Мата: Ғалаба муҳим

Хуан Мата Европа Лигаси 1/4 финалидан ўрин олган «Копенҳаген»га (1:0) қарши баҳсдан сўнг ўз фиклари билан ўртоқлашди.

«Жамоа жисмонан чарчаган. Бу бизнинг энг яхши ўйинимиз эмасди, аммо мавсумнинг ушбу босқичида ва бундай ойда ғалаба қозониш жуда муҳимдир. Турнирда ғолиб бўлишимизга умид қиламан.

«Копенҳаген» яхши футбол намойиш этди, рақибга ҳурмат билан қарашимиз керак. Қўшимча вақтларда кўпроқ гол уришимиз мумкин эди, аммо, асосийси, кейинги босқичга ўтдик. Бўшашмадик, рақиб яхши эканлигини билардик.

Яримфинал ҳақида гапирадиган бўлсак, бизда ҳеч қандай устунлик йўқ. «Вулверҳэмптон» Премьер-лигада яхши мавсум ўтказди, «Севилья» – ажойиб мураббийга эга кучли жамоа. Ғалаба қозонганимиз ажойиб бўлди, энди бўлажак рақибимизнинг ўйинини томоша қилишимиз мумкин», – дея Матанинг сўзларини келтиради УЕФА расмий сайти.

Маълумот ўрнида, «МЮ» 16 август куни турнир яримфиналида «Севилья» – «Вулверҳэмптон» ўйини ғолибига рўбарў келади.