Роналду «Юнайтед»га қайтмайди

«Ювентус» ҳужумчиси Криштиану Роналду яқин вақт ичида «Манчестер Юнайтед»га қайтмайди.

Manchester Evening News хабарига кўра, МЮ 35 ёшли футболчини олиб келишни режалаштирмаяпти. Манбанинг таъкидлашича, томонлар ҳеч қандай музокара ўтказмаган.

Олдинроқ, Манчестер клуби ҳужумчининг қайтишига қизиқиш билдираётгани ҳақида хабар берилган эди. Кейинги маълумотларда Роналду «Ювентус»да шартноманинг охиригача қолмоқчи ва унинг оиласига Италияда истиқомат қилиш қулайроқлиги айтилмоқда.

Португалиялик футболчи 2003-2009 йилларда инглиз клуби сафида фаолият олиб борган. Бу давр мобайнида 3 марта Англия чемпиони, 2 марта Англия лига кубоги соҳиби ва 1 мартадан Англия кубоги ҳамда суперкубогини қўлга киритган.