Янгиликлар /

Малком ёки Филипе Коутиньо

Мақола нашр қилинди

«Барселона» Маркус Рэшфордни қўлга киритиш учун «Манчестер Юнайтед»га ўз ҳужумчилари Малком ёки Филипе Коутиньони таклиф этиши мумкин, деб хабар беради Mundo Deportivo.

Хабарда айтилишича, «МЮ» ёш ҳужумчисини қўйиб юборишга рози бўлмаслиги тайин, аммо эвазига «Барса»нинг юқорида келтирилган икки футболчисидан бири таклиф этилган тақдирда манкунианликлар фикрини ўзгартириши эҳтимол. «Юнайтед»ни айниқса Коутиньо бефарқ қолдирмаслиги аниқ. У «Ливерпуль»даги фаолияти давомида АПЛдаги энг яхши футболчилардан бири бўлганди.

Тахмин қилинишича, агар Рэшфорд Каталонияга, Коутиньо эса Манчестерга йўл олса, у ҳолда «қизил иблислар» «Барса»га қўшимча пул тўлашига тўғри келади. Чунки 26 ёшли бразилияликнинг трансфер қиймати 21 ёшли англияликдан юқорироқ экани айтилмоқда.

Шунингдек, Goal нашри тарқатган хабарга кўра, «Барселона» аввалроқ «МЮ»нинг қизиқиш доирасида экани маълум қилинган ҳимоячи Самюэль Умтити билан хайрлашишга тайёр. Клуб уни 70-90 млн евро атрофида сотиб юборишга қарши эмас, боиси ҳозир Испания чемпионига «Аякс»дан ҳимоячи Маттейс де Лигтни сотиб олиш учун пул керак. Қолаверса, де Лигтга таркибдан жой ажратиш ҳам лозим бўлади.

Қўшимча қилинишича, «кўк-анорранглилар» Умтити ўтган йили кузда жароҳат олганида операцияни рад этганидан норози бўлишган. 25 ёшли ҳимоячи икки ойдан ортиқроқ вақтни консерватив йўл билан даволанишга сарфлаганди. Унга «Манчестер Юнайтед»дан ташқари «Арсенал» ҳам қизиқиш билдирмоқда

Бошқа янгиликлар
Изоҳ

    Сиз авторизациядан ўтмагансиз. Шарҳ қўшиш учун сайтга киринг.