Магуайр: Бу фикрга қўшилмайман

Ҳарри Магуайр АПЛ 37-тури доирасидаги «Вест Ҳэм»га (1:1) қарши учрашув ҳақида ўз фикрларини билдирди.

«Олд Траффорд»да ғалабадан бошқа натижа бизни қониқтирмасди, аммо бугун яна очко йўқотдик. Ўйинни яхши бошладик, ҳужум қилдик, баҳс тизгини қўлимизда эди. Бироқ биз гол уришимиз керак бўлганда, рақиб битта вазиятидан пенальти ишлаб, гол уриб кетди. Гол ўтказиб юборилгач, ўз вазифамизни қийинлаштирдик. Учрашувда жуда кўп тўхталишлар бўлаётгани сабаб икки жамоа ҳам ўз ўйинини топиши қийин бўлди. 

Ўйинларимиз жадвали ғалати ва кулгули. Биз 9 кунда 4та ўйин ўтказдик. Бироқ бу гапим йўқотилган очколарга баҳона бўла олмайди. Биз чарчадик демаган бўлардим. Бу фикрга қўшилмайман. Якшанба куни бизни «Лестер»га қарши жуда муҳим ўйин кутиб турибди. Бу баҳсни интиқлик билан кутамиз», — дейди Магуайр.

Маълумот учун, «МЮ» Англия Премьер-лигаси 37-туридан кейин 63 очко билан 3-ўринга чиқиб олди. Сўнгги турда «Лестер»га қарши сафардаги ўйинда дуранг натижа ҳам Сульшер жамоасига ЕЧЛ йўлланмасини тақдим этади.