «Юнайтед»га мос эмас», - дейди Невилл Instagram’даги эфирида.
Маълумот учун, «МЮ» АПЛ 8-туридан кейин 14 очко билан 6-ўринга пастлади. Клуб сўнгги 7 ўйинида бор йўғи 2та ғалабага эришди.
Фернандеш: Бирлашиб вазиятдан чиқиб кетиш мумкин
18.10.2021
Бруну Фернандеш жамоанинг сўнгги ўйинлардаги қониқарсиз натижалари ҳақида гапирди.
«Фақатгина бирлашиб ҳозирги қониқарсиз натижалар сериясига барҳам бериш ва вазиятдан чиқиб кетиш мумкин. Буни уддалай оламиз», - дея ёзади Фернандеш твиттердаги саҳифасида.
Сульшер шогирдлари сўнгги 7 ўйиндан бор йўғи 2тасида ғалаба қозона олишди. Клуб сўнгги тур ўйинида «Лестер»га 2:4 ҳисобида мағлубиятга учраб, турнир жадвалида 6-ўринга тушди.
Маълумот учун, «МЮ»ни кейинги бир ярим ой давомида «Аталанта», «Ливерпуль», «Тоттенҳэм», «Манчестер Сити», «Уотфорд», «Вильярреал», «Челси» ва «Арсенал»га қарши жуда муҳим ўйинлар кутиб турибди.
Погба «Юнайтед»ни тарк этишга қарор қилди
17.10.2021
Поль Погба узоқ ўйланганидан кейин «Юнайтед»ни тарк этишга қарор қилди, деб ёзмоқда хориж матбуоти.
Франциялик юлдуз манчестерликлар билан янги битим тузмайди ва ёзда эркин агентга айланади. Маълумотларга қараганда, Погба ёзда «Реал» сафини тўлдирмоқчи. Ўз навбатида, мадридликлар ҳам тажрибали ярим ҳимоячини ўз жамоасига қўшиб олишни режа қилган.
Агар Поль Погба «Реал» билан шартнома имзоласа, Флорентино Перес унга йилига 15 миллион евро маош тўлашга тайёрлигини билдирган.
Погбанинг ўзи терма жамоадаги шериклари — Карим Бензема ва Килиан Мбаппе билан бирга бир жамоа шарафини ҳимоя қилишни истамоқда.
Оле: Нотўғри қарор қабул қилганман
17.10.2021
Оле-Гуннар Сульшер АПЛ 8-туридан ўрин олган «Лестер» (2:4) билан ўйиндан сўнг ўз фикрларини билдирди.
«Ўтказиб юборилган голларга қараб, улар даҳшатли эди, деб айта оламан. Бугунги ўйинимиз билан сафардаги мағлубиятсиз серияни давом эттиришга лойиқ эмасдик.
Таркибни мен танлайман. Ҳарри Магуайр тайёр эмаслигини кўрсатди ва унинг таркибга киритилгани учун мен жавобгарман. 4та гол ўтказиб юбордикми, демак, мен нотўғри қарорлар қабул қилганман.
Сўнгги пайтларда яхши формада эмасмиз, жуда кўп очко йўқотдик. Эҳтимол, бизга ўзгаришлар керакдир. Бизга кўпроқ футболчилар керакми? Бизда яхши ўйинчилар жуда кўп, лекин ҳозир Фред ва Кавани йўқ.
Таркибдан баҳона қидирмоқчи эмасман. Топ-ўйинчилар майдонга тушишди, лекин керакли натижага эриша олмадик», – дея Сульшернинг сўзларини келтиради Manchester Evening News.
Невилл: Жамоанинг ўйинларида «маза» йўқ
17.10.2021
Гари Невилл жамоанинг сўнгги пайтлардаги қониқарсиз натижаларига муносабат билдирди.
«Муайян муаммолар бор. «Манчестер Юнайтед» етарли даражада эмас. Бир неча бор айтгандим: кучли жамоаларга қарши ўйинлар бошланиши билан қийинчиликлар пайдо бўлади.
Бу мавсумда ажойиб голлар бўлди, лекин умуман олганда жамоанинг ўйинларида «маза» йўқ. Улар тарқоқ ўйнашади ва яхши ташкиллаштирилган рақиб уларни ажратиб юборади.
Мен бир вақтнинг ўзида майдонда Гринвуд, Санчо, Роналду, Погба ва Фернандеш ўйнайдиган жамоанинг ҳимоячиси бўлишни хоҳламасдим. Менга бу футболчилар ёқади, лекин улар бир пайтда ўйнаганида таркибда курашувчи ишчилар етишмайди», – дея Невиллнинг сўзларини келтиради Sky Sports.
Оле: Мен бундан жуда ҳам хурсанд бўлдим
16.10.2021
Оле-Гуннар Сульшер жамоанинг афсонавий мураббийи Сэр Алекс Фергюсоннинг Роналдуни захирада қолдиргани ҳақидаги танқидларига жавоб қайтарди.
«Мен бундан жуда ҳам хурсанд бўлдим. Мен унинг қарорларидан футболчилик вақтимда ҳам жуда кам норози бўлардим. Буни турмуш ўртоғим ҳам тасдиқлаши мумкин.
Биламанки, Фергюсоннинг ўзи ҳам бу гаплар мени безовта қилмаслигини тушунади. Ҳаммамиз ҳам Криштиануни майдонда кўришни хоҳлаймиз. Чунки у ягона, у бошқаларга ўхшамайди, «Олд Траффорд»га келганлар уни кўришни исташади. Лекин факт шундаки, у биз билан барча ўйинларда майдонга туша олмайди. Бу — физик қонун, бу — инсоният қонуни.
Алекснинг ўзи ҳам «МЮ»ни бошқариш қанчалик қийин эканини билади. У ҳам доим бир хил 11та футболчини майдонга ташламаган. У ҳам Гиггс, Руни ва Бекҳэм каби юлдуз футболчиларини асраш мақсадида мен каби таваккалга қўл урган. Баъзида иш берган, баъзида эса йўқ», - деди норвегиялик мутахассис.
Аввалроқ, Сэр Алекс Фергюсон Сульшерни Роналдуни майдонга ташламагани учун танқид қилганди.
«Реал» фикридан қайтмаган
16.10.2021
«Реал» Поль Погбани ўз сафига қўшиб олиш фикридан қайтмаган.
ABC хабарига кўра, Мадрид клуби 2022 йилнинг ёзида «МЮ» билан шартномаси якунига етадиган франциялик яримҳимоячини эркин агент сифатида ўз сафига қўшиб олиб, йиллик 14 миллион евро беришга тайёрлигини маълум қилган. Шунингдек, футболчи Мадридга текинга келаётгани учун Погба ва унинг агенти Мино Райолага 30 миллион евро бонус тўлашга тайёр.
Райола ҳам Полнинг Мадридга кўчиб ўтишини истамоқда. Клуб кейинги мавсум Бензема, Мбаппе ва Погбадан иборат ҳужумкор триони яратмоқчи.
Аввалроқ, «Юнайтед» Погбага йиллик 20 миллион евро маошли 5 йиллик шартнома таклиф қилгани ҳақида хабар қилинганди.
«Юнайтед» Линградни сотиб юборади
15.10.2021
«Юнайтед» билан янги шартнома имзоламаётган Жесси Линград эркин агентга айланишидан олдин қишки трансферлар вақтида сотиб юборилади.
Ҳужумкор футболчига «Вест Хэм» анчадан бери харидор эди. Энди талабгорлар рўйхатига супержамоага айлантирилаётган «Ньюкасл» ҳам қўшилди.
Манчестерликлар Уле-Гуннер Сульшерга керак бўлмай қолган Лингардни 18 миллион евро сотиб, кам бўлсада даромад кўрмоқчи.
Аслида манчестерликлар учта учрашувда иккита гол урганидан кейин Жессини ўз сафида олиб қолмоқчи эди. Бироқ, ярим ҳимоячи Сульшердан ўйин амалиётини кафолатлашни талаб қилди. Норвегиялик мутахассис эса ундан зарур пайтда фойдаланмоқчи ва мунтазам бошланғич таркибдан жой бермоқчи эмас.
Мендеш: «Олтин тўп» ни Роналду ютади
15.10.2021
Криштиану Роналдунинг агенти Жорже Мендешнинг фикрича, португалиялик юлдузи жорий мавсум «Олтин тўп»ни ютишга лойиқ.
«Роналдунинг ўрнига рақам ва статистикалар сўзлайди. Менимча, бу унга «Олтин тўп»ни ютиш учун етарли бўлади. Криштиану Португалия учун 115-голини уриб, ўз рекордини яна янгилади. Унга футбол тарихидаги энг яхши тўпурар мақомини бериш мумкин.
Буларнинг барчаси энг катта ютуқлар ҳисобланади. Бу совринни унга топширишда ҳал қилувчи ҳолат бўлиши лозим. Роналду дунёнинг энг яхши футболчиси эканлигини намойиш этишда давом этмоқда. У А Серия ва Европа чемпионати тўпурарига айланди.
Ва буларнинг барчасини 36 ёшида амалга оширмоқда. Менимча, бу йил «Олтин тўп» ни Роналду ютади! Мен учун у ҳеч қачон бу каби совринга яқин келмаган»,-деди Мендеш. Маълумот учун, «Олтин тўп» совринини топшириш маросими 20 ноябрь куни бўлиб ўтиши режалаштирилган.